Исанисеб-2022 сон нилъер республикаялда лъазабун буго Фазу ГIалиевалъул сонлъун. Гьей ккола 84 поэтикиял ва прозаялъулал тIахьазул авторлъун. Фазу ГIалиевалъул тIахьал руссинаруна дунялалъул 68 мацIазде. Гьей ккола улкаялъул бищунго тIадегIанаб шапакъат-Святой апостол Андрей Первозванныясул орден, гьединго Россиялъул Федерациялъул бищунго тIадегIанаб жамгIияб шапакъат-«Россиялъул чIухIи» шапакъат щварай чIужугIадан. Фазу ГIалиевалъул буго «ХIурматалъул гIаламат» абураб 2 орден, Халкъазул гьудуллъиялъул «Гьудуллъи» орденал, «Бихьинчилъиялъе гIоло» медаль ва гIемерал цогидалги медалалги цIаралги.
Машгьурай жамгIияй ва политикияй хIаракатчIужу, поэт, публицист, прозаик, республикаялъул патриот Фазу ГIалиевалъ рахъи бугеб хIалтIи гьабуна эбеллъи ва лъимерлъи цIуниялъе, гIолохъанаб гIелалъе рухIияб ва патриотикияб тарбия кьеялъе, рекъел ва миллатазда гьоркьоб цолъи щула гьабиялъе. Гьелъ дунялалдаго рагIизабуна Дагъистан, чIужугIадан-магIарулай, гIакъилай ва тIалаб цIикIкIарай эбел, нилъер рукъалъул гъансито цIунулей захIматчIужу. Фазу ГIалиевалъ жиндирго тIубараб гIумру кьуна Дагъистаналъул литератураялъе. Гьелъул пероялъукьан арал асаразулъ бицунеб буго нилъер ракьалъул берцинлъиялъул, нилъер миллияб гIамал-хасияталъул, гIадатазул, нилъер халкъалдеги, йижараб росу-ракьалдеги бугеб рокьиялъул. Гьединлъидал гьей машгьурай поэтесса, нилъер ракьцояй Фазул хIурматалда, гьей ракIалде щвеялъе республикаялда тIоритIулел руго батIи-батIиял тадбирал. Гьале гьал къоязда нилъер районалъул лъай кьеялъул отделалъул ИМЦялъул специалистазул жигарчилъиялдалъун райадминистрациялъул данделъабазул залалда тIобитIана Фазу ХIамзатовнаялъул хIурматалда, гьей ракIалде щвезайиялъул конкурс. Хадубккунги тIубараб сонго букIине буго гьединал тадбираздалъун бечедаблъун.
Н. Гlалиева.
|