12 февралалда районалде вачlун вукlана пачалихъияб Думаялъул депутат Султан Хlамзаев. Тlоцебе районалъул нухмалъулев Нурмухlамад Задиевгун, республикаялъул Бетlерасул гlакълучи Шамил Гlалиевгун ва цогидалги жиндирго мурадцоялгун цадахъ Султан Хlамзаевас райадминистрациялда тlаде къабул гьаруна гlадамал. Гlенеккана щивасул гlузруялъухъ ва рагlи кьуна бажарараб кумек гьабилилан.
Дагъистаналда исанасеб сон Лъай кьеялъул сонлъунги лъазабун бугелъул, депутат дандчlвана районалъул учительзабигунги. “Гlемерал гlузраби руго цо соналдаса цоги соналде росун ирсалъе хутlарал. Амма, я мугlалимзабазе, я цlалдохъабазе гьелдалъун кинаб букlаниги зарал ккезе бегьулареблъи якъинаб жо буго. Баркала буго учительзабазе гьезул свак лъалареб захlматалъухъ. Хадубккунги бокьулеб хlалтlуда нахъа рукlине къуватги щулияб сахлъиги кьеги нужее”, - ян абуна гьес.
Хадуб Султан Хlамзаев дандчlвана дагьаб цебегlан жиндирго бахlарчияб ишалдалъун машгьурлъарав Гlорутlаса 2 классалъул цlалдохъан Абубакар Расуловгун ва жиндирго рахъалдасан гьесие сайгъат гьабуна велосипедги. Депутатасада кlочон течlо районалъул централияб больницаялъул коллективалъухъе щвезеги.
Сапаралъул ахиралда гьев щвана Цlадаса Хlамзатил рукъ-музеялдеги. “Дун тlоцебесеб нухалда гуро Цlадаса Хlамзатил рокъове щолев вугев. Гьаниб берцинго цlунун ругел экспозицияз бицунеб буго Цlадаса Хlамзатил ва гьесул машгьураб хъизамалъул гlумруялъул хlакъалъулъ. 2023 соналъ улкаялдаго кlодо гьабизе буго Расул Хlамзатов гьавуралдаса 100 сонилаб юбилей. Нилъер киназулго гlаммаб масъала буго гьеб тадбир гlемераб заманаялъ гlадамазда ракlалда чlоледухъ, тlадегlанаб даражаялда гlуцlи”, - ян абуна депутатас.
|