Гlабасил Махlамад гlабсахъ восулев                                                                                                            

Гlадан гурев вугев нилъер тlалъидал                                                                                                          

Москваялда гlемер лъагlелал рана                                                                    

Лъагlилухъ батараб билизе течlо
Р. Хlамзатов

1 октябралда районалда кlодо гьабуна Дагъистаналъул Халкъияв шагlир Гlабасил Махlамад гьавуралдаса 90 сонилаб юбилей. Тадбир байбихьана тlоцебе райцентралъул цо къватlалъе шагlирасул цlар кьеялдасан. Гьенисан киназго сапар бухьана шагlирасул гlагараб Лъагlилухъ росулъе.   

Тадбиралде рачlаразда гъорлъ рукlана республикаялъул хъвадарухъабазул Союзалъул председатель Мухlамад Ахlмадов, филологиял гlелмабазул доктор Мухlамад Мухlамадов, Халкъиял шагlирзаби Залму Батирова, Тубхlат Зургьалова, республикаялъул миллияб прессаялъул журналистал ва цогидалги интеллигенциялъул вакилзаби. Гьалбалгун цадахъ районалъул нухмалъиялъ росдал гьоркьохъеб школалъул азбаралда поэтасе бараб памятникалда цебе лъуна тlугьдул.  

Гьалдаса хадуб росдал клубалда жаниб байбихьана тадбиралъул официалияб бутlаялде.  

Данделъаразе саламги кьун, кlалъай гьабуна районалуъул бетlер Нурмухlамад Задиевас.

“Гlабасил Мухlамадил хlалтlулги, гьес нилъер миллияб адабияталда тараб лъалкlалъулги  бицун дихъа бажариларо. Гьелъул гlемер лъикl бицина жакъа тадбиралде рачlарал гьесул гьудул-гьалмагълъиялъ, поэтаз, журналистаз ва творческияб интеллигенциялъ. Дие абизе бокьилаан жакъа нилъеца кlвараб хlаракат бахъизе кколин Гlабасиласулги цогидал нилъер шагlирзабазулгун хъвадарухъабазулги рухlияб ирс наслабазухъеги, нилъер лъималазухъеги кьезеян. Нилъер буго  Дагъистаналъул 6 Халкъияв шагlир рахъараб ва улкаялдаго тlоцебе литературияб абун цlар щвараб район. Гьез нахъе тараб рухlияб бечелъи цlуни - гьеб буго жакъа нилъер аслияб масъалаги”, - ян абуна гьес.

“Кlудияв шагlирасул гlумру байбихьула гьев ракьалдаса араб мехалъ. Нилъеца киданиги тlадаб даражаялда къимат гьабуларо нилъгун цадахъ ругел поэтазул, композиторазул ва художниказул. Нилъеда ккола гьел кидаго нилъеда аскlор чlагого рукlинин абун. Гlабасиласулги букlине кколеб къимат гьабун бажаричlо нилъехъа. Жакъасеб дунялалъухъги гьенир ругел гlадамазухъги балагьараб мехалъ дида цебе тlамула кидаго гьалбадерил цlун букlунеб Гlабасиласул рукъги, гьездаса вохун, чlухlун, чlезе бакl тlагlун вугев шагlирги. Жинцаго тlаде гьалбал къабул гьарун гурони, живго гlемер къватlиве вахъунароан гьев. Кидаго гьесда хьолбохъ йикlана гlумрудул гьудул Савдатги. Шагlир вукlуна жиндирго дунялалда вугев чи. Гьесул букlуна гlемерисезе бичlчlизе захlмалъулеб тlабигlат-гlамал. Гьединлъидал бигьаяб жо букlунаро гьевги вичlчlун, гьесул лъадилъун йикlине. Амма гьеб бигьаяб гуреб борч бахlарчиго тlубазабуна Савдат-эбелалъ тlолабго гlумруялъ. Гьелъухъ кlудияб баркала буго гьелъие”, - ян абуна Мухlамад Ахlмадовас. 

Гlабасил Махlамадил кучlдулгун цере рахъана районалъуд батlи-батlиял школазул цlалдохъаби. Гьединго шагlирасде гьарурал жидерго кучlдул рикlкlана рукlинесел шагlирал - районалда гlуцlун бугеб гlолохъанал поэтазул советалъул членазги.  

Гlабасилав кинав чи  вукlаравали, гьесул Ватlаналдехун, гlадамаздехун ва гьобол-гьудуласдехун букlараб рокьул бицун кlалъаял гьаруна щагlирзаби Залму Батировалъ, Залму Мухlамадовалъ, Россиялъул Мустахlикъав художник Гlали Мухlамадовас, районалъул цевесев нухмалъулев Мухlамад Гъазиевас ва цогидазги. Гьединго т1аде рач1арал гьалбадерица ракl-ракlалъулаб баркала кьолеб бук1ана шагlирасул юбилеялде гьесул рукъ-музей, росдал клуб, сверухълъи  къачlазе хlаракат бахъарав росдал бегавул Гlали Мусаевасе, гьаб нухалда шаг1ирасул тадбиралда цолъун х1аракат бахъарал лъег1елдерил жамаг1аталъе ва гьезие кумек гьабуралщиназеги.

Ахиралда киналго гьалбал гlодор чlана цебеккунго хlадур гьабураб бечедаб кванил столалда нахъа.
И. Мухlамадов.