Дагьал церег1ан къояз райцентралда Расул Х1амзатовасул
ц1аралда бугеб спорткомплексалда т1орит1ана г1олилазул комитеталъ г1уц1арал
зах1маталъул Бах1арч1ужу Хажа Локаловалъул призалъе г1оло школлъимал-ясазда
гьоркьор волейболалъул къецал.
Къецазда г1ахьаллъана анлъго школалъул команда: Хунзахъ № 1
ва № 2, Гьоц1алъ, Т1ануси, Г1ахьалч1и ва Г1арани гьоркьохъел школазул. Къецал
ана г1езег1ан х1алуцараб ах1вал-х1алалда, киналго командаби г1езег1ан лъик1
х1адурун ругоан. Х1аязе къимат кьезе г1уц1ун бук1ана спорт лъалел ва
бокьулездасан г1уц1араб жюриги: Х1айдарбегов Г1абдулкъадир (спорткомитеталъул
председатель), Атаев Гьимат (Хунзахъ спортшколалъул директор), Ах1мадов
Мух1амад (физкультураялъул учитель, волейболист) ва Малачиев Шамиль.
Къецазул х1асилазда т1оцебесеб бак1 ва щуазарго гъурущ щвана
Г1ахьалч1и гьоркьохъеб школалъул ясазе, к1иабилеб бак1 ва лъабазарго гъурущ
щвана Т1анусиса волейболистазе, лъабабилеб бак1 ва к1иазарго гъурущалъе
мустах1икълъана Хунзахъ № 2 гьоркьохъеб школалъул команда ва ункъабилеб
бак1алде бач1ана Гьоц1алъ гьоркьохъеб школалъул команда. Ункъабго командабазул
ясазе кьуна бак1азда дандекколел грамотабиги, командабазе---дипломалги.
Гьел командабазул волейболисткабазда, тренеразда ва школазда
баркула бергьенлъи, хадубккунги ц1алулъги спорталъулъги жеги ч1ах1иял
бергьенлъаби щваги гьезие.
П. Гунашева.
| 
