Гьал къоязда Дагъистаналде рачlун рукlана Донецкалдаса лъималазул къокъа. 10 августалда гьел щвана нилъер районалдеги. Гьезда цадахъ рукlана лъималазул ихтиярал цlуниялъул рахъалъ республикаялъул советалъул членал, регионалъул Бетlерасда цебе бугеб лъималазул ихтиярал цlуниялъул рахъалъ омбудсменд Марина Ежова, гьелъул кумекчагlи ва цогидалги.
Къалъул гlужалдехун гьел щвана Хунзахъ тlалъиялде. Кlудияб хlадурлъигун къабул гьаруна районалъ рикlкlадаса рачlарал гьалбал. Тlоцебе гьел рачана Цlолокь рагlалда бугеб халгьабиялъул площадкаялде. Гьенибго туристазул хабалда цебе гlодор чlана кваназе. Киназго гlахьаллъи гьабуна райадмистрациялда цебе бугеб пастlаниб Донецкалъул гlаламатлъун кколеб роза чlеялъулъ. Хадуб райадминистрациялда гlуцlана гургинаб стол. Гьениб тlобитlана районалъул школазул Советалъул гlахьалчагlигун дандчlвай. Районалъул школьниказ ва гьалбадерица бицана жидедаго тlаса бищизе ракlалда бугеб профессиялъул хlакъалъулъ. “Дагъистаналъул тарихалдаги гlемерал руго бидулал тlамчал, нижедаги бихьана рагъул кьогlлъиги, терроризмалъул балагьги ва гьелдалъун кколел камиялги. Гьединлъидал нижеда цlакъ лъикl бичlчlула жакъа нужер Ватlаналда бугеб ахlвал-хlал. Ниж хlадурал руго нужер захlмалъи-къварилъи бащад гьабун бикьизе, нижехъан бажарараб кумек гьабизе. Хасго дир ракl унтула эбелэменги чlван, тlокlаб тlала-агъаз гьабизе чиги гьечlого хутlарал лъимал рихьидал”, - ян абуна Марина Ежовалъ. Гьединго кlалъаял гьаруна районалъул лъай кьеялъул отделалъул начальник Патlимат Хlамзатовалъ, Жамгlияб палатаялъул председатель Раисат Гlусмановалъ ва цогидазги. Донецкалдаса рачlарал лъималазул кlигоял нилъер районалъул Хунзахъ ва Шотода росабалъа хъизамаз жидехъего хьихьизе рачана.
Гьенисан киналго цадахъ щвана Цlада Расул Хlамзатовасул рукъ-музеялде. Гьениб гьалбадерида бихьизабуна кlудияв шагlир жанив гьавурав ва гlурав мина-къайи. Цlадасан гьалбал щвана Макьасдеги. Ахиралда райцентралда Ш. Шамхаловасул цlаралда бугеб культураялъул кlалгlаялда цебе бугеб майданалда районалъул культураялъул бутlаялъул хlаракатчагlаз бихьизабуна кьурдабаздасан, кучlдул ахlи ва рикlкlиналдасан гlуцlараб гlатlидаб программаялъул концертги.
Гьединго жидерго церерахъин букlана Донецкалъул халкъияб хореографиялъулгун вокалияб “Сувенир” ансамблялъулги.
“Цlакъ бокьана нижее нужер ракь. Хlайран гьаруна гьаниб бугеб гlажаибаб тlабигlаталъ, дунялалда тlокlаб кибго гьечlебгlадаб маданияталъ, гlицlго гьал рорхатал мугlрузе хасиятаб рукlа-рахъиналъ, гlадамазул лъикlлъиялъ, гьезул гьалбадеридехун бугеб рокьиялъ, хlеренаб бербалагьиялъ ва адабхlурматалъ. Дагъистаналде щваралдаса нахъего киназго цlакъ лъикl къабул гьаруна ниж, жидецаго рачана тlабигlиял ва тарихиял памятникал рихьизаризе. Ниж гlумру гьабун руго цlан битlараб авлахъалда, гьединлъидал нижеда мугlрул-щобал цlакъго берцин рихьула. Нужер гьанирин абуни, гьел цlакъго гьайбатал руго”, - ян абуна къокъаялда цадахъ рукlарал Донецкалъул школалъул 11 классалъул цlалдохъаби Анастасия Берестюкица, Владимир Калечица ва Диана Дворниковалъ.
И. МУХIАМАДОВ.
|