Щивав инсанасул
бук1уна дунялалда толеб жиндирго хассаб нух, жиндирго хат1, махщел,
гьунар, ц1ар, гьабураб лъик1аб г1амалалъ г1адамазул рек1елъа унареб,
к1очонареб хасият-г1амал.
Хвел гьеч1еб лъалк1 тана росуцоязулги, г1ага-божаразулги
рек1елъ Ч1ондокь росулъа Гьит1инамух1амадил Г1абдулат1ипицаги.
Г1абдулат1ип вук1ана граждан рагъул г1ахьалчи, гьев вагъана
Муслим Атаевасул нухмалъиялда гъоркь бугеб отрядалда.
Г1ахьаллъана Аксаялда, Ц1унт1а хъачагъазда данде гьарулел рагъазулъ. Бицунаан Ц1унт1а хъачагъазда хадув вортулаго гьороса гъоркье к1анц1ун жиндирго
чехь бихъиялъул, ракъул х1ал бергьиндал цадахъ рук1арал гьалмагъзабазда
цадахъ къишни-къулги хъирщун, картошкоялдаса бахъараб хъал кванаялъулги. Г1абдулат1ипица абулаан долдаса нахъе жинца картошка хъалгун цадахъ
квананилан.
Дида лъай бижаралдаса нахъеги гьес картошка хъалгун
цадахъ кваналаан. Г1абдулат1ип дида
цеве ч1ола щибаб Бергьенлъиялъул къо к1одо гьабулеб Г1алаг1арт майданалда рет1ун медаль-килас
бараб кительгун, галифе-т1ажугун, рет1ун ц1вакарал чакмабигун, лъун бухари т1агъургун чодаги рек1ун парадалда
цеве-вач1унев вук1араб куц. Г1абдулат1ипил кумек-квербакъиялъул бицен лъуг1уларо
гьесул росуцоязулги,
лъалел-хъвалезулги жакъа къоялдаги. Гьев х1алимав инсанас бажарараб кумек
гьабиялъул бицуна Ват1анияб рагъул заманаялъги, рагъ лъуг1ун хадуб рагъалъ
бесдал гьаруразги, эбел-эмен гьеч1ого хут1ун хьихьаразги дол раг\къул соназ.
Г1абдулат1ипилги гьесул лъади Г1ашатилги бук1ана гьобол-гьудул г1емераб
к1иго ясги ки1го васги ругеб
аваданаб хъизан, васазул к1удияв -
Исмаг1илица кьуна Ват1аналъе рух1, гьев рагъдаса вуссинч1о. Росу Чачаналде гочинабидалги гьезул рукъалъул
нуц1биги, рукъалъул бет1ергьабазул рак1алги кидаго рагьарал рук1ана гьоболасе.
Г1абдулат1ипил яс, дир эбел Пат1иматица бицунаан Чачаналде авар театр бач1ин жидее к1удияб рохел
бук1анилан, театралъул артистал жидеца лъихъего риччалароанилан. Гъираялда
бицунаан Мах1муд Г1абдулхаликъовасул, Пат1имат Хизроевалъул, Сидрат
Меджидовалъул. Г1абдулат1ипил бук1ана жиндирго
лъет1а гьобо. Гьабихъе г1ат1-ролъ, хьон хенезе рач1унаан
мадугьалихъ ругел росабалъа г1адамалги. Гьесул квердаса борч1араб
махщел бук1инч1о: гьабулаан ц1улал
устарлъи, эхетулаан къадал, рек1к1улаан росдалго руччабазул
хъандираби. Бицен буго Г1абдулат1ипил эмен Гьит1инамух1амадги магъилъе унеб нухда рачги
ч1ван хъандираби рек1к1улев аук1унаанилан. Г1абдулат1ипица жиндирго
жигарчилъиялда бана росулъ къулг1а, кумекалъе жиндирго яц Зубаржатил рос
Сайпудинги вачун. Гьажеги гьеб къулг1аялда росдал г1адамаз абула
Г1адудадал иццилан. Гьес махражалда ц1алулаан къуръан, ц1акъ берцинго
хъвалаан г1араб мац1алъ. Гьесул бук1ана
Къах1иса Х1асан-устарас кьураб вирдги,
чурулаан жаназаги, т1уралаан киналго хвел букъиялъул т1адал ишалги. Гьебго
мурад гьес т1убалаан мадугьалихъ росабалъ къварилъи кканиги. Рек1ел
сахаватлъиялъги, г1адамазе жиндаса бач1араб кумек гьабиялъги, Аллагь г1емер рехсеялъги батила
Т1адег1анас гьесие халатаб, хьараб г1умруги кьураб – гьев хвана ункъоялда ункъо сонил ригьалда. Хвелалде
анц1го къоялъ цебе гьев вач1ана жиндирго
г1ат1и-ракьалда ругел лъималазде щвезе. Гьеб бук1ун буго гьесул лъималазулгун,
г1ага-божаразулгунги къа-лъик1 гьабизе бухьараб ахирисеб сапар ва гьениса нахъвуссун г1агараб Ч1ондокье щун нахъисеб сордоялъго абадияб
рокъове т1овит1ана гьев. Х1ал
Алжаналъубе ккун батаги гьесулги нилъер
киназулго умумузул. Амин.
Расулова Рукъигат
|
