24 июлалда райадминистрациялда тlобитlана данделъи. Гьелда гlахьаллъи гьабуна районалъул бетlерасул заместитель Асадгlали Гlабдуразакъовас, республикаялъул ветеринарияб управлениялъул начальник Хъарачу Гlамирхановас, районалъул ветуправлениялъул нухмалъулев Тlалхlат Шамхаловас, бегавулзабаз ва цогидазги.

Данделъиялда гьоркьоб лъураб аслияб суал букlана 2022 соналъул 28 июналда “О ветеринарии” абураб Федералияб Законалда гьарурал хиса-басиязда ва РФялъул Хlукуматалъ 2023 соналъул 5 апрелалда гьабураб № 550 постановлениялда рекъон чlегlерхlайваназда биркаби ран рахъинари. Асадгlали Гlабдуразакъовас бицана гьеб бугин тlолабго улкаялдаго унеб бугеб хlалтlи ва гьелъул мурадги бугин, пачалихъалъ хадубккун росдал магlишаталъе дотацияздалъун кумек гьабизе букlине, боцlул хlакъикъияб къадар тасдикъ гьабиян. Гьелъие гlоло “Хорриот” абураб хасаб программаялде жанире росизе кколел руго бирка банщинаб хlайваналъул хlакъалъулъ баянал. Гьелдаса хадуб, мисалалъе, гьеб хlайван тlагlун бугони яги базаралдеги бачун бичулеб бугони, бокьарав чиясул рес буго гьелъул гlинда бараб биркаялда хъвараб номералда рекъон программаялде ваккун, хlайваналъул хlакъалъулъ киналго баянал щвезеги. Гьеб хlалтlи рагlалде бахъинабизе кколеб буго 1 сентябралде. Биркабиги росизе кколел руго жалго боцlул бетlергьабаз. Амма гlадамазе квегlенлъиялъе, биркаби разе хьвадулел ветуправлениялъул хlалтlухъабаз жидецаго цадахъ росун рачlунел руго гьел. Биркаялъул багьа - 50 гъурущ. Цадахъго байбихьун буго гlи-цlцlаназда биркаби раялъул хlалтlиги. Гьеб лъугlизе кколеб буго тlасияб соналъул 1 сентябралде. 

Гьеб суалалда хурхун кlалъай гьабуна Тlалхlат Шамхаловас.  
“Хунзахъ тlалъиялда, жибго райцентралдаги Загlибги хутlизегlан, цогидал росабалъ хlалтlи гьабун лъугlанин абизе бегьула. Амма гъутабазда жеги гьабизесеб хlалтlи цебе буго. Цохlо мущулдерилги гьамущдерилги гъутабахъ гурони, тlокlаб кибниги хlалтlи лъугlун гьечlо. Жамгlияб секторалъул боцlуда ран рахъана биркаби, гьанже хутlун буго жидер хасал бетlергьаби ругел боцlуда (частный сектор) биркаби разе. Гlезегlан захlмалъабиги руго гьеб хlалтlи гlуцlиялъулъ. Мисалалъе, магlарухъ 5-6 росулъ гурони гьечlо расколал. Гьединлъидал, къваригlуна хlайванал кквезе кумекчагlи. Нижер цо-кlиго хlалтlухъанасухъа биркабиги ран, информацияги хъван, цадахъго хlайванги ккун бажаруларо. Рукlуна минаби цохlо ригь арай гlадан гурони жанир гьечlелги. Кин гьей херай чlужугlаданалъ хlайван кквезе бугеб? Нижер хlалтlухъаби цого росулъе чанго нухалъ хьвадунги бажаруларелъул, къваригlун буго жамагlатазда бичlчlизеги гьабун, цо къоялда жаниб росулъ бугебщинаб боцlуда биркаби разе”, - ян абуна районалъул ветуправлениялъул начальникас.    

“Гьаб хlалтlул рахъалъ цlакъ нахъе ккун буго нилъер район. 22 июлалде ругел баяназде рекъон, “Хорриот” программаялде жаниб босун буго гlицlго 5891 бетlер чlегlерхlайваназул, гьеб ккола муниципалитеталда ругелщиназул 21,6 %. Гьеб буго цlакъго дагьаб къадар.  Щайгурелъул, руго районал, гьеб хlалтlул план 100 ва жеги цlикlкlун процентаз тlубазабуралги. Дие бокьиларо нилъер район гьеб суалалъул рахъалъ республикаялдаго рачlалда хутlун бугин абизе. Магlарухъгицин гlезегlан росабалъ хlалтlун план тlубазабун буго. Амма гъутабаздайин абуни, 2-3 росулъ хутlизегlан, тlокlаб щибго хlалтlи гьабун гьечlо. Гьединлъидал, дир кlудияб гьари буго бегавулзабаздехун гьеб хlалтlуе нижее кумек гьабеян. Моцlги дагьалго къоялги хутlун ругелъул, киназго цадахъ гьеб ишалъе къвал къазе ккун буго жакъа нилъеца”, - ян абуна Хъарачу Гlамирхановас.

Жидерго суалал кьуна бегавулзабазги. Мисалалъе, Лъагlилухъ росдал бегавул Гlали Мусаевас абуна жал хlадурал ругин гьеб суалалъулъ жидедасан бачlараб кумек гьабизе, амма цохlо нижеда божун течlого, боцlуда биркаби разе кколеблъи гlадамазда бичlчlизабизе, цадахъ ветеринарияб хъулухъалъул специалистги райдминистрациялъул вакилги ритlани лъикlаб букlинилан. Гьесул пикруялъул рахъ ккуна цогидал бегавулзабазги. 

И. Мухlамадов.