Данделъиялда гIахьаллъи гьабуна районалъул бетIер, АТКялъул председатель НурмухIамад Задиевас, гьесул заместителаз, РФялъул МВДялъул Хунзахъ районалда бугеб отделалъул начальник МухIамадхIажи Сайбулаевас, прокурор Рамазан ГIумаровас, УФСБялъул нухмалъулев Заур МухIамадовас, диниял хIаракатчагIаз ва цогидазги.
НурмухIамад Задиевас гIатIидаб баян кьуна араб соналъ комиссиялъ гьабураб хIалтIул хIакъалъулъ. Гьесул рагIабазда рекъон араб соналъ районалда ккун гьечIо цониги терроризмалда хурхараб такъсир, бакIалъулаб тIалъиялда данде чIчIун цIикIкIараб къадар гIадамазул гIахьаллъарал акциял ва цогидабги бихха-хочи. Районалъул администрациялда цебе гIуцIун буго кидаго хIалтIулеб терроризмалъул идеологиялде данде къеркьеялъул хIалтIулаб къокъа. Мекъаб идеологиялде данде ва гьелда гъоркье ккарал яги ккезе рес бугел гIадамазулгун хIалтIи гьабиялъул мурадалда профилактикиял тадбирал тIоритIиялъул графикги тасдикъ гьабун буго. Къокъаялъул хIалтIул аслияб мурад ккола гьал хадур рехсарал рахъазда профилактикияб хIалтIи гьаби:
-адресалъулабгун профилактикияб хIалтIи.
-хасаб категориялъул хIалтIи гьаби.
-лъайкьеялъул гIуцIабазда профилактикияб хIалтIи тIобитIи.
ХIалтIулаб къокъаялъ гьабула хасаб категориялъул гIадамазул хъизамазулгун хIалтIи. Гьезулгун ва гIага-божаразулгун тIоритIула районалъул диниял хIаракатчагIиги гIахьаллъарал дандчIваял. Гьединабго хIалтIи гьабулеб буго терроризмалда хурхарал такъсиразухъ тамихIалде цIан рукIарал чагIазулгунги. ГIаммаб къагIидаялъ араб соналъ гьабун буго 25 профилактикияб гара-чIвари. Терроризмалъул профилактикиялда ва гьелдалъун ккезе бегьулеб зарал кIванагIан дагьлъизабиялъул мурадалда районалда къабул гьарун руго 7 нормативиябгун правовояб акт.
Тасдикъги гьарун гIумруялде рахъинарулел руго терроризмалъул профилактикаялда хурхарал 9 муниципалияб программа ва план:
Тасдикъ гьабун буго гIемерал гIадамал ракIарулел ва хIинкъи букIине бегьулел объектазул сияхI, гьенибе босун буго 86 объект. Гьезул комплексалъулаб хал-шал гьабизелъун гIуцIун буго районалъул АТКялда цебе хасаб ведомствабазда гьоркьосеб комиссия. Гьеб рахъалъан бищунго захIматаб оперативияб ахIвал-хIал бугеб ГьоцIалъ ва ГIорутIа росабалъ рана хIухьбахъиялъул паркал. «20I5-2020 соназда Дагъистан Республикаялда маданият цебетIезаби» абураб программаялда рекъон ГIорутIа культураялъул рокъоб гьабуна 200 чиясе бакI бугеб капиталияб ремонт.
20I9 соналда хал-шал гьабун буго 85 лъайкьеялъул объектазул. Гьел киналго руго сверун къарал, къасимехалда буго канлъи ва хIалтIулел руго экстренниял телефонал. Киналго лъайкьеялъул учреждениязе гьарун руго хIинкъи гьечIолъиялъул паспортал. Араб соналъ 68 объекталда лъуна видеокамераби.
Планалда рекъон 20I9-2023 соназда районалда гьабулеб бугеб хIалтIул бицана районалъул бетIерасул хIинкъи гьечIолъиялъул рахъалъ заместитель, АТКялъул секретарь ХIамид ГьитIиновас.
Данделъиялъул цогидал гIахьалчагIацаги хIалтIи лъикIлъизабиялда хурхун жидерго предложениял кьуна. Киназулго кIалъаязухъги гIенеккун комиссиялъ къабул гьаруна дандрекъон кколел хIукмабиги.
И. МУХIАМАДОВ.