28 марталда Хунзахъ Ш. Шамхаловасул цlаралда бугеб культураялъул кlалгlаялда тlобитlана районалъул школлъималазул эбел-инсулгун гlатlидаб собрание. Гьелда гlахьаллъи гьабуна районалъул нухмалъиялъ, лъай кьеялъул отделалъул начальник Патlимат Хlамзатовалъ, ихтиярал цlунулел идарабазул вакилзабаз, школазул директорзабаз, учительзабаз ва цогидазги.

Данделъиялда гьоркьор лъурал аслиял суалаздасан рукlана тlаде щолеб бугеб ЕГЭ ва ОГЭялде хlадурлъи, лъималазул цlалуде ва тарбия кьеялде кlвар цlикlкlинабизе ккей ва цогидалги жакъа районалъул льай кьеялъул бутlаялда цере чlарал масъалабазул бицин. Киназего саламги кьун данделъи рагьана районалъул бетlер Нурмухlамад Задиевас. “Жакъа киназдаго лъала нилъер улкаялъул хlинкъи гьечlолъи цlунун Украинаялда хасаб операция унеб букlин. Амма нилъеда гъорлъ камулел гьечlо гьелъул магlна бичlчlичlого, гlахьучlал рицунел чагlиги. Гьединлъидал жакъасеб ахlвал-хlалалда кlудияб кlвар буго школазда лъималазулгун бичlчlикьеялъулаб хlалтlи тlобитlиялъулги. Нилъер эбел-инсуе жидерго лъимал тlубанго къваригlун гьечlин абуниги мекъи ккеларо. Гьале жакъасеб данделъиялдеги цlакъ дагьаб гурони къадар эбел-инсул рачlун гьечlо. Гьездасанги гlемерисел улбул руго. 30-40 соналъ цебе букlараб гlадинаб къагlида гьечlо жакъа, щиб ишалде руссаниги гьаб заманалда къваригlунеб буго гъваридаб лъай. Амма цохlо лъай щунги гlоларо, цадахъго букlине ккола тарбия кьеялъул ва гlаданлъиялъул рахъги. Лъагlалие 35 млн гъурущги тlад хвезабун хlалтlулел руго районалда спортивиял школал, нилъер лъималазе тренировкаби кьезе рукlине. Амма гlемерисел умумул руго жеги цониги нухалъ жиндирго лъимер сунде буссун бугебали халгьабизе спортзалалде рачlинчlел. Метер гьез цониги къваригlел гьечlеб иш гьабун батани, гьеб мехалда лъугьуна гlайибиял ралагьизе. Гlайиб гlунтlизабула учительзабазде, тренеразде, киназдего. Гlицlго жидедего хутlизегlан. Къаси сагlат 10 тlубайдал рокъобе бачlунареб лъимер киб бугебали цlехоларел эбел-инсул пайда щиб? Киназдаго лъала администрациялъ, учительзабаз ва цогидазги щиб гьабизе кколебали. Амма жидедаго тlадаб жо лъиданиги лъалеб гьечlо. Жамагlаталда гlадлунизам лъугьине ккани, бищун цебе нилъедасанго байбихьизе ккола”, - ян абуна гьес.

“Жакъа гьанир данделъаразда бичlчlизе ккола нилъер мурад гlаммаб букlин. Киназдаго бихьулеб буго нилъер улкаялъе кигlан цlакъ гъваридаб лъаялъул ва камилаб гlакълуялъул специалистал хlажат ругелали. Гьединал махщелчагlи гlезари буго нилъер киназулго мурад”, - ян абуна лъай кьеялъул отделалъул начальник Патlимат Хlамзатовалъ.

Гьединго гьелъ бицана ахираб заманалда республикаялда тlоритlарал конкурсазда районалъул цlалдохъабаз гьабураб гlахьаллъиялъул ва ккарал лъикlал хlасилазул. Бицен ккана цlалдохъаби ЕГЭ ва ОГЭ кьезе хlадурлъиялъулги. Исана тlоцебесеб нухалда ОГЭ тlобитlизе рагlула видеокамерабазда гъоркь. Гьединлъидал, гьелде лъимал хlадуризе рукlине, дагьаб цебегlан районалда тlобитlун буго хlалбихьиялъул ОГЭ. Амма хlасилал расги лъикlал ккун гьечlо. Экзамен кьурал 239 цlалдохъабазул гlицlго 3 чиясе ккун буго щуйилаб къимат, ункъила ккун буго 30 цlалдохъанасе, лъабила къиматалда кьун буго 82 чияс, хутlанщиназ росун руго кlийилал. Цlалул сон лъугlизе кlиго моцl хутlараб заманалда гьединаб ахlвал-хlал букlине бегьулеб жо гурилан абуна Патlимат Хlадисовнаялъ. Экзаменазул заман тlаде щвелалде сордо-къо биххун хlадурунги гьеб ахlвалхlал хисизабизе кколилан лъазеги гьабуна. Гlовул гlужде рахинчlел лъималазда хурхун районалда бугеб ахlвал-хlалалъул бицана РФялъул Хунзахъ районалъул ОМВДялъул ООПУлъулгун ПДНалъул начальник Гlабдулкъадиров Муслимица. Гьесул баяназда рекъон 2022 сон байбихьаралда нахъе районалда профилактикияб учеталде босун буго цо лъимер ва цо хъизан. Балугълъичlел лъималаз такъсирал гьаричlого рукlине профилактика гьабиялъул мурадалда, къаси сагlат 10 тlубаралдаса радал 6 тlубазегlан, цадахъ чlахlиялги гьечlого, парказда, къватlахъ, тукабазда ва цогидалги жамгlиял бакlазде гьел риччангутlиялъе хlалтlи гьабулеб буго ихтиярал цlуниялъул идарабаз. Гьединаб профилактикияб хlалтlи гьабулаго тlатинабун буго лъабго лъимер. Тlадаб къагlидаялда жидерго лъималазе тарбия кьолеб батичlого, административияб жавабчилъиялде цlана 8 родитель. Полициялъул райотделалъул хlалтlухъабаз чlечlого тlобитlулеб буго цlалулаб процессалъ гъорлъе рачинчlел ва гlилла гьечlого, зама-заманалдасан дарсал гьоркьор риччалел ругел лъимал загьир гьариялъул мурадалда хасаб хlалтlи.

Гьединго школазда тlоритlулел руго учительзабазулгун ва цlалдохъабазулгун дандчlваялги. Жиндирго кlалъаялда районалъул рагъулав комиссар Шамил Мухlамадовас бицана 1 апрелалда ихдалил призыв байбихьизе букlиналъул. Гьенире рачарал гlолохъаби Украинаялда унеб бугеб хасаб операциялда гlахьаллъи гьабизе ритlизе гьечlилан, эбел-инсул ракl гlодобе биччазабуна гьес. Данделъиялъул ахиралда жидерго суалал кьуна эбелинсуцаги.

И. МУХIАМАДОВ