Халкъалъул парахалъи цIунулезул профессионалияб байрамалъул тарих байбихьана 1962 соналдасан. Гьеб соналъ тIоцебе кIодо гьабуна СССРалда советияб милициялъул къо. 10 ноябрьги гIадада бищараб календаралъул тарих гуро-социалистияб инкъилаб ккун лъабго къоялдасан 1917 соналъ тIоцебе гьабун букIана хIукму хIалтIулаб (рабочая) милиция гIуцIизе. 2011 соналдаса нахъе байрамалда цIар хисун буго полициялъул хIалтIухъабазул къоян. Жакъасеб номералда, киналго полициялъул хIалтIухъабазда, жанисел ишазул органазул вет ераназда профессионалияб байрамги баркулаго, бокьун буго гьезие гьаризе хъизан-рукъалда сахлъиги баракатги, хIалтIулъ бергьенлъабиги гIумруялда парахалъиги. Биччанте дагьлъизе такъсирчилъи, цо къадаралъ бигьалъизе нужер гьабулеб хIалтIиги. 

Гъоркьехун кьолеб буго жанисел ишазул органазул ветеран, районцояз кидагосеб адабалда жиндир цIар рехсолев унго-унгояв милициялъул майор ХIасан ГIабдулаевасул районалъул ихтияр цIунулезул гIуцIабазул тарихалъул бицараб материал. 

10 ноябралъ т1олабго Россиялъул халкъалъ к1одо гьабула жанисел ишазул органал г1уц1араб къо.

Революция ккун г1емер заман иналде г1уц1ана милиция. Гьелда цере ч1арал масъалабиги рук1ана т1олго улкаялда т1ибит1ун бугеб хъачагълъиялде, ц1огьалде, ч1вадарухъанлъиялде данде рагъ гьаби.

Гьел масъалаби т1урай мурадалда 1920 соналъ Дагъистаналдаги, гьелдаго гьоркьоб нилъер районалдаги г1уц1ана милиция. Гьанибго бук1ана округалъул туснахъ ц1унулеб бак1ги. 

Къоабилел соназ нилъер район бук1ана Авар округалда гьоркьоб. Гьединлъидал нилъер милициялда ц1арги бук1ана «Авар округалъул милиция» абун. 

Округалъул милициялда гьоркьобе унаан ункъго участок: Хунзахъ, Харахьи, Бакълъухъ ва Гъойсубули. Гьел участкабазда гъорлъе унаан цебе наиблъиялде гъорлъе унел рук1арал Гумбет, Унсоколо, Къах1иб, Г1ахьвахъ районазул росаби.

1928 соналъул ноябралда Авар округги бихун г1уц1ана Хунзахъ район. Гьелдаса нахъе районалда г1уц1ана РО НКВД, 2012 соналдаса нахъе буго полиция. Дагъистаналда милиция г1уц1аралдаса нилъер районцоял х1алт1ана бат1и-бат1иял районазда, шагьаразда жавабиял ишазда. Кибго гьез бихьизабуна х1инкъи гьеч1олъи, бажари ва къох1ехьей.

Советияб власталъе г1оло къеркьолаго нилъер районцоязул 13 чиясе кьуна «Баг1араб Байрахъ» орден, доб заманалъул пачалихъалъул бищун т1адег1анаб даражаялъул шапакъат.

Милиция г1уц1аралдаса байбихьун нилъер ракьцояз г1ахьаллъи гьабуна Ват1анияб рагъулъ, Советияб пачалихъалъул ва халкъалъул буголъи ц1униялда гъорлъ, Дагъистан республикаялде т1аде к1анц1арал хъачагъал лъуг1изариялда гъорлъ ва кибго бихьизабуна бажаригун х1икъи гьеч1олъи.

Жанисел органазда х1алт1улаго Аллагьасул къадаралде щварал х1алт1ухъаби рак1алде щвезариялъул къо-8 ноябрь гьоркьоб ккун рехсезе бокьун буго т1ад къараб х1алт1и т1убалаго Ват1аналъеги халкъалъеги г1олон рух1 кьурал нилъер ракьцоял Хунзахъа Мирзоев Ах1мад - х1алт1улев вук1ана  Казбек районалда РОМалъул начальниклъун-1937 соналда ч1вана Дылималда;
- Хьиниса Къурамух1амадов Г1али - х1алт1улев вук1ана Къах1иб РОМалъул начальниклъун, ч1вана 1943 соналъ Гьолокь Гунащевасул банда кколаго;
- Ц1адаса Т1алх1атов Мух1амад - х1алт1улев вук1ана ГПНалъул инспекторлъун, ч1вана 1943 соналъ Шаури райотдел ц1унулаго;
- Гьамущиса милициялъул лейтенант Х1ажимурадов Мах1ач х1алт1улев вук1ана Хунзахъ РОВДялда участковыйлъун, ч1вана 1996 соналъ Чачаназулги Хасавюрталъулги г1орхъуда;
- К1ахъа милициялъул подполковник Мух1амадов Сахрудин х1алт1улев вук1ана МВДялъул УСБялда, ч1вана 2000 соналъ Чачаналда, мустах1икълъана Бихьинчилъиялъул орденалъе;
- Бакьагьеч1иса милициялъул сержант Насух1ов Мурад - х1алт1ана Унсоколо РОВДялда милиционерлъун, ч1вана 2001 соналъ Унсоколо районалда;
- Моч1охъа милициялъул старшина Х1ажимух1амадов Мух1амад - х1алт1ана Унсоколо РОВДялда милиционер-водительлъун, ч1вана 2005 соналъ Унсоколо районалда;
- Хунзахъ милициялъул прапорщик Ах1мадов Мирза - х1алт1ана ОМОН-2, ч1вана 2006 Унсоколо районалда. Мустах1икълъана Бихьинчилъиялъул орденалъе;
- Гъонохъа милициялъул капитан Сайгидов Мух1амад - х1алт1ана Кизляралъул РОВДялъул участковыйлъун, ч1вана 2010 соналъ Кизляр районалда.

