Пайдаяб ва рак1алдаса унареб тадбир т1обит1ана,
т1олгодунялалъулго г1олилазул байрамкъоги гьоркьоб ккун, Хунзахъ росулъ 11
ноябралда. Районцояз х1урматияб къаг1идаялда к1одо гьаруна ракьцоял спортсменал
– 2012 соналъул Россиялъул боксалъул чемпионка, Т1ануси росулъа Саг1адат Г1абдулаева ва кикбоксингалъул
рахъалъ дунялалъул кубокалъул бет1ергьан, Буц1раса Х1ажи Мух1амадов. Чемпионазе районалъул нухмалъулесул
рахъалдасан к1удияб г1арцулаб сайгъат ва администрациялъул баркалаялъул кагъат
кьуна районалъул администрациялъул
бет1ерасул 1-сев заместитель Саг1адула
Батировас. Г1арцулал ва
рак1алдещвеялъулал сайгъаталгун, баркиялгун к1алъазе рахъана Т1ануси ва Буц1ра
росабазул бут1рул Будайхан Мух1амадов, Мух1амад Г1алиев, районалъул собраниялъул депутат
Гъазимух1амад Г1абдулвагьабов,
тадбиралъул г1айибиязул гьудулзабигун г1агарлъи. «Единая Россия» портиялъул
Дагъистаналда бугеб «Молодая гвардия» отделениялъул нухмалъулев Мух1амад
Хат1иповас ц1алана Россиялъул «ЕдРО»
партиялъул г1олилазул политикаялъул координатор Артем Туровасул
баркалаялъул кагъат. Культураялъул махщелчаг1аз чемпионазул х1урматалда г1уц1ун
бак1ана г1ат1идаб программаялъул концерт. Гьелдаса хадуб гьалбадерие ва жалго спортсменазе «Машгьурал г1адамал» колхозалъул
ва администрациялъул х1аракаталдалъун г1уц1ун бук1ана бечедаб кванил столги.
Ф. Мух1амадова
|