Районалъул
экономикаялъул аслияб бут1а – г1и-боц1ухъанлъи цебе т1еялъе квер бакъулел
хурухъабазе, т1олалго зах1матчаг1азего г1ахьалаб байрамлъун лъугьун буго апрелалъул ахиралда яги маялъул авалалда
Хизроевасул ц1аралда бугеб колхозалъул
Языковка гъутаналда т1обит1улеб
тадбир – «Г1и-боц1ухъанасул къо». Киг1анго ихдалил х1алт1аби т1ад рараб,
х1алуцараб заман бук1аниги, киназулго г1ахьллъигун уна гьеб.
Сулахъ г1урул
раг1алда бугеб рохьил рац1алъуда 11 маялъул радалго байбихьана гьенир
г1ахьаллъизе рач1арал колхозазул вакилзабаз жиде-жидер къаял лъезе. Рохьобго
т1ибит1араб кеч1-бакъан, бак1-бак1алда кьурди-хъат, унго-унголъунги
байрамалъулаб ах1вал-х1ал бук1ана сверухълъиялда.
Рохалилаб данделъиги рагьун, киназдаго байрам баркараб к1алъай гьабуна районалъул бет1ер
Дарбишев Х1ажияс. Жиндирго к1алъаялда гьес т1адч1ей гьабуна араб соналъ
г1и-боц1ухъанлъиялда ккарал х1асилазда. – 2013 соналъул авалалде маг1ишатазда буго 4506
ч1ег1ерх1айван, 57913 г1и-ц1ани, гьездасанги 2239 г1ака, 39788 чахъу ккола.
Араб соналъ маг1ишатазда г1езабун буго 98723 центнер гьанал, 36155 центнер
рахьдал, лъаг1елалъ гьоркьохъеб
х1асилалда цо-цо г1акдадаса беч1араб рахь 1700 килограммалде бахуна, г1иядаса къунц1ун буго 1186 центнер
квасул. Араб хасалоде г1и-боц1уе х1адур гьабун бук1ана 16227 тонна харил, 398
тонна соломадул, 200 тонна силосалъул ва 4115 тонна сенажалъул. Гьеб ккола нужер к1вах1-свак
лъалареб рак1бац1адаб зах1маталъул х1асил, хадубккунги жеги ч1ах1иял бергьенлъаби,
х1алт1улъ цебет1ей ва щивасул рокъоб талих1-рохел нужее х1урматиял, - ан абуна
районалъул нухмалъулес жиндирго к1алъаялда.
Росдал маг1ишаталъул х1алт1ухъабазда байрамги баркизе,
гьелги к1одо гьаризе рохалилаб
тадбиралда г1ахьаллъана нилъер районцоял, Дагъистан республикаялъул росдал
маг1ишаталъул министрасул заместитель Г1абдуразакъов Сайгидг1али, росдал
маг1ишаталъул министерствалъул тайпадулаб г1и-боц1ухъанлъиялъул отделалъул
начальникасул заместитель Гъазиев Мухтар. Г1и-боц1ухъабазул къоялда г1ахьаллъана
Кизляр районалъул «Вперед» СПКялъул председатель С. Барановасул
бет1ерлъиялда колхозчаг1азул къокъаги.
Данделъаразда байрамги баркун к1алъазе вахъарав С.
Г1абдуразакъовас бицана жакъа къоялде
республикаялъул росдал маг1ишаталда бугеб ах1вал-х1алалъул, рихьизаруна
ругел церет1еял, т1адч1ей гьабуна г1унгут1абазда. Баркиялъулал к1алъаял гьаруна
Гъазиев Мухтарица, Кизляралъулазул вакилас ва
цогидазги. Г1аммал маг1ишатазда бугеб ах1вал-х1алалъул, г1олел-г1оларел
рахъазул бицун к1алъана цо-цо маг1ишатазул нухмалъулел, жалго г1и-боц1ухъаби,
хур-хералъул х1алт1ухъаби.
Районалъул г1аммаб маг1ишат цебет1езабиялъулъ х1аракат
бахъарал, х1алт1улъ лъик1ал х1асилал ругел зах1матчаг1азул к1удиябго къокъа
бугоан республикаялъул росдал
маг1ишаталъул министерствалъ ва райадминистрациялъ к1одо гьарун. Министрасул
ц1аралдасан байрамги баркун микьго зах1маталъул цевехъанасе Дагъистан
республикаялъул росдал маг1ишаталъул министерствалъул дипломал, Х1урматиял грамотаби кьуна М.
Гъазиевасги С. Г1абдуразакъовасги. Райадминистрациялъул Х1урматиял грамотаби, г1арцулал сайгъатал
кьуна 12 цевехъанасе Х1. Дарбишевасги. Г1емерго гьеч1ониги г1арцудалъун к1одо
гьаруразул къадар 90 чиясдасаги ана. Жиде-жидер церехъаби к1одо гьарун
конвертал кьолел ругоан цо-цо колхозазул нухмалъулезги.
Данделъиялда араб соналъул х1асилазда рекъон т1оцебесеб бак1
«Гьац1алухъ» СПКялъе кьуна. Колхоз к1одо гьабуна росдал маг1ишаталъул
министерствалъул дипломалдалъун, гьелъулго ва райадминистрациялъул Х1урматалъул грамотабаздалъун, кьуна 20000 гъурущги.
К1иабилеб бак1 ккураблъун рик1к1ана Т1ануси росдал «Машгьурал г1адамал» колхоз.
Гьебги к1одо гьабуна диплом – грамотабаздалъунги 15 азарго гъурущалъги. Лъабабилеб
бак1 бикьана Хунзахъ Хизроевасул ва
Бакьагьеч1и Дудар Г1алиевичасул ц1аразда ругел маг1ишатазда гьоркьоб. Гьезиеги
щвана грамотабиги г1арацги.
Ахиралде щвана байрамалъулаб тадбир. Районалъул культураялъул х1аракатчаг1аз щибаб
колхозалъул рещт1аде щун, зах1матчаг1азе куч1дул ах1и, кьурди-хъат гьаби,
церехъабазул ц1аралда реццалъул раг1аби аби, зах1маталъулав чи к1одо гьави,
квана-гьекъей бук1ана тадбиралъул
к1иабилеб бут1а. Халатаб хасалил бак1аб х1алт1удаса хадуб лъик1аб х1ухьбахъиги
щун руссана Языковкаялдаса г1и-боц1ухъаби жиде-жидер гъутабазде.
|