Нилъер гьайбатаб ракь раг1араб буго унго-унгояб берцинаб т1абиг1аталъул рорхатал  муг1руздалъунги, г1ат1идал лъараздалъунги гуребги, ц1ар раг1арал спортсменаздалъунги, к1удиял  поэтаздалъунги. Гьезда гьоркьой йиго дунялалдаго ц1ар раг1арай,  жиндир поэзия хвел гьеч1еб реццалъеги, ц1аралъеги мустах1икълъарай Дагъистаналъул халкъияй поэтесса Фазу Г1алиева. Гьелъ жиндирго бут1а лъуна дунялалъулго поэзиялдаги.

Гьал г1агарал къоязда нилъеца к1одо гьабуна Фазу Г1алиевалъул 80 сонилаб юбилей. Гьеб мажлисалда г1ахьаллъи гьабуна ДРялъул Президент Мух1амадсалам Мух1амадовас, ДРялъул халкъияб  Собраниялъул Председатель  Мух1амад-Султ1ан Мух1амадовас, ДРялъул Х1укуматалъул Председатель Мух1амад Г1абдулаевас, ДРялъул  Госсекретарь Такибат Мах1мудовалъ Президентасул администрациялъул ва ДРялъул Х1укуматалъул нухмалъулев Х1асан Идрисовас, Госдумаялъул ва ДРялъул  Халкъияб Собраниялъул депутатаз, республикаялъул министерствабазул ва ведомствабазул, творческияб интеллигенциялъул нухмалъулез.

Юбилеялъулаб  вечер  рагьулелъул, ДРялъул культураялъул министр Зумруд Сулеймановалъ культураялъул х1алт1ухъабазул, республикаялъул искусствалъул вакилзабазул ц1аралдасан баркана Фазу Х1амзатовнаялда юбилей ва гьарана кинабго лъик1абщинаб. Жакъа, - ян абуна гьелъ, - нилъер  хирияй Фазу Х1амзатовнаялъул к1удияб къимат ва адаб-х1урмат гьаби гуребги, нилъеца цоги нухалдаги  бихьизабулеб буго Ф. Г1алиевалъ нилъер рух1ияб ва культурияб бечелъиялъулъ лъураб багьа гьабун бажаруларебг1ан к1удияб бут1а. Бащадаб г1асруялдасаги ц1ик1к1араб заманалда машгьураб буго халкъияй поэтессаялъул ц1ар г1иц1го нилъер республикаялда гуребги  улка тун  къват1ибехунги. Фазу Г1алиевалъул асаразе цо нухалда гуро улкаялда мустах1икъаб къимат  кьураб. Нилъер улкаялда гуребги,  гьей дунялалдаго къабул гьаюла жидерго поэт г1адин. Фазу Х1амзатовна ккола Россиялъул  г1емермиллатазулаб литератураялъул бищунго гвангъараб ц1валъун.

Хадуб  юбиляралдехун йиссун культураялъул министралъ абуна: «Фазу Х1амзатовна, Дур творчествалъулъ буго ч1агояб миллияб сипат-сурат, пикрабазул рит1ухълъи, хъварал мухъазул маг1на буголъи ва бег1ерлъи, Дуего  хасиятаб бечедаб мац1, хъваялъул  къаг1ида. Гьал къоязда г1ат1идго к1одо гьабулеб буго Дур юбилей. Гьелда хурхун кисса-кибго  т1орит1ана г1емерал тадбирал, конференциял, дандч1ваял. Жакъа гьаб залалде рак1арун руго Дур бищунго лъик1ал гьудул-гьалмагъзаби ва Дур  махщалил къимат гьабулел ц1алдолел. Къабул гьаре гьел киназулго баркиял». Сценаялде вахана ДРялъул Президент Мух1амадсалам Мух1амадов.

