Рак1 бохула къват1иса г1адамаз нилъер г1адамазул лъик1аб рахъалъ бицунеб раг1идал. Жеги ч1ух1изе бач1уна дургун къаламцояз гьезул х1акъалъулъ газет-журналазда хъван батидал. «Кизилюрталъул харбал» газеталъул мухбир, машгьурав журналист Г1алибег Салаватовас нижехъе бит1ун бач1араб «Инсулги васасулги фронталда дандч1вай» макъалаялъ нижеего г1адин нужееги асар гьабилилан гъоркьехун бахъулеб буго гьеб.
(РЕД).

Нилъер ракьцоял, Г1ахьалч1и росулъа Мух1амадица ва гьесул лъади, Т1ануси росулъа Аминатица лъик1аб тарбия кьун г1езаруна к1иго лъимал.
Гьезул ц1ик1к1арав вас Г1амир гьит1инаб къоялдаса нахъего спорталдехун рокьи бугев вук1ана. Гьев хьвадулаан Базаргановасул ц1аралда бугеб спортивияб клубалде Таязул боксалъул секциялде. Кизилюрт шагьаралъул №8 гьоркьохъеб школалъул 9 классги лъуг1изабун Г1амир лъугьана Санкт-Петербургалъул №364 «Спасатель МЧС» кадетазулаб школалде.

Гьеб школалъул ц1алдохъабаз, ц1алудаго цадахъ бат1и-бат1иял къецаздаги конкурсаздаги г1ахьаллъи гьабулаан, гьединго кадетаз Санкт-Петербургалда т1орит1улел Россиялъул МЧСалъул ва Фрунзел ц1аралда бугеб профилактикаялъулаб управлениялъул х1алт1ухъабазда цадахъ гьарулаан Пожарниказул паркалда рейдал, рикьулаан листовкаби, экстренниял хъулухъазул телефоназул номерал. Школалъул командабаз г1ахьаллъи гьабулаан нухазда х1инкъи гьеч1олъи ц1униялъул, хехаб медицинаялъулаб кумекалъул, туризмалъул  къецаздаги.

2017 соналъ г1олилав ц1ализе лъугьана Новосибирскалъул Жуковасул ц1аралда бугеб рагъулаб институталде. 2022 соналъ баг1араб дипломалда гьебги лъуг1изабун гьев вит1ана Северияб Кавказалъул округалъул миллатазулаб гвардиялде хъулухъ гьабизе. 607 спецназалъулаб централда Г1амир т1амуна взводалъул командирлъун.

2023 соналъул апрелалда лейтенант Мух1амадов жиндирго подразделениягун цадахъ вит1ула командировкаялъ Донецк республикаялде.
Украинаялда нацизмалде данде къеркьолезул цересел кьеразда жиндирго рух1алдеги г1умруялдеги вач1инч1ого вагъулаго, цо нухалъ гуро гьес бихьизабураб живго бах1арчияв рагъухъанги махщел бугев командирги вук1ин.

"Дада, салам гlалайкум!"
Нилъер ракьцоял г1емер руго Украинаялда нацисталгун рагъулел. Рагъде бат1а-бат1аго аралги чанги данделъула гьенир.
Гьедин, рагъулаб операциялъул зонаялда ккана Ват1ан ц1унулел инсулги васасулги рохалилаб дандч1вай. Инсуе саламги кьолаго, жиндирго рек1ее лъугьараб рохалилаб асар бахчизе к1веч1ого векерана Г1амир гьесде данде. Киг1ан к1удиябха инсулги рохел бук1инеб, кьалул майданалда жиндирго васасда къвал базе щведал. Гьеб аск1ор ругезеги к1удияб асар гьабулеб дандч1вай ккана Бахмут шагьаралда.
Васал-гьел ккола инсул рохелги, ч1ух1иги, гьесул наслабиги. 

Рокъове к1алъазецин къанаг1ат гурони бухьен щоларев васасул «Дада, салам г1алайкум!» абурал раг1аби жиндаго цере т1амуралин кканилан бицана Мух1амадица. СМСал рач1ани, гьелги к1удияб рохел бук1унаан рокъосезе, гьанивин абуни, залимав, къвак1арав рагъухъанас каранде къайдал бич1ч1ана Мух1амадида – вас вук1ин. Г1амиридаги рак1алдецин ккун бук1инч1о гьеб ракьалда эмен данделъилилан. Гьеб лах1заталъ жиндие лъугьараб асар бицун бажаруларин абуна гьес. «Дун лъик1 вуго, эмен, вихьулищ? Ч1агояв, цониги г1уж лъеч1ого, сакъат ккеч1ого» - ян г1одове виччазавуна васас дун, - ян бицана Мух1амадица. Цинги гьес бихьизабуна дида жиндирго рагъухъанасулаб рук1а-рахъин. Бугизеги кинабго лъик1 бугоан, бац1адго, бак1а-бахарун.

