Гьал къоязда райадминистрациялъул бет1ерасул заместитель Батиров Саг1адулагьил кабинеталда данделъун бук1ана «Хунзахъ район» муниципалияб г1уц1иялда цебе бугеб  нухазда х1инкъи гьеч1олъи ц1униялъул комиссия. Данделъиялда г1ахьаллъарал  комиссиялъул членал – ГАИялъул, нухазул участкаялъул, РУОялъул ва АТПялъул вакилзабаз баян кьуна хасалил шарт1азда нухда хьвадиялда х1инкъи гьеч1олъи  бук1инабиялъе жиде-жидер бут1аялда гьабулеб бугеб х1алт1ул х1акъалъулъ.

ГАИялъул начальник Хъазанбиев Ах1мадица бицана араб соналде данде ккун исана автоавариял ва гьезул х1асилалда г1адамазе ккараб зарал ц1ик1к1ун, лъукъа-къот1ун, сакъатлъи ккей гуребги хвалил  х1ужабиги г1емерлъун ругилан. Полициялъул участковиялгун, нухазул участкаялъул, лъайкьеялъул управлениялъул ва цогидал  г1уц1абазулгун цадахъ рекъон гьабураб жидерго х1алт1улги бицана Хъазанбиевас.

Хасалил шарт1азда нухазда хьвадиялъулъ х1инкъи гьеч1олъи бук1инабиялъе дорожниялъулазул х1адурлъиялъул бицун к1алъана гьеб г1уц1иялъул бет1ерав инженер Х1асанов Х1асан. Сверабалъ, хьонлъул  рахъалда  ц1ерч1вазе бегьулел бак1азда  ц1амгун жубараб салул гох1ал  гьарун, г1азудаса нухал рац1ине, т1аде сали щвазе техника х1адурун  бугилан бицана гьес. Рик1к1адал росабалъе нухал рац1ине  бульдозерал ругила. Амма гьезда х1алт1изе механизаторал щолел гьеч1ила, жалго бет1ергьанал бульдозерал ругез ц1ик1к1араб багьа ах1ун, квал-квалал кколел ругилан бихьизабуна Х1асаница.

РУОялъул вакил Мах1мудов Мух1амадил к1алъаялдасан  баянлъана нухазда хьвадиялъулъ х1инкъи гьеч1олъи бук1инабиялъе школазда лъималазда гьоркьоб цо къадаралъул х1алт1и гьабулеб бук1ин. ОБЖялъул, трудалъул дарсазда малъулила нухазда хьвадиялъул къаг1идаби, цо  школалда автоделоги малъулилан бицана гьес.

Цебесеб данделъиялда х1исабалде росун рук1арал суалал т1ураялъул, хасалил шарт1азда гьарич1ого г1оларел х1алт1абазул бицун  х1асилалъулаб к1алъай  гьабуна С. Батировас. Данделъи ана цоцазда рич1иялъул ах1вал-х1алалда.

Р. Х1амзатов