Халатрахъарал г1одоркъояздаса хадуб лъаг1алил т1оцебесеб х1алт1ул къоялъ районалъул администрациялда т1обит1ана т1олалго г1уц1абазул нухмалъулелги г1ахьаллъун плановияб данделъи.

Районалъул нухмалъулев Нурмух1амад Задиевас, гьеб бачунаго, т1адч1ей гьабуна араб соналъул г1унгут1абиги х1исабалде росун, исанисеб сон жеги ц1ик1к1араб жавабчилъиялда, халкъалъул мурадал т1ураялда т1обит1изе ккеялда. Хасго 2023 сон улкаялдаго Халкъияв шаг1ир Расул Х1амзатовасул лъаг1еллъун лъазабунги бугелъул, щивав районцоясда т1адаб бугин гьеб т1адег1анаб даражаялда т1обит1иялъе жиндасан бач1арабщинаб гьабизеян абуна бет1ерас (2 миллиардалдасаги ц1ик1к1ун сурсатазде х1алт1аби т1орит1изе руго Расулил баракаталдалъун нилъер районалда исана.

Гьезда гьоркьор руго Харахьи, Гьоц1алъ участкаялъул больницаби, Г1арани, Буц1ра, Гьамущи, Г1ахьалч1и, Бакьагьеч1и, Г1урк1ач1и, Моч1охъ школал рай г1адал к1вар бугел х1алт1аби, нухазда, музеязда, Г1арани хъалаялда, лъел мухъазда ремонтал т1орит1и рик1к1ун х1ал к1оларел ва гь.ц. тадбирал-авт.).

Хъатг1анасеб Дагъистан дунялалдаго раг1изабурав «Ц1адаса кавказалъуласул» г1асруялъулаб юбилей-аслияб к1вар бугеб масъалалъун бихьизабуна районалъул нухмалъулес ва лъазабуна къокъаб заманалда жаниб г1уц1иялъул комитет данде гьабеян. 

Украинаялда унеб хасаб рагъулаб операциялъул г1ахьалчаг1азе ва гьезул хъизамазе кинабго рахъалъулаб кумек гьабизе ккеялдеги к1вар буссинабуна Н. Задиевас.

Гьел, ват1аналъул ах1укье къват1ире рахъарал лебалал г1олохъабазул мисал босизесел ишалги рехсана данделъиялда. Масала, Т1ануси росдал «Машгьурал г1адамал» СПКялъул председатель сахаватчи З. Мух1амадовас росулъа Украинаялде арал г1олохъабазе кьун буго 1 миллион гъурущ, гьезин абуни гьеб, жидерго рахъалдасан сайгъатлъун, кьун буго росдал х1ажалъабазе. Гьединал лъик1ал ишазул СМИяздасан ц1ик1к1ун хъвайилан т1адкъаял кьуна нижееги. 17 СПКялъул нухмалъулез СВОялда г1ахьаллъулезе бит1изе бакъвазабулеб буго 2300 кг. гьанал, лъик1аб бач1иналде хьул бугеб пиринч1ги, гьединал садакъа – вакъфуялъулал ишазе кьезе жал х1адурал ругин абуна росдал маг1ишаталул отделалъул нухмалъулев М. Г1алиевас.

Г1емерал лъик1ал ниятал – къасдал рикьана планеркаялда районалъул активалъ жидедаго гьоркьор. Больницаялда цебесан Ц1адаре унеб нухда лъелал хьвадулеб тротуар гьабизе проект х1адуризе щай бегьуларебин суал цебе лъуна нухазул участкаялъул нухмалъулев М. Сайгидовасда Нурмух1амад Махсут1х1ажиевичас. (Х1акъакъаталдаги, гьеб х1ажатаб, лъик1аб пункт гьеч1оан 100 – сонилаб юбилеялъул план – программаялдацин – авт.)

Унголъунги, щибаб социалияб бут1а гьоркьоса бахъизе рес гьеч1еб, тадбиразгун рук1а-рахъин лъик1лъизабиялъул х1алт1абаз гьарзаяб буго районалъе 2023 сон. 
Рак1алда гьеч1еб жо нахъа батулареб, рагъ-кьалалъул балагь лъуг1араб, аваданаб лъугьаги нилъее киназего т1аде щвараб лъаг1ел. Х1алт1ияли, рух1 гьеч1еб жо, цадахъ лъугьун гьабулин.

 Ф. Мух1амадова