 Дагьаб цебе Ц1ада росдал спортивияб залалда т1орит1ана
росдал ясазда гьоркьор волейбол х1аялъул къецал. Къецазда г1ахьаллъана
школалъул ясазул команда «СОШ», каникулаз рокъоре рач1арал студенткабазул
команда «ВУЗ» ва росдал ясли-ахалъул ва учительзабазул «ЗОЖ».
Т1оцебе можоро бахъун х1азе ккана «СОШ» ва «ЗОЖ» командаби.
Х1алуцараб х1аялдаса хадуб 2:0 х1исабгун бергьана «СОШ». К1иабилеб дандч1вай
бук1ана «ЗОЖ» ва «ВУЗ» командабазда гьоркьоб. Гьаниб «ЗОЖ» командаялда бич1ч1ана
къунани жал къецаздаса нахъе ине кколеблъи ва гьез х1аракат бахъана «ВУЗ»
командаялда т1ад бергьенлъи босизе. Т1оцебесеб бак1алъе таваккалго х1арал
гьезда «ВУЗ» командаялда т1ад 2:0 х1исабгун бергьине к1вана. Х1алуцун ва
балагьизе рак1 ц1аледухъ ана ахирисеб «ВУЗ» ва «СОШ» командабазда гьоркьоб
бук1араб х1айги. Гьаниб х1алуцараб дандч1ваялдаса хадуб бергьана х1албихьи
ц1ик1к1араб «ВУЗ» команда.
Лъуг1ана ахирисеб х1ай. Къецазда бергьараб команда лъазе
кканани судьябазул коллегиялъ рик1к1ине кколаан лъабабго командаялъе щибаб
дандч1ваялда щварал очкаби. Гьедин рик1к1ун 97 очкогун къецазда I бак1 щвана «ЗОЖ»
командаялъе. Гьезие кьуна хьвадулеб кубок ва 2000 гъурущ. 89 очкогун к1иабилеб
бак1 ккураб «ВУЗ» командаялъе кьуна 1500 гъурущ. 86 очкогун лъабабилеб бак1
ккураб «СОШ» командаялъе кьуна 1000 гъурущ г1арцулаб сайгъат.
Лъуг1ана къецал, киналго разиго хут1ана гьездаса ва х1укму
ккана гьединал волейболалъул къецал щибаб санайил студентал каникулалъ рач1ингун
т1орит1изе. Гьединал къецаз квербакъи гьабизе буго росулъ волейбол цебет1езе ва
лъималазда гьоркьоб гьудуллъи щулалъизе.
Рак1-рак1алъул баркала гьел х1аязе спонсорлъи гьабурал
росуцоязе. Гьединго жамаг1аталъул рахъалъ рак1-рак1алъул баркала кьезе бокьун
буго щиб х1алт1и жинца т1аде босаниги рак1 унтун гьабулев, нижер байбихьул
школалъул нухмалъулев Мусаев Мух1амадиеги. Къокъаб заманаялда гьес г1емераб
х1алт1и гьабуна росулъ спорт цебет1езабиялъеги. Гьаризе бокьун буго гьесие
чорхое сахлъи, гьабулеб х1алт1улъ хадубккунги икъбал.
С. Патах1ова, Ц1ада росу.
| 
