17 маялда Бакьагьеч1и гьоркьохъеб школалда
т1обит1ана т1адагьаб
атлетикаялъул рахъалъ районалъул чемпионат. Школалъул азбар ц1ун бук1ана жидерго
спортивияб махщел, гьунар бихьизабизе гьенире
рач1арал ц1алдохъабазги гьезул физруказги.
Районалъул 16 гьоркьохъел
школазул командаби данделъун рук1ана
чемпионат т1обит1изе: Г1арани, Г1ахьалч1и, Г1обода, Харахьи, Гьамущи,
Лъаг1илухъ, Хьиндахъ, Моч1охъ, Хунзахъ № 1 ва № 2, Бакьагьеч1и, Т1ануси, Х1ариколо, Ц1ияббуц1ра, Гьоц1алъ
ва Г1арани рагъулабгун спортивияб лицей.
Цебеккунго х1адурараб положениялда рекъон, чемпионат г1уц1ун
бук1ана спорталъул тайпабазул ич1го къецалдасан: 60, 200, 400, 800 ва 1500 м.
рекери, рекерун г1ебеде к1анц1и,
эхеде к1анц1и, лъабц1ул к1анц1и (тройной
прыжок) ва ядро рехи.
Къецал рук1ана г1езег1ан х1алуцарал, бихьулеб бук1ана
цо-цо командаби ц1акъго т1адч1ун х1адурун рук1ин. 60 м. рекериялъе бищун цере рач1ана васазул
Г.Насух1ов (Бакьагьеч1и), ясазул Г.Х1ажиева (Г1ахьалч1и), 200 м. – Ш.Г1абдулкеримов (Г1арани) ва
П.Мух1амадова (Гьамущи), 400 м. –
рекерун дандияздаса цере ккана Ш.Мух1амадов (Лъиг1илухъ) ва К.Г1абдусаламова
(Г1обода). Зах1маталлъун рук1ана ц1ик1к1арал манзилазда рекериялъул къецал . 800 м. рекерун цойгидаздаса цере рач1ана М.Нурмух1амадова (Гьамущи) ва К.
Г1абдусаламова (Г1обода), 1500 м.
рекериялда бергьенлъи босана
Я.Муслимовас (Т1ануси) ва Х. Муртазаг1алиевалъ (Гьамущи). Гьединал
х1асилаздалъун лъуг1ана рекериялъул къецал. Г1езег1ан интересал рук1ана хут1арал къецалги. Эхеде к1ац1иялъулъ бищунго лъик1ал х1асилал рихьизаруна гьамщадерил ц1алдохъабаз: 1 м.70
см. к1анц1ун цойгидазда т1ад
бергьенлъи босана Х1.
Гьит1иновас, ясазда гьоркьор 1 м.40 см.
к1анц1ун т1оцересел бак1ал росана
Г1. Лабазановалъ (Гьамущи)
ва Г1. Гьит1иновасавалъ
(Гьоц1алъ). Лъабц1ул к1анц1иялъулъги бищунго лъик1ал х1асилалги рихьизарун т1оцересел бак1ал щвана Х1.Гьит1иновасе (Гьамущи) ва Г1. Гьит1иновасовалъе (Гьоц1алъ). Рекерун
бищунго рик1к1ад г1ебеде к1анц1ун дандиязда т1ад бергьенлъи босана А. Мух1амадова
(Хунзахъ № 2 гьоркьохъеб школа) ва П.
Муртазаг1алиевалъ (Г1ахьалч1и). Ядро
рехиялъулъ къецезда т1оцересел бак1ал щвана Гь. Гьиматовасе (лицей), З.
Мух1амадовалъе (Лъаг1илухъ).
Киналго къецазул х1асилал данде росидал т1оцебесеб бак1 щвана Гьамущи
гьоркьохъеб школалъул командаялъе
(физрук Къурамух1амадов Зубаир), к1иабилеб
бак1алде бач1ана Г1ахьалч1и гьоркьохъеб
школалъул команда (физрук Мух1амадов Т1айгин) ва лъабабилеб бак1алъе
мустах1икълъана Лъаг1илухъ
гьоркьохъеб школалъул команда (физрук
Султ1анбегов Г1абдусалам).
Т1адагьаб атлетикаялъул чемпионат т1обит1иялъул аслиял х1алт1аби т1аде росун рук1ана информационниябгун методикияб централъул
специалист Исмаг1илов Исмаг1илица, гьев
вук1ана къецазул бет1ерав судьяги. Къецал г1адлу-низамалда берцинго иналъе бажарараб х1алт1и гьабуна судьяби З.
Къурамух1амадовас (Гьамущи), Г1.
Султ1анбеговас (Лъаг1илухъ), К.
Х1айдарбеговас (Бакьагьеч1и), Д. Мух1амадовас (Г1ахьалч1и), М. Г1амирхановас ва А.Исмаг1иловас
( к1иявго Гьоц1алъа ).
И.Исмаг1иловас газета гьоркьоб ккун баркала кьолеб буго
чемпионаталда жиндиего кумек гьабурал,
т1адехун рехсарал физруказе, г1ахьаллъи
гьабурал командибазе ва гьезул
нухмалъулезе.
Г1езег1ан г1ат1идаб гьелгощинал командаби г1ахьаллъараб чемпионаталда г1ахьаллъи гьабизе
рач1инч1о Г1орут1а, Т1агьада, Буц1ра,
Уздалросу гьоркьохъел школазул командаби. Бич1ч1уларо щай гьез гьелда
г1ахьаллъи гьабич1ебали. Чемпионаталда гьел школал рач1инч1олъиялдаса разилъи гьеч1олъи загьир гьабуна методцентралъул специалистазги.
Къецезул чемпион – Гьамущи
гьоркьохъеб школалъул командаялъ г1ахьаллъи гьабизе буго
Мах1ачхъалаялда т1обит1изе бугеб
т1адагьаб атлетикаялъул республикаялъул
чемпионаталда.
Т1оцересел бак1ал росарал командабазда гьелги баркулаго,
гьарилин районалъул вакил - гьамщадерил
команда республикаялъул къецаздаса нух
бит1ун бергьенлъигун т1ад буссагиян.
П.Гунащева
| 
