Инсанасул г1умруялъул г1урабго заман, г1ага-шагарго лъабил
бут1а, уна х1алт1уда нахъа – цояв
учительлъун, цогидав тохтурлъун, цо-цоял г1ухьбилъун ва гь.ц. Гьединлъидал
рек1ее бокьулеб х1алт1уде ккей, бокьулеб махщел щвей хъизан-рукъалъул талих1
кьей г1адаб жо буго. Аллагьас ц1унаги бокьулареб ишалде щибаб къоялъ ине ккеялъул г1азабалдаса. Гьединаб х1алт1уца
кьолеб пайдаги – дагьаб бук1уна.
Гьеб рахъалъ талих1ай йигин жиян бицана Хунзахъ районалъул
централияб больницаялъул
терапиялъул отделениялъул сестра
Бакьагьеч1иса Г1алиева Сидрат Х1амидовнаялъ.
Гьит1инго бижанин тохтурзабаздеги тортурлъиялдеги рокьиян
абиги хабар рекъеялъе абулеб калима гуро. Гьеб буго х1акъикъат. Тохтурлъиялде
рокьиги ч1обогояб бак1алда бижараб жо гуро. Зах1матаб, халат бахъун егизе
кколеб унтигун яч1ана Сидрат Хунзахъ
районалъул больницаялде. Гьит1инай Сидрат к1вараб кумекги гьабун,
сестрабазда цадахъ палатаялдаса
палатаялъуе хьвадилей йик1уна. Гьеб мехалъго бижун батилин жиндилъ хъах1ал халатазде
рокьиян абуна Сидратица гара-ч1вариялда дида. Гьит1инго рек1елъ тохтурлъиялде
бижараб рокьул ц1аги т1адеялдаса
т1аде гьелегьун, хъах1аб халат рет1ине
бук1араб анищалъ куркьбиги гъун, 10 класс лъуг1арай Сидратица къасд гьабула
мединституталде ц1ализе лъугьине.
Йорч1ич1о. Бит1 ккеч1ого т1ад юссине ккана. Тохтурлъи гурого бат1ияб х1алт1иги
гьабиларин, врачлъун яхъинч1ого ч1еларин
щулияб къасдалда йигей Сидратица хадусеб соналъги экзаменал
мединституталде кьуна. Экзаменазул х1асилал квеш ккеч1о, амма институталде йорч1ич1о. Гьанжеса г1арцуда бан хут1ана иш.
Г1арацги гьеч1ого бук1инч1о, амма инсуе бегьулароан чороклъи.
«Врачлъун яхъине дир къасд т1убалареб анищлъун хут1анилан
пащманал сардал-къоял рач1ана диде. Тохтурлъун яхъине дир гъира лъалев эмен,
кидаго г1адин, гьаб нухалъги г1акълучилъун дир хьолбохъ ч1ана. Инсуца дие
г1акълу кьуна медучилищиялде ц1ализе лъугьаян. Рак1 «мединститут,
мединститутилан!» ах1делеб бугониги, дун инсуца малъарабги гьабун,
медучилищеялде ц1ализе лъугьана. Дир рак1 бух1ич1о сестра-акушеркайин дие
щвараб махщалидаса. Врачго гьеч1ониги,
врачасул кумекч1ужулъидалха дунги. Врачас унтуе диагноз лъола, дица унтарасе
врачас бихьизабураб дару-сабаб гьабула. Дун йохарай йиго нус-нус унтарасе сахлъи т1ад буссинабиялъулъ дирги бут1а
бук1иналдаса».
Бергьенлъиялда медучилище лъуг1арай С. Г1алиева Болъихъ
районалъулаб больницаялде йит1ула х1алт1изе. К1удияб гъира-шавкъгун лъугьанила
жий жиндирго хъулухъалъул ишал т1уразаризе. Байбихьудаго цо зах1малъи
дандч1ванила жинда. Цо асмаялъ унтарасул
венабалъе укол гьабизе кколеб бук1анила. Гьединаб унти бугесул
бидурихьалъе укол гьаби расги бигьаяб жо бук1унарила, хасго жий г1адай
гьанже-гьанжего х1алт1уде байбихьулей сестраялъе. «Дие кумек, дие кумек!» -
абун ах1и балеб бук1ана рак1алъ. Щай дун цогидаздаса бажари гьеч1ей йик1ине кколей
абун, таваккалго босана шприц кодобе ва укол гьабизе бажарана. Дир йохиялъул
г1орхъи бук1инч1о. Гьеб бук1ана дит1аго т1ад дир к1удияб бергьенлъи. Дида бич1ч1ана
бажаруларин щибго тезе бегьулареблъи. Тезеги теч1о».
Лъабго соналъ Болъихъги х1алт1ун, Сидрат яч1ана Хунзахъ
райбольницаялде х1алт1изе. 15 сон буго гьей больницаялда терапиялъул отделениялъул
сестралъун х1алт1улелдаса.
Цогидаб х1алт1улъ г1адин гуреб, больницаялда гьабулеб
х1алт1улъ ч1алг1ен – свак лъач1ила жинда. Бегьулеб ани, жинца Сидратие рукъ
больницаялда балаанилан махсаро
гьабулаанила мунагьал чураяв
инсуца.
Гьеб буго нилъеца байбихьуда бицен гьабураб рак1алъ т1аса
бищараб бокьулеб х1алт1уде ккеялъул
х1асил.
Гьанже Сидрат йиго бечедаб х1албихьиги камилаб махщелги
бугей сестра. Гьал ахириял соназ 4-5 нухалъ, сах вук1инч1ого, вегизе ккана дун
терапиялъул отделениялда. Щибаб нухалъ
терапиялъул отделениялдаса дун нахъе ана цох1о Сидратие гурев сестраби
Хъандулалъе, Бикайнатие, Саратие баркалагун. Лъик1аб рахъалдехун отделениялъул
х1алт1и хисун бук1иналда разиял руго
гьенир регизе чанц1улго ккарал цогидал унтаралги. Г1емераб х1алт1и гьабун буго
отделениялда г1олохъанай заведующая Азима Дибирдадаевалъул нухмалъиялда гъоркь
отделениялъул т1олалго х1алт1ухъабазул коллективалъ.
Сидратго г1адин гьелги мустах1икъал руго, газета гьоркьоб
ккун, гьезул ц1акъ пайдаяб х1алт1ул х1акъалъулъ реццалъулал раг1аби абизе.
ИншаАллагь хъвала гьезул х1акъалъулъги.
Гьал мухъал дица хъвана отделениялда сах гьарулел рук1арал
Г1урк1ач1иса, Г1оч1лоса, Гьоц1алъа, Хунзахъа, Бакьагьеч1иса унтаразул
отделениялъул т1олабго коллективалъе жидер баркала загьир гьабеян гьарун.
Къабул гьабе нижер рак1-рак1алъулаб баркала, сахаватал г1адамал.
Г1иса Г1исаев.
| 
