14 ноябралда райцентралда бугеб маданияталъул кlалгlаялда тlобитlана машгьурав политикиявгун жамгlияв хlаракатчи Шагьрудин Шамхалов гьавуралдаса 110 сон тlубай. Гьеб тадбиралдалъун къалеб букlана исана районалда Шамхаловасул сонлъун лъазабураб лъагlел. 

Тадбир байбихьилелде минаялъул жанахlалъуб гlуцlун букlана Шамхаловасул суратазул ва докуметазул экспозиция. Гьелдаса хадуб юихьизабуна Шагьрудинил хlакъалъулъ бахъараб документалияб фильмги.

“Жакъа нилъеца кlодо гьабулеб буго нилъер машгьурав ракьцояв гьавуралдаса 110 сон тlубай. Районалъул бетlерасул хlукмуялдалъун 2024 сон муниципалитеталда лъазабун букlана Шагьрудин Шамхаловасул сонлъун. Ниж - гьесул ракьцоял, цlакъ чlухlаралги рохаралги руго нижер тlалъиялда гьединав Дагъистаналъул мустахlикъав вас вижиялдаса. Ниж талихl бугел чагlи ратила, гьаб ракьалда гьадинал чагlи рахъиналъ. Дагъистаналда Шагьрудин Мухlамадовичасул цlаралда рухьарал руго экономикаялдаги, маданияталдаги, спорталдаги ва цогидал бутlабаздаги росарал гlемерал бергьенлъаби. Гьесие ракl-ракlалъго бокьулаан Дагъистанги ва гьелъул халкъги. Жиндирго гlумрудул цlикlкlунисеб бутlаги кьуна гlагараб ракь цебетlезабиялъе. Гьединлъидал, цlакъ ракl къварилъулаан араб гlасруялъул 90 аб. соназда букlараб бихха-хочиялъухъ валагьидал. Шагьрудиние цlакъ бокьулаан спорт ва гьесул хасаб бербалагьиялда гъоркь букlунаан гьеб рахъалда гьабулеб хlалтlи. Гьесул хlаракаталдалъун Махlачхъалаялда рана кlудиял спортивиял объектал. Гьезда гъорлъ руго “Спартак”, “Урожай” ва “Труд” объектал. Гьенисан байбихьана жидерго нух гlемерал машгьурал спортсменаз. Жакъа Шагьрудинил цlар кьун буго Олимпиялъул хlаязде хlадурлъи тlобитlулеб централъеги. Киназдаго ракlалда батила 1972 соналда ФРГялъул Мюнхеналда Олимпиялъул хlаязда меседил медальги босун, Загъалав Гlабдулбековас гьанжегlаги Шагьрудин Мухlамадович жиндаса рази вукlинилан абураблъиги. Исана лъагlел халалъухъе нижеца тlоритlарал тадбиралги гьелда цадахъго жакъасеб тадбирги ккола гьев, нилъеца сундулго рахъалъан жиндаса босизе бегьулев инсанасул ва гьесул бечедаб ирсалъул адаб-хlурмат гьабилъун”, - ян абуна районалъул бетlерасул заместитель Асадгlали Гlабдуразакъовас.

“Жакъа нилъеца кlодо гьабулеб буго тарихалда гъваридаб лъалкl тарав машгьурав ракьцоясул юбилей. Нилъ чlухlарал руго нилъер Дагъистан лъикlаб рахъалдехун хисизабурав ва гьеб тlегьазабизе бажарарабщинаб хlалтlи гьабурав чи нилъер ракьцояв вукlиналдаса. Узухъда, замана цlакъ хехго боржунеб буго. Жакъа нилъее цlакъ гlолев гьечlо гьев. Гьедин, жакъа нилъеда дандчlвалел ругел захlмалъаби рихьидал, ракlалде ккола гьанже лъикlанин Шагьрудин вахъинавизе, нилъер хурзабахъеги, заводаздеги, спортивиял майданаздеги гьев вачине. Гьеб мехалда республика дагьаб батlияб букlинаан. Гьаниб жакъа гlемер бицана Шагьрудиница гьабунщинаб хlалтlул. Амма дицаги бицина цоги хlужаялъул. Араб гlасруялъул 60-70 аб. соназда республика кутакалда цебетlун бачlинеб букlана. Гьеб заманалда гlуцlулел рукlарал промышленносталъул объекталги киналго рухьарал рукlана гьесул цlаралда. Амма захlмалъи букlана гьенир хlалтlизе лъикlал инженерал, конструкторал, технологал ва цогидалги специалистал рукlинчlолъиялъ. Гьеб рахъги Шагьрудинида бихьана киназдасаго цебе ва Ленинградалъул гуми гьарулеб институталъул ректорасулгун къотlи-къайги гьабун, кватlичlого Каспийск шагьаралда рехсараб цlалул заведениялъул филиал рагьана. Гьедин, чанго соналдасан кадрабазул гlунгутlи лъугlизабизе кlвана. Дида ккола гьевгун кlалъарав, гьесда цадахъ хlалтlаравщинав чиясда лъалаанин гьесул цебе лъураб масъала тlубазе бугеб жигарчилъи. Гlемерисезда ракlалде ккезе бегьула кинан гьесухъа гьебгущинаб хlалтlи гьабун бажарарабилан. Гьесул букlана щибав чиясул рекlелъе нух батизе ва гьев цебе лъураб масъала тlубазабизе хlадурун бажарулеб гьунар. Шагьрудиница гъваридаб лъалкl тана республикаялъул тарихалда ва нилъеда кlочон тезе бегьуларо гьесул цlар”, - ян абуна Махlачхъалаялъул приборал гьарулеб заводалъул гендиректор Игорь Гъафуровас.

Гьединго Шагьрудинил гlумрудул ва захlматалъулаб нухлул бацарал кlалъаял гьаруна тадбиралда гlахьаллъи гьабизе рачlарал гьалбал, республикаялъул физкультурагун спорт цебетlеялъул рахъалъ республикаялъул жамгlияб советалъул председатель, машгьурав гугарухъан Мухlамадхан Гlарациловас, Шагьрудинил росуцояв, тlанусдерил Гlалиевазул машгьураб хъизамалъул цояв Махlач Гlалиевас, росдал бегавул Хlажи Гlабдулаевас ва Шагьрудинил яс Зульмира Шагьрудиновалъ.

Тадбиралъе хасаб берцинлъи кьун букlана кlалъаязда гьоркьоб республикаялъул ва районалъул маданияталъул бутlаялъул хlаракатчагlи Гlабдула Мухlамадмирзоевас, Гlайшат Тажудиновалъ ахlарал кучlдуз, “Гlакаро-Хунзахъ” ансамблялъ бихьизабураб кьурдул церерахъиналъ, театралиял сценкабаз ва школлъималаз рикlкlарал кучlдуз.   

И. Мухlамадов.