«Жакъа, - ян абуна республикаялъул бет1ерас, нилъ данделъун руго  х1урматияб  къаг1идаялда муг1рузул улкаялъул машгьурай ч1ужуг1аданалъул, Дагъистаналъул халкъияй поэтессаялъул 80  сонилаб юбилей к1одо гьабизе. Фазу Х1амзатовнаялъ халкъалъе гьабураб рак1 бац1ц1адаб хъулухъалъе кьун  руго  Россиялъул Федерациялъул  ва Дагъистан Республикаялъул пачалихъиял шапакъатал. Гьей ккола г1емерал республикаялъул, Россиялъул ва халкъазда гьоркьосел  премиязул лауреат. Фазу Х1амзатовнаялъул юбилей  к1одо гьаби – гьеб ккола республикаялъул культурияб ва жамг1ияб  г1умруялъулъ гуребги, т1олабго улкаялдаго к1вар бугеб лъугьа-бахъинлъун. Гьелъги батила, нилъехъе телеграммаби рач1унел руго улкаялъул бат1и-бат1иял бок1наздасан. РФялъул Федерациялъул Советалъул  Председатель Валентина  Ивановна Матвиенкоца хъвалеб буго: «Х1урматияй Фазу Х1амзатовна, къабул гьаре юбилеялда хурхун рак1-рак1алъулаб баркиял. Мун ккола машгьурай  жамг1ияй ва политияй х1аракат ч1ужу, унго-унгояй поэтесса. Г1агараб Дагъистаналъул  х1акъалъулъ хъварал  церет1урал асаразул автор х1исабалда, Дуца к1удияб бут1а лъуна миллияб адабият  цебет1езабиялъулъ, Ват1аналъул лъик1ал культуриял къаг1идаби ва г1адатал  ц1униялъулъ ва гьел г1емер гьариялъулъ. Дагъистан Республикаялъул руччабазул Союзалда, «Маг1арулай»  журналалда х1алт1улелъул, Дур рахъи бугеб х1алт1иялъ эбеллъи  ва  лъимерлъи ц1униялъе, г1олохъанаб г1елалъе патриотикияб ва рух1ияб тарбия кьеялъе, рекъел ва миллатазда гьоркьоб цолъи щула  гьабиялъе гьабулеб  х1алт1и мустах1икъаб буго бищунго т1адег1анаб адаб-х1урматалъе. Дуца г1емераб х1алт1и гьабулеб буго г1олохъанаб г1елалъе рух1ияб тарбия кьеялъе, обществалда  руччабазул гражданлъиялъулаб х1аракатчилъи  борхизабиялъе, гьезул пикру г1ат1ид гьабиялъе хъизанал ц1униялъе, гьелъул г1адатал, къадру-къимат буголъи социалиял ихтиярал ц1униялъе.

Киналго мун лъалез, къимат гьабула Дур рух1ияб сахаватлъиялъе, ккараб бак1алда ятизе, г1адамазе Дуца гьабулеб  кумекалъе.

Гьарула Дуе ва дур г1агарлъиялъе щулияб сахлъи, талих1 ва икъбал».

Х1урматиял гьудулзаби, дунги жувалев вуго гьел  баркиязулъе. Дирго ва т1олабго дагъистаниязул, Дур махщалие мук1урлъулел г1емерал  г1адамазул  ц1аралдасан изну кье, баркизе х1урматияй Фазу Х1амзатовна, Дур юбилей, загьир  гьабизе  рак1-рак1алъулаб баркала нилъер республикаялъул общественныяб г1умру, Дагъистаналъул культура цебет1езабиялъе Дуца лъолеб к1удияб  бут1аялъе г1оло.

Дие гьединго бокьун буго нилъер гьалбадерие баркала кьезе нилъер  мажлисалда г1ахьаллъи  гьабулеб буго  хъвадарухъабазул организациязул нухмалъулез, Москваялдаса, Ставрополалъул краялдаса, Чачаналдаса, Ингушетиялдаса. Кабардино-Балкариялдаса делегацияз. Нуж нижехъе рач1ин нижеца рик1к1уна Фазу Х1амзатовнаялъул  нужеца ц1ик1к1араб адаб-х1урмат гьабулеб  бук1иналъун, регионазда  гьоркьосел культуриял бухьенал, нилъер г1емермиллатазулаб улкаялъул  халкъазул гьудуллъи щула гьабиялъе т1амулеб  к1вар бугеб галилъун. Фазу Х1амзатовна ккола  улкаялъул  т1оцеесей литератор, жеги 36 сонил г1умруялдаго халкъияй поэтессаялъул ц1ар щварай, Дагъистаналда т1оцебе гьелъие щвана «Дагъистан Республикаялда цебе гьабураб хъулухъалъе г1оло»,- ян  абураб орден. Гьединго Россиялъул Федерациялъул бищунго т1адег1анаб шапакъат – Святой Апостол Андрей Первозванныясул орден, жибги Россиялъул к1одолъиялъе, реццалъе, т1егьазабиялъе г1оло т1ок1борч1унги гьабураб хъулухъалъе г1оло г1иц1го машгьурал пачалихъиял ва жамг1иял хъулухъчаг1азе гурого кьолареб, гьелъие т1оцебе Дагъистаналда щвана «Гордость России» абураб т1адег1анаб шапакъатги.

