Г1ун бач1унеб г1елалъе рух1ияб тарбия кьеялде к1удияб к1вар
кьола Моч1охъ гьоркьохъеб школалда. Гьезул Ват1аналде бугеб рокьи щулалъизаби
мурадалда, хьвада-ч1вади, адаб-хъатир ва гьел гурел цойгидалги г1адамасулъ
бук1ине мустах1икъаб г1амал-хасият куцаялда хурхун гьарула г1емерал х1алт1аби.
Гьал къоязда школалъул ц1алдохъабаз к1одо гьабуна «Гьит1инав
фашистазда данде къеркьолев бах1арчиясул къо». Школалъул к1удияй пионервожатая
Нурмах1амадова Сакинатил нухмалъиялда гъоркь ц1алдохъаби лъик1 х1адурун ругоан
гьеб тадбиралде. Балагьаразе рек1ее г1уна Чупанилаева Наидаца, Г1абдурах1манова
Пат1иматица, Х1ажиева Хадижатица, Сайпулаева Камилаца, Меджидов Бадрудиница ва
Садрудинов Мух1умица рек1ехъе ц1аларал куч1дул, рихьизарурал инсценировкаби.
Ц1алдохъабаз ц1ар-ц1ар ккун рак1алде щвезаруна фашистазде данде къеркьарал
г1олохъанал бах1арзал: Леня Голиков, Валя Котик, Марат Казей, Олег Кошевой, Зоя
Космодемьянская ва гьел гурел цогидалги, г1ат1идго бицана гьезул бах1арчияб
къеркьеялъул х1акъалъулъ.
Гьеб тадбир ана г1уц1адго ва пайдаяб куцалда. Гьелъул
г1ахьалчаг1аз бихьизабуна Ват1аналдехун кинаб бербалагьи бук1ине кколебали,
нагагьлъун къо ккани, к1удияб ват1анияб рагъул г1исинал бах1арзазул мисалги
босун, гьеб ц1унизе х1адурал рук1ин.
М-х1 Халилбегов.
|
