31 январалъ райадминистрациялъул бет1ерасул кабинеталда
районалъул г1уц1абазул нухмалъулезул г1ахьаллъигун т1обит1ана иргадулаб
данделъи. Гьеб бачана районалъул бет1ер Х1. Дарбишевас.
Данделъиялда г1ахьаллъарал г1уц1абазул нухмалъулез бицана
араб соналъ ккарал х1алт1ул х1асилазул гьаб соналдаги планалда рекъон х1алт1изе
байбихьун бук1иналъул х1акъалъулъ. Данделъиялда гьоркьоб лъураб к1вар
ц1ик1к1араб ва г1адамазул г1емераб хабар жинда сверун бижараб суаллъун бук1ана
районалъул г1уц1абазда гьаб ахирисеб к1иго моц1алъул харж г1ужда щвеч1олъи.
Гьелда т1асан жиндирго бугеб рах1атхвейги
загьир гьабун, иш т1аде кколел ва
г1айибиял г1уц1абазул нухмалъулезул к1вар буссинабуна гьелда хурхун ругел
г1унгут1абиги, квал-квалалги т1аг1инарун къокъабго болжалалда харжал кьезе
ккеялде. Гьединго планеркаялда бихьизабуна хасалил заманаялъ нухазда х1инкъи
бугеб ах1вал-х1ал лъугьунеб бук1инги, токалъул трансформаторазде х1ал кколеб
бук1инги. Гьел г1унгут1абиги щибаб иш т1аде кколеб г1уц1иялъул нухмалъулезда
лъуг1изареян лъазабуна районалъул бет1ерас. Нахъисеб къоялъ гьебго магIнаялъул данделъи тIобитIана районалъул лъай кьеялъул хIалтIухъабазда гьоркьобги. Данделъиялда гIахьаллъарал райадминистрациялъул бетIер ХI. Дарбишевас, РУОялъул начальник З.ГIумаровас бичIчIизабуна лъай кьеялъул гIуцIабазул нухмалъулезда учреждениязул
тайпаби бюджеталъулаздаса казнаялъулазде рачин ва документация лъугIун гьечIолъиялда бан, харжал кватIи. АхIана гьел мухIканлъи гьечIолъиги лъугIизабун, кагъат-хъарщиги роцIцIинабун, хIалтIуде гъорлъе лъугьине.
П. ГУНАШЕВА
|