Лъимал эбел-инсуца малъа-хъваял гьарун рахънире ккезарулин, гьезул рахъ кколин, амма щивлъун жив вахъинев, гьудул-гьалмагълъи кинаб бук1инебали бихьинчияс жинцаго т1аса бищулин. Гурони лъимал жалго-жидедаго ч1арал, къвак1арал, бокьараб къоялъ х1ажаталъуб кумекалъе ратулеллъун лъугьине ресги гьеч1ин. 

Ц1иял дандч1ваялги, цереч1арал рагъулал масъалабиги.
К1иявго бихьинчи бат1и-бат1иял батальоназда руго хъулухъ гьабулел, ругониги гьезие дагьаб цебег1ан нахъойги дандч1вазе, гара-ч1варизе рес щвана.
Эмен – гьоркьохъеб г1елалъул, комуфляжалъулаб курткаги рет1ун, рукьби хъуриледухъ халатбахъараб рат1алъиялдаса хадуб, гъажалда автомат барав, рагъулаб форма рет1арав г1олилав данде къалев…

Гьел к1иялго бат1и-бат1ияб ригьалъул, амма цоцазда релъарал – мег1ер, берал, г1анаби, к1иялго Россиялъул ц1иял регионазул халкъ нацизмалдаса ц1унулел. Эмен нус-нус километрабиги тун вач1ун вук1ана васасда бер ч1вазелъун, гьев каранде къазелъун. Киг1анго рек1ее бокьаниги дандч1вай халатбахъараб бук1инч1о, амма эменги васги цоцазда рихьана, цоцазе рокъосан рач1арал ц1иял харбал рицине щвана.

«Лъаларо, т1ок1алъ вихьилищ дида васали, курорталда гурел, рагъдалъидалха ругел. Гьеб рахъалъ гьаниб ц1акъ кьварун бук1уна. Амма дир хьул къот1уларо, Аллагьас ц1унаги нилъ киналго, нилъ рит1ухъаб нухдасан унел руго» - ян абуна Мух1амадица.

Мух1амад Сайгидулбат1аловичасе СВОялда г1ахьаллъи гьабулаго щвана бат1и-бат1иял ведомственниял шапакъатал, гьезда гьоркьор руго «За отличие в службе в особых условиях», «За отличие в службе второй степени», «За боевое отличие» медалалги.

Г1амирги инсудаса нахъе ккун ч1олев гьеч1о, гьесул карандаги армиялъул генерал Яковлевасул медаль кенч1олеб буго. 
Рагъда вугониги спортги рехун тун гьеч1о гьес.  Г1амир ккола рагъулал искусствабазул спорталъул мастерлъиялде кандидатги.

Мух1амадов Г1амирил ДНРалде к1иабилеб командировка халатбахъана 2023 соналъул октябралдаса 2024 соналъул январалде щвезег1ан. Г1амирил нухмалъиялда гъоркь иргадулаб спецоперациялда рук1аго гьесул подразделениялъ нахъойги жидерго къвак1иги, къох1ехьейги бихьизабуна. Гьанже Г1амир вуго к1удияв лейтенант. Живго Г1амир ц1акъ ц1ар-реццалда хадув лъугьунарев, нилъер маг1аруласул ях1-намус ц1унарав г1олилав вуго. Гьабсаг1ат гьев отпускалда вуго, амма кват1ич1ого рагъулал гьудул-гьалмагъзабазухъе нахъвуссине ккола.

Гьаб г1агараб заманалда Г1амирил эмен Мух1амадие Россиялъул Президентасул Указалда рекъон Суворовасул медаль кьун бугиланги лъана нижеда гьаб макъала х1адурулел рук1аго.

Баркула Мух1амадида шапакъатги, гьарула гьесие васгун цадахъ сах-саламатго рагъги лъуг1ун рокъове вуссин.
Нужее нухал рит1аги! Бергьенлъи нилъехъ бук1ина!

Г1алибег Салаватов, Россиялъул журналистазул Союзалъул член