2 июлалда районалъул администрациялъул данделъабазул залалда т1обит1ана «Хунзахъ район» муниципалияб г1уц1иялъул депутатазул Собраниялъул 37 сессия.

Гьелда гьоркьор лъун рук1ана 2020 сооналда районалъул бюджеталда гьаризе ругел хиса-басиял ва т1адежураял. К1алъазе яхъарай районалъул финансазул отделалъул начальникасул заместитель Г1алисултанова Заремаца баян гьаруна улкаялъул Президент В. В. Путинил бихьизабиялда рекъон классалъе нухмалъи гьабулев щивав педагогикияв х1алт1ухъанасе харжида т1адеги кьезе кколеб 5 азарго гъурущ ва «100 школа» проект г1умруялде бахъинабиялъул мурадалда гьарулел рук1ин бюджеталда хиса-басиял. Бихьизабуна гьелъие х1ажатаб г1арцул роценги.

Райадминистрациялъул росдал маг1ишаталъул отделалъул нухмалъулев Г1алиев Мух1амадица  гьаб соналъул 6 моц1ил х1алт1ул бицунаго, т1адч1ей гьабуна гъутабаздаса г1иял риидалил муч1дузде гочинари районалда, киг1анго зах1малъаби дандч1ваниги, к1удияб ками ккеч1ого рорч1иялъул. Гьабсаг1аталда 200 азарго г1и риидалил муч1дузда парахалъун рук1иналъул, г1и къинлъул кампания, г1иядаса квас къунц1и квеш инч1олъиялъул. Районалда гьоркьохъеб х1исабалда цо-цо г1иялъажоялдаса 2,5-3 кг. квасулги къунц1ун бук1иналъул. Бат1аго квеш ун гьеч1о хаслихъе культураби рак1ариялъул ишги. Бак1арун буго 1100 гектаралда бекьун бук1араб пурч1ина, цо гектаралдаса 16,5 центнер х1исаб гьабун. 

Ахирал соназ маг1ишатаз ц1ик1к1араб к1вар кьолеб буго пиринч1 бекьиялде. Гьаб соналда Г1обода Ленинил ц1аралда бугеб СПКялда пиринч1 бекьун буго 120 гектаралда, Энгельсил ц1аралда бугеб Г1ахьалч1и СПКялда 150 гектаралда. Хут1арал маг1ишатазги, гьезда хадур гъун пиринч1 г1езабизе рак1алда бугила.

Ахихъанлъиялда ками ккун буго бит1ун пурч1ун бугел пихъ кьолел гъут1би т1егьалеб г1ужалда ц1орой ккеялда бан.

Хадубги Мух1амадица ахихъанлъиялда х1алт1улезде г1айиб г1унт1изабуна заманалда гъут1би к1урулел, гьезие лъалъ гьабулеб гьеч1олъиялда бан. Гьедин тани,-ян абуна гьес,- ракъвазеги рес бугилан. Г1одорч1аразул рах1ат хвезабун бугоан районалде к1анц1ун (роржун) рач1арал гарц1аз бач1ин хвезабулеб бук1иналда банги.

Районалъул нухмалъулев Задиев Нурмух1амадица баян гьабуна гьеб иш райадминистрациялдаги лъалеб бук1ин. Лъик1аблъун бихьизабуна щивав хурул бет1ергьанас  гьел рух1ч1аголъабазде данде кибго бичулеб бугеб г1емерго хирияб гьеч1еб загьруги босун гьел хвезари. Росабазул администрациябаз опрыскивателалги рачун к1удиял гектаразда гьел хвезаризеян лъугьани, рес бугелъул цогидал пайдаял рух1ч1аголъабазда цадахъго боц1и-панзалъеги зарал гьабизе.

Гьединго Нурмух1амад Махсут1х1ажиевичас баркала кьуна т1олабго дунялалдаго т1ибит1араб квешаб унти-коронавирус нилъер районалдеги бач1араб мехалда, росабазул бегавулзабазги, депутатазги, спонсоразги гьабураб кумекалъухъ, гьез районцоязул рахъ ккуралъухъ. Районалъул г1адамал цадахъ лъугьун къеркьон рук1инч1еланиян бихьизабуна гьес, цогидал районазде дандеккун г1емерго лъик1го къезабизе к1ванила нилъеда гьеб унти. Районалда бикьун буго 100 тонна продукциялъул. Ролъги чакарги пиринч1ги, макароналгун нахги…-гьеб ц1акъго х1ажат бук1ана районцоязе. Дараби, маскаби, перчаткаби, ц1уна-къаялъул цогидалги х1ажалъаби рач1ана нилъер г1адамаз районалде. СПКязул нухмалъулез кумек гьабуна пиринч1алдалъун. Районалъул хъулухъчаг1аз цо къоялъул мухь-харж 300 азарго гъурущ рехана унтаразе х1ажалъиялъе.

Нилъер районалъул врачалгин, медсестраби, ай т1олабго коллектив мустах1икъаб буго к1удияб реццалъеги, баркалаялъеги. Клиникияб хвалда рук1арал чанго чигицин хвасар гьавуна гьез. Нилъер врачал чанго сордо-къоялъ рокъоре инч1ого бах1арчилъиялда къеркьана унтарал хвалил квач1икьа рорч1изариялъе. Киназдасаго цее мисаллъун рехсезе бегьула жиндир 65-ялдаса т1аде арал сонал рук1ун г1одой ч1езе рес бук1инч1ониги, 14 сордо-къоялъ больницаялдаса къват1ие яхъинч1ого г1одобч1абаралда бусенги т1амун унтарал хвасар гьарулей йик1арай райбольницаялъул инфекциялъул отделениялъул заведующая Нупайсат Магаева ва гьебго отделениялъул 8 медсестра.

Н. Задиевас рак1-рак1алъулаб баркала кьуна бах1арчияб больницаялъул коллективалъе.

Рорхана жегиги к1вар бугел суалалги. Киназего мух1канал жавабал кьун, данделъи берцинго нухда бачана депутатазул Собраниялъул председатель Х. Хваджаевас.

Н. Г1алиева.