Байрам байбихьана «ГIакаро» ансамблялъул васазул кьурдиялдасан. Берцинал кочIол рагIабазул баркиялдалъун гIодорчIей рагьана гьеб бачунел культураялъул управлениялъул начальник МахIач ХIасановас ва Дагъистаналъул культураялъул мустахIикъай артистка ГIайшат Тажудиновалъ. Цояздаса цоял берцинал рагIабаздалъун руччабазе къиматги кьун, гьезда байрамги баркун, кинабго лъикIабщинаб гьарарал кIалъаял гьаруна районалъул нухмалъулев ХIажияв Дарбишевас, прокурор Запир МухIамадовас, казначействоялъул нухмалъулев МухIамад ГьитIиновас, бетIерав врач МухIамад Мусаевас, финансовияб управлениялъул нухмалъулев ХIайдар ХIайдарбековас, гIемерал соназ учительлъи гьабулей йигей Роза Качаловалъ, № I7 аптекалъул заведующая Султану ГIамирхановалъ, Хунзахъ, ТIануси, Харахьи росабазул бегавулзабаз Хунзахъ росулъа ГъазагIилав МухIумаевас ва цогидазги. КечI-бакъанги, кьурди-хъатги гьечIеб байрам – байрам кколаро. Хасаб гвангъи базабун букIана цIар рагIарал эстрадаялъул «цIваби» байрамалде рачIиналъги. Сапият ИсмагIиловалъ, ПатIимат МухIамадовалъ, «Юг» группаялдаса ХIамид ГIабдулаевас ва нилъерго ПатIимат СултIановалъ, Чаран СултIанбеговас ахIарал кучIдуз чIаголъизабуна залго. ЦIакъго лъикI къабул гьаруна ГIайшат Насрулаевалъ щибаб столалде аскIое ун, гIодорчIаразе сайгъат гьарурал кучIдуз. Унго-унгояб махщел бихьизабуна культураялъул хIаракатчи, хореограф МухIамад Мусалаевас кьурдулаго цо квералъ къалиги ххенезебулаго цогидалъ гьеб кьабулаго рихьизарурал гьунараз. Жиде-жидер хIалтIи ракIбацIцIадго гьабулел, кIвахI-свак гьечIого мисалияб къагIидаялъ хIалтIулел руччаби районалъул бетIерас кIодо гьаруна ХIурматалъул грамотабаздалъун ва гIарцулал сайгъатаздалъун (гьезул сиях1 халатаб буго). Байрамалъул байбихьуда залалда гIодорчIаразухъе рикьарал билетаздасан тIобитIараб лотереялъги руччабазул ракIал рохизаруна. ЛъикIаб кеп-ихтилатги, аваданлъиги гьабун, разиго, сайгъат-саламалгун рикь-рикьана байрамалде рачIарал жидерго росабалъе. Жидер хIурмат гьабун байрам гIуцIаралъухъ гьенире рач1араз кIудияб баркала кьолеб букIана районалъул нухмалъулев ХI. Дарбишевасе, культураялъул хIалтIухъабазе ва цогидазе. Гьединал, гIадамазе рокьулел тадбирал хадубккунги гIемерлъаги. П. ГУНАШЕВА.
|