Т1аде щвараб профессионалияб байрамги гьоркьоб ккун рак1алде щвезаризе бокьун буго жидер сиях1 нижехъе щварал, авар округалъул милиция г1уц1аралдаса нилъер районалъул отделалъе нухмалъи гьабурал гьалмагъзабазул. Хъвай-хъваг1ай босана 1925-1944 соназул приказал хъвалеб т1охьодаса.

Гьанир руго дида росу - ракь лъазе к1веч1ел гьалмагъзабиги. Нужеда гьел киса - щалали лъалеб батани, гьарула редакция гьоркьоб ккун нижеда лъазабеян.

Авар округалъул милиция:
Хунзахъа Атаев Г1абдулкъадир (1920-1926 сонал.)
Саг1идх1усейнов Мух1амадзагьид (01.09.1926-25.10.1927 сонал).
Хунзахъа Г1аликулов Мух1у (25.10.1927-25.01.1929 сонал).
Хунзахъа Дибирчуев Мух1амад (25.01.1929-03.10 1929 сонал).
Хунзахъа Х1ажиев Х1ашт1их (20.10.1929-11.01.1931 сонал).
Бакьагьеч1иса Саг1идов Нух1 (11.01.1931-06.07.1931 сонал).
Сугъралъа Фатаг1алиев Г1али (06.12.1931-02.05.1932 сонал).
Хунзахъа Сулейманов Къасум (02.05.1932-октябрь 1932 сонал).
Хунзахъа Хизроев Хизри (октябрь 1932-17 октябрь 1938 сонал).
Хунзахъа Гьит1инов Мух1у (17.10.1938-29.04.1939 сонал).
ДАССРалъул НКВДялъул Управлениялъул райотдел:
Дах1адаев Давуд (29.04.1939-25.08.1940 сонал). Росу-ракь лъач1о. 
Мах1амаев Х1ажи (06.09.1940-10.07.1941 сонал). Росу-ракь лъач1о. 
Сугъралъа Фатаг1алиев Г1али (сентябрь 1941-1949 сонал).
Байикьа Г1абдулат1ипов Г1амир (октябрь 1949-апрель 1950 сонал).
Юсупов Г1абдула (1950 сон). Росу-ракь лъач1о. 
Ц1адаса Х1амзатов Махсут1 (1953-1958 сонал). 
Кьохъа Х1айдаров Х1ажи (05.01.1959-30.09.1963 сонал).
Ц1адаса Х1амзатов Махсут1 (30.09.1963-1971 сонал).
Бакьагьеч1иса Баринов Г1али (01.09.1971-1979 сонал).
Гумбет районалъул Ингишиса Хайрулаев Мух1амад (1979-1987 сонал).
К1ахъа Мух1амадов Муслим (ноябрь 1987-21 октябрь 1996 сонал).
Г1ободаса Каримулаев Шамил (1996-2006 сонал).
Ц1адаса Г1абдулаев Х1асан (2006-2008 сонал).
Ц1адаса Г1алибегов Мух1амадг1арип (01.04.2008-30.11.2010 сонал).
Г1араниса Мух1амадов Мух1амад (2010-2011 сонал).
Хунзахъа Х1ашт1ихов Мух1амад (2011 сон).
Ц1адаса Султ1анов Гъайирбег (14.07.2011-28.02.2014 сонал).
Бакьагьеч1иса Т1айгибов Х1ажимурад (24.06.2014-15.07.2016 сонал).
Т1елекьа Мух1амадов Мух1амад (15.07.2016.-21.05. 2017 сонал). И.о. нач. РОВД. 
2017 соналъул 22 маялдаса нахъе жакъа къоялде щвезег1анги отделалъе нухмалъи гьабулеб буго полициялъул подполковник Г1ободаса Сайбулаев Мух1амадх1ажияс.

Жакъа къоялда районцоязул парахалъи ва х1инкъи гьеч1олъи ц1унулеб буго райотделалъул 77 х1алт1ухъанас.

Ахиралдаги бокьун буго баркизе т1аде щвараб байрам жанисел ишазул г1уц1абазул пенсионеразда, полициялъул х1алт1ухъабазда, гьезул хъизамазда. Хас гьабун баркизе бокьун буго исана 16 декабралъ Дагъистаналъул МВДялъул ветераназул организация г1уц1аралдаса т1убала 40 сон.
Гьарула киназего щулияб сахлъи, халатаб, парахатаб г1умру, ракълилаб зоб.

Дагъистаналъул ОВДялъул ва ВВ (жанисел аскаразул) ветераназул Советалъул Хунзахъ бугеб отделалъул председатель Хlасан Гlабдулаев.