Араб талат къоялъ районалъул администрациялъул киналго х1алт1ухъабигун г1уц1абазул нухмалъулелги г1ахьаллъун «Хунзахъ район» муниципалияб районалъул бет1ер Нурмух1амад Задиевас т1обит1ана г1ат1идаб данделъи.

Гьелда гьоркьор лъуна данделъиялда г1ахьаллъаралщиназул х1алт1ул иналъул, хадубккун гьабизеселъул ва г1адлу-низамалъул суалал. 

Бищун цебе районалъул нухмалъулес г1одор ч1аразул лъай-хъвай гьабуна г1агараб заманалда къуваталде лъугьине бугеб х1укмуялъулгун. Гьелда рекъон районалъул киналго хъулухъчаг1азе гьукъараб буго х1алт1уда рук1аго ва хъулухъалъулал ишал т1ураялъе Америкаялъул «Apple» маркаялъул телефоналгун техникиял алатал х1алт1изаризе. Цинги районалъул нухмалъулес к1вар буссинабуна жиде-жидеда т1адбухьинабураб мал-мулкалъул, ракьазул, транспорталъул налогал кьезе ккеялде, г1уц1абазулгун учреждениязул 2024 соналъе бюджетазул проектал х1адурун лъуг1изе ккеялде.

ОКСалъул нухмалъулев Саг1адула Батировасе т1адкъай кьуна ахирисеб щуго соналда жаниб районалда раралщинал социалиял объектазул отчет х1адуризе ва бач1унеб соналъ капиталияб ремонт гьабизе бугеб Коло ясли-ахалъул ва «Бак1алъулал инициативаби» программаялъул кумекалдалъун Хунзахъ базе бугеб паркалъул документация х1адуризе.

Гьединго данделъиялда гьоркьоб лъуна районалъул цо-цо школазда ц1алул учебникал г1олел гьеч1олъиялъул, гьел умумуз ричун росизе ккеялъул суалалги. 

Рихьизарич1ого теч1о лъуг1улеб бугеб соналда, Расулил 100-сонилаб юбилей к1одо гьабиялда лъик1 х1алт1арал гьалмагъзабиги. Гьедин, нужер рит1ухъал чукъби-ниж, газеталъул х1алт1ухъабазеги щвана районалъул бет1ерасул рахъалдасан рецц-бакъги баркалаги, шаг1ирасул юбилеялде къват1ибе биччараб байрамалъулаб газеталъухъ. Баркала нижер зах1матаб, лъиданиги бихьулареб, амма г1асрабаз ц1унун хут1изесеб х1алт1и бихьаралъухъ. 

Данделъиялъул ахиралда районалъул активалда цебе Н. Задиевас загьир гьабуна пикру, бач1унеб 2024 сон  машгьурав жамг1ияв ва политикияв х1аракатчи Шагьрудин Шамхаловасул лъаг1еллъун лъазабизе лъик1аб бук1иналъул. Гьелда т1ад киналгоги рекъана.
Ф. Мух1амадова.