 Риидалил каникулазул заманалда студентазда ва 30 соналъул ригьалде рахинч1ел
г1олилазда гьоркьор т1орит1улел
тадбираллъун ккола «Машук» «Селегер» г1адал федералияб к1варалъул лагеразда ч1ей гьабун,
гьезие х1ухьбахъи г1уц1и. Бук1инеселде
к1удияб гали т1амулеб проектлъун ккола нилъер районалда балеб бугеб
туристазулаб «Макьаст1а» кластер. Дагъистаналъул г1олилазул комитеталъул
х1аракаталдалъун исана Макьаст1аги г1уц1ун буго палаткаби ч1ван, г1олилазе
х1ухьбахъиялъе санаг1атаб лагерь
Гьал г1агарал къоязда районалъул администрациялъул бет1ер
Х1.Дарбишев т1аде рач1арал х1урматиял гьалбал: Халкъияб Собраниялъул г1олилазул
парламенталъул председатель Марина Мутаевагун, ДРялъул г1олилазул комитеталъул
ИАЦалъул директор Мухтар Г1амировгун ва ДГИИХалъул вакилзабигун щвана Макьаст1а
ругел студентазухъе, хал гьабуна гьезул
рук1а-рахъиналъухъ, ц1ехана къвариг1араб – тараб. Гьединго г1олилазда байрам
(Россиялъул г1олилазул къо – 27 июнь) баркизе ва нахъисеб къоялъ т1орит1изесел
тадбиразде гьел ах1изе ун рук1ана районалъул администрациялъул активги,
районалъул г1олилазул комитеталъул председатель Ш. Г1умаровги. Рак1алде
щвезабилин, гьаб нухалда Макьаст1е х1ухьбахъи гьабизе рит1ун руго
Дагъистаналъул Халкъияб
маг1ишаталъул институталъул (Нархоз)
ц1алулъгун общественнияб г1умруялъулъ х1аракатчилъи бихьизабурав 50 г1ан
студент. Гьезие къойил т1орит1улел руго лъай борхизабиялъулал лекциял, районалъул машгьурал
бак1азде экскурсиял, спортивиял ва рек1елгъеялъулал тадбирал.
Студенталгун дандч1вазе, гьезие лекциял т1орит1изе
районалде, къо гьоркьоб бахъун г1адин
рач1унел руго г1олилазул политикаялда,
жамг1ияталда ва пачалихъияб кверщалидагун г1елму-лъаялда машгьурлъарал
дагъистаниял.
Районалъул администрациялъул
вакилзабигун ва республикаялдаса рач1арал гьалбадерилгун т1обит1араб
«гургинал столалда» г1олилаз баркала кьолеб бук1ана жидеего г1уц1ун бугеб х1ухьбахъиялъухъги,
гьабулеб бугеб бербалагьиялъухъги. Цинги гьезул рик1к1ен г1емерал суалазе
жавабалги кьуна т1аде рач1араз.
«Ракъарал студентал» рук1аниги, гьоболлъи гьабич1ого риччач1о нархозалъулаз
гьалбал. Г1аммаб къаг1идаялъ босани, дандч1вай ана к1иябго рахъалъе пайдаяб,
гьудуллъиялъулаб ах1вал-х1алалда. Хадубккунги Макьаст1е т1адруссине щулияб нигаталда жиде-жидер районаздегун
шагьаразде т1ад руссана студентал гьал г1агарал къоязда.
Ф. Мух1амадова
|
