14 апрелалда райадминистрациялда тlобитlана райсобраниялъул иргадулаб сессия. Гьелда гlахьаллъи гьабуна районалъул нухмалъиялъ, росабазул бегавулзабаз, райадминистрациялъул хlалтlухъабаз ва цогидазги. Данделъаразе саламги кьун сессия рагьана райсобраниялъул председатель Мухlамад Мухlамадовас. Гlаммаб къагlидаялда сессиялда гьоркьоб лъун букlана 8 суал.
Гьездасан аслияллъун рукlана “Хунзахъ район” МРалъул 2022 сонил бюджеталда хиса-басиял ва тlадежураял гьариялъул хlакъалъулъ, Россиялъул Хунзахъ ОМВДялъул начальникасул 2021 соналъ гьабураб хlалтlул хlакъалъулъ хlисаб кьей, Районалъул халгьабиялъулгун хlисабалъулаб комиссиялъул (КСК) председателасул 2021 соналъ гьабураб хlалтlул хlакъалъулъ хlисаб кьей. Тlоцебесеб суалалда хурхун кlалъазе вахъана финансовияб отделалъул начальник Хlайдар Хlайдарбегов. Гьес бицана районалъул исанасеб бюджеталда гьарун ругел хиса-басиязул. Гьедин, Хунзахъ лъим бацlцlад гьарулел сооружениязе биччан буго 3,360 млн гъурущ. Бакьагьечlибе лъим бачине биччан буго 6 млн цlикlкlун гъурущ, Гlочlло школалда капиталияб ремонт гьабизе 6,6 млн гъ. Гьединго республикаялъул Бетlерасул тlадкъаялдалъун, улкаялъул экономикаялда лъугьун бугеб хlалуцараб ахlвал-хlалги хlисабалде босун киналго районаз цlикlкlинабизе кколеб буго резервалъулал фондазда бугеб гlарцул къадар. Гьедин бюджеталъул цогидал статьябаздасаги бахъун, нилъер районалъул фондалде тlадеги 8,4 млн гъурущ рехизе кколеб бугиланги бицана гьес. Гьелдалъун лъайкьеялъул учреждениязда санайил риидалил заманалда гьарулел ремонталъулал хlалтlаби исана нахъе рахъизе кколел руго. Араб соналъ гьабураб хlалтlул хlакъалъулъ бицана РОВДялъул начальник Мухlамадхlажи Сайбулаевас. Гьесул рагlабазда рекъон 2021 соналъ районалда хъвай-хъвагlай гьабун буго 42 такъсиралъул. Гьел ккун руго 13 росулъ. Гъоркьисала цlакъго цlикlкlун руго Интернеталдасан гlадамал махсароде