Гьаб буго хурухъанлъиялда, ахихъанлъиялда, гIи-боцIухъанлъиялда тIад бан хIалтIи унеб заман. МугIруздагин гIатIиракьазда байбихьун буго ихдалил рекьуде, ахакь гъутIби рохьун, тIамах-кIачар бухIун рацIцIаракъалъиялъулал хIалтIаби гьарулел руго. МагIишатаз баччулеб буго хурзабахъе рак, магIданиял беэнлъаби. ГIи-боцIухъабаз бакIарулеб буго жидерго бачIин-кьагIи, бачал. Щиб ахIвал-хIалалда ругел гьел хIалтIаби росдал магIишаталъул СПКяздаги ОТФяздагияли лъазелъун жакъа ниж дандчIвана райадминистрациялъул росдал магIишаталъул отделалъул нухмалъулесул заместитель ГIумаров ХIусен ГIалилмухIамадовичгун. Гьес нижее бицана гьадин:

- Х у р у х ъ а б а з д а г и н ахихъабазда лъала хурулгун ахил цIикIкIараб бачIин щвезе ккани, тIадчIараб захIмат, жигараб къеркьей, агротехникияб хъулухъ хIажалъулеблъи. Гьебги бичIчIун районалъул гIемерисел магIишатал хасалил моцIаздасанго байбихьун лъугьана ихдалиде хIадурлъизе. КъачIана техника, хьонал, раччана беэнлъаби. Гьедин хIалтIи гьабураб бакIазда хIалтIи лъикI унеб буго. Районалъул магIишатаз тIаде босун буго 4400 гектаралда цудунаб рекьи гьабизе. ГьанжелъагIан бегараб ракьул къадар бахун буго 2,500 гектаралде. Бекьизе ракIалда буго 300 гектаралда люцерна, 80 гектаралда картошка, 1700 гектаралда суданка хер, 500 гектаралда цIоросаролъ, 200 гектаралда бахчаялъулал культураби, 200 гектаралда ролъ, 500 гектаралда пиринчI, 250 гектаралда батIибатIиял культураби: багIаргьоло, тIипало, пурчIина, 90 гектаралда овощал. Рехсараб къагIидаялда рекьи гьабизе цоцо бакIазда тIубараб хIадурлъи батаниги, руго гIечIеб къагIидаялда хIалтIи гIуцIаралги. ГIаммаб къагIидаялда хьоназул хIадурлъи буго 73 проценталде гIагарун, техникаялъул хIадурлъи буго 80 проценталде бахун. Руго нилъер 70 гIагарун МТЗ-80 ва МТЗ82 тракторал, анкьго К-700 трактор, лъабго Т-150 трактор, 32 сеялка. Амма руго гьединабцин хIадурлъи гьечIел бакIалги. КъваригIараб буго ихдалил культураби рекьиялъул хIалтIаби жиндир заманалда ва тIадегIанаб качествалда тIоритIизе механизаторал чIезаризе. СПКязул нухмалъулез гьел хIалтIаби квалквал ккечIого иналъе тIолабго къуватги, жанжигарги кьезе ккола. Ахиралде щвана гIи къинлъул компанияги. ГIиядаса нилъее лъикIаб тIинчI щвана. ГьабсагIаталда магIишатазда унеб буго гIи къунцIи. КватIичIого гIиял гочун рачIина гIатIиракьаздаса мугIрузде. Гьелдеги магIишатазул нухмалъулез жигараб хIадурлъи гьабулеб буго. Гьал гIагарал къоязда нилъеца, ай бусурбабаз кIодо гьабизе буго кIал биччаялъул байрам. Гьелда цебеги районалъул магIишатаз гIуцIулеб буго ярмарка. Гьениб учузаб багьаялде бичизе буго гьан, рахьдал нигIматал ва цогидабги росдал магIишатаз хIадурулеб продукция. ХIусен ГIумаровасулгун гьабураб гарачIвариялдасан бихьулеб буго магIишатал рекьуде хIадурун рукIин ва гьез гьенисан бахъулеб продукциялъул къадар ва качество цIикIкIинабиялъе кIвараб жигар бахъулеб букIин. Нилъецаги хьул гьабила хаслихълъи тIаде щвейгун гьезул бачIиналъ магIишатал ва нилъ рохизарилилан. Киназулго гьабулеб ишалъе къуват кьеги.

Н. Гlалиева.