Т1убараб лъаг1алицаго Дагъистаналъул районазда ва шагьаразда унел рук1ана юбилеялъулал  тадбирал – ц1алдолезул ва г1елмиял конференциял, поэзиялъул вечерал, дандч1ваял, школазда Фазу Х1амзатовнаялъул  творчествоялъе къимат кьолел дарсал Москваялда литераторазул Централияб рокъоб т1обит1ана Россиялъул церет1урал политикал, хъвадарухъаби, поэтал, критикал, журналистал, дагъистаниял, Фазу Г1алиеваялъул гьунаралъул къимат гьабулел  данделъараб юбилеялъулаб вечер.

«Фазу Х1амзатовна, - ян абуна хадубги Мух1амадсалам Мух1амадовас, - йокьула ва лъала гвангъарай поэт, жиндиего хасиятаб хъваялъул хъвадарухъан, публицист, гражданин , республикаялъул патриот х1исабалда. Гьелъул асарал ц1алулезул къадар нилъер улкаялда гуребги гьеб бахун къват1ибехунги г1емераб буго. Ф. Г1алиевалъул т1ахьал  рахъула маг1арул ва г1урус мац1азда, гьезул перевод гьабун буго  дунялалъул 70 бат1ияб мац1алде – ингилис, немец, франг, испан, поляк, чеш, япон, ва  цогидалги. Фазу Г1алиевалъул  машгьурлъиялде нух бигьаго щвараб гьеч1о. Гьей цебе лъураб мурад  т1убазабич1ого ч1оларей, рух1ияб рахъалъ къуватай г1адан йик1иналъ к1вана гьелда гьединаб борхалъиялде яхине. Гьединай йиго Фазу Х1амзатовна – гьелъул гьунаргун ва х1алт1изе бажаригун, мух1канаб къвак1игун ва г1умру бокьигун, г1умруялдехун бугеб таваккалаб, рух1алда барахщич1еб ва бихьинчияб балагьигун.

Фазу Г1алиевалъул ц1аралда бараб буго Ват1анияб литератураялъул гвангъараб тарих. Жиндирго т1убараб  г1умру гьелъ кьуна Дагъистаналъул литератураялъе хъулухъ гьабиялъе. Гьелъул пероялъукьан арал руго анц1-анц1 т1ахьал, нус-нус журналалъул ва газеталъул макъалаби, жиделъ нилъер ракьалъул берцинлъи ва к1одолъи, миллияб хасият, г1адатазул бечелъи, нилъер халкъги, йижараб росу-ракьги г1орхъи тун бокьи бихьизабулел.

Фазу Х1амзатовнаялъ жиндирго  асараздалъун раг1изабуна Дагъистан, ч1ужуг1адан – маг1арулай, г1акъилай ва т1алаб ц1ик1к1арай эбел, нилъер рукъалъул гъансито ц1унулей зах1матч1ужу.

Фазу Г1алиевалъул юбилеялде х1адурулелъул дица регана гьелъул т1ахьазул т1амчал ва цойги нухалдаги  якъинлъана нилъер г1адамазул г1амал-хасият,  дагъистаниязул культуриял бечелъаби рич1ч1иялъе гьелъ гьабунщинаб х1алт1и.

Баркиялъулал к1алъаял  гьаруна ДРялъул хъвадарухъабазул Союзалъул председатель Мух1амад Ах1мадовас, «Московский литератор» еженедельникалъул бет1ерав редактор  Иван  Голубничияс, Чачан Республикаялъул халкъияв хъвадарухъан, Россиялъул Федерациялъул Пачалихъияб премиялъул лауреат Канта  Ибрагьимовас, РФялъул Перзидентасда цеве вугев ДРялъул кидагосев вакил Х1ажи Мах1ачевас, районалъул  администрациялъул бет1ер Х1ажияв Дарбишевас ва гьел гурелги г1емерал цогидазги.

 Россиялъул хъвадарухъабазул  Союзалъул шапакъатазул комиссиялъул х1укмуялдалъун Фазу Х1амзатовна Г1алиевалъе кьуна Михаил Лермантовасул орден ва «Нилъер заманаялъул Бах1арчи» абураб  литературиябгин жамг1ияб премиялъул диплом.

К1алъазе яхъарай Фазу Х1амзатовнаялъ  рак1-рак1алъулаб баркала кьуна  жиндир х1акъалъулъ абурал лъик1ал раг1абазе г1оло киналго к1алъазе рахъаразе, жий к1одо гьаюн юбилеялде рач1аразе. Гьелъ ц1алана жиндирго куч1дулги. Вечер лъуг1ана искусствалъул  махщелчаг1азул к1удияб концерталдалъун.

Н. Г1алиева