Гьал къоязда тlолабго улкаялдагогlадин нилъер районалдаги кlодо гьабуна кlудияв шагlир Расул Хlамзатовасул гlасрудал юбилей. Улкаялъул Президентас 2021 соналдаго жиндирго Указалдалъун исанасеб сон лъазабун букlана Расул Хlамзатовасул сонлъун. Гьединлъидал исанасеб сон байбихьаралдаса юбилеялда хурхун байрамалъулал тадбирал тlоритlулел руго федералияб даражаялда ва цо-цо къватlисел пачалихъаздаги. Байрамалде рачlаразда гъорлъ рукlана Россиялъул Президентасул СКФОялда вугев полпред Юрий Чайка, улкаялъул Президентасул гlакълучи Владимир Толстой, Дагъистаналъул Бетlер Сергей Меликов, регионалияб Хlукуматалъул членал, Халкъияб Собраниялъул председатель Заур Аскедеров, Федералияб Казначействоялъул Дагъистаналда бугеб управлениялъул нухмалъулев Гlабдулпатахl Гlамирханов, республикаялъул ТФОМСалъул нухмалъулев Ахlмад Гьудов, Дагъистаналъул тlоцевев президент Мухlу Гlалиев, РФялъул Социалияб фондалъул Дагъистаналда бугеб отделениялъул нухмалъулесул ишал тlуралев Мухlамад Гlисаев, республикаялъул гlемерал муниципалитетазул нухмалъиязул ва федералиялгун регионалиял СМИязул вакилзаби, творческияб интеллигенция ва гlемерал цогидалги. 

Кьерхараб бачlана районалда 9 сентябрь. Гьединлъидал, гьава-бакъалъул шартlазда рекъезабизе ккана тадбиралъул программаги. Гьелдалъун цебеккунго хlадурараб хасаб программаялда рекъон гьаризе ракlалда рукlарал гlемерал тадбирал гlумруялде рахъинарун бажаричlо.

Тlоцебе гьалбал щвана шагlирасул гlагараб Цlада росулъ бугеб рукъ-музеялде, тlугьдул лъуна росулъ ругел Цlадаса Хlамзатил ва гьесул машгьурал кlиялго васазул памятникалда цебе. Гьенисан сапар бухьана хас гьабун поэтасул юбилеялде цlи гьабун къачlараб “Хъахlал къункъраби” мемориалияб комплексалде. Гьениб юбилеялде гьарурал гlемерал хlалтlабазул хlасилалда тlубанго хисун буго комплексалъул сипат-сурат. Гьелъул территориялда эбелалъе гьабураб цlияб памятникалда цебе тlугьдулги лъун, киназго свери бахъана гьединго цlи гьабун къачlараб, гlадамазе балагьизе квегlенаб ва интересаб къагlидаялъ гьаб заманаялъул технологияздалъун хьезабураб комплексалъул жанисеб рахъалдаги. Комплексалда нахъехун бугеб майданалда тlиритlун рукlана республикаялъул Промышленносталъулгун даран-базаралъул министерствоялъ хlадурарал батlи-батlиял муниципалитетазул миллиял бокlналги. Бокьарав чиясул рес букlана гьенир церелъун рукlарал нигlматазул хlалбихьизеги.

Хадуб гьалбал щвана шагlирасул юбилеялде гьесул цlар кьураб цlияб Гlарани школа-интернаталдеги. Юрий Чайкаца жиндирго рахъалдасан школалъе сайгъат гьабуна жакъа къоялъул технологияздалъун хьезабураб лъабго цlияб телевизорги ва хlаязул приставкабиги.

Гьебго заманалда райцентралда Ш. Шамхаловасул цlаралда бугеб маданияталъул кlалгlаялда тlобитlана гlатlидаб программаялъул концерт. Гьелда гlахьаллъи гьабуна Дагъистаналъул Халкъиял артистал Тlагьир Къурачевасгун Гlабдула Мухlамадмирзоевас, Санкт-Петербургалдаса бачlараб гьитlинал васазул хоралъ, “Каспий”, “Эхо гор”, “Хьаргаби” ва “Гlахъуща” ансамбляз, Авар театралъул артистаз, Чlарадисезул хоралъ ва цогидалги республикаялъул культураялъул бутlаялъул машгьурал вакилзабаз. Маданияталъул кlалгlаялда цебе бугеб майданалда палугьабазги рихьизабуна жидерго гьунарал.  

Юбилеялда хlадурлъиялъулъ гlахьаллъи гьабуна тlолабго районалъ. Тlоритlулел субботниказулъ ва “Хъахlал къункъраби” комплексалда гьарулел хlалтlабазулъ жигараб гlахьаллъи гьабуна росабазул бегавулзабаз, школазул директорзабаз ва цогидалги муниципалитеталъул учреждениязул хlалтlухъабаз. Тадбир тlобитlиялъулъ хасаб бутlа лъуна районалъул росдал магlишаталъул бутlаялъул хlалтlухъабазги. Гьедин, гlаммаб къагlидаялъ районалъул киналго магlишатаз юбилеялде кьуна 52 бетlер гlиязул ва 300 азаргоялда цlикlкlун гъурущ гlарцул. Районалъул нухмалъиялъул рахъалдасан ракl-ракlалъулаб баркала кьолеб буго гьел киназего.
И. Мухlамадов.