Гьале, килщазда гьоркьосан сали г1адин ахиралде чваххун ана, лъиданиги ригьда жиб бихьулареб, амма зодоб баккидал, парт1ан гургинлъун ун жиб рещалъулеб зодоб моц1г1анги г1едег1араб, Аллагьасул баркат-рах1мат жиндилъ г1емераб Рамазан моц1алъул лъеберабго къоги.
Рецц Бет1ергьанасе буго, исанаги к1алал кквезе, г1ибадат гьабизе нилъ ч1аго тарав, гьаб лъаг1алида жаниб жал абадияб рокъоб паракъалъараб хабал агьлуялъе рес щвеч1елъул гьеб хвасарлъиялъе…
Г1ажаиблъи гьабизе бач1уна мажгиталдаса къват1ире рахъинч1ого какалги ралел, гьарзаял ифтаралги г1уц1улел, сундуего къимат кьезеги лъалел нилъеда гьоркьор цо-цо т1екъаб-мекъалде берал къанщун толел г1емер рук1иналъ. Гьабсаг1ат бицина сундул х1акъалъулъ дунали…
Дида цебе лъун буго к1ал кквелалде г1езег1ан цебеги к1ал биччазе анц1го къо хут1идалги росарал кванил ниг1матазул к1иго чек.
Цо-цо жоялде багьа бахун бихьула 10-15 проценталъцин. Февралалъул ахиралда 265 гъурущалде босун бук1араб ц1олбол хьопалъухъ (кило гуро!) гьанже бихьула берцинго 350 гъурущ ах1улеб, гьуинлъабазде т1аде дурусго гирун буго 20-30 гъурущ, ихдаде реч1ан индал багьаб ц1вакун буго цитрусазул, азарго гъурущалда аск1об рекъелин жибилан ххарун ине буго кванил цо ригьг1аги жинца т1убалеб гьанал килограммги…
Тахшагьаралда бичулезул бугин г1айибилан дармихъабаз адрес лъаларезде рехун таниги, гьан бичулезул щибдай багьана гъурщида бахиллъиялъе?!
Гъоркьисаго х1адурун тараб раг1и-хер гьороб лъун хиралъийищ, муг1рул-щобал иццал-лъарал къун ун мукъсанлъийищ?
Дир пикруялда, гьеб буго г1адатияб хъант1и т1ами. Инсанасулъ циндаго щванаг1ан г1орц1и лъангут1и борч1и.
Цебе бач1уна г1ащт1ичаг1азул зулмуялда гъоркь бугеб Газзаялъул г1адамазул к1ал биччаялъул тепси: рух1 хвасарлъиялъе гьабураб г1урччинххарил чурпаги, къот1ун цебе лъураб лимонги… Гьадаб Алжан насибаб халкъалъ г1адин ракъи-къечниги х1ехьезе ккун гьеч1елъул, цо анкьицаг1аги гьал ч1ух1арал пихъ-мич1алги, ц1арцин лъаларел ниг1маталги нилъеца росич1ого танани, унго, щиб бакъандай хисизе бук1араб даранчаг1аз? Турилаан гурищ пихъал, болжал инаан гурищ ричулел ругелщинал т1аг1амазул?!
Ц1алана, к1алккун моц1алъул ахирисел къояз гьарурал лъик1ал г1амалазухъ 84 соналъ т1ат1ала гьел гьарурабг1ан кири щолилан… вах1ай, Бет1ергьан Аллагь, унго гьарурал квешлъабазухъги (дармилъ махсароде кквей, гьерсал рицин, бугьтанал лъей, мискинчиясул гъин кванай…) рес гьеч1ищ гьал байрамалда цересел къояз мунагьал гьаруразда цо анц1илъ кьабг1унг1аги баракат гьеч1олъи бихьизабизе?...
Р. S. Ккурал к1алалги, рахъарал закаг1ат-сах1алги, кьураб садакъаги аллагьас азариде бахинабун къабул гьабеги нужер! Т1аде-ххариялъул гьоркьоса чи камич1ого кквезе сахги таги.
Сураталда: цо пуланаб тукада «Аленка» шоколад бащдаб моц1алъ цебеги 1 апрелалдаги…
Ф. Мух1амадова.
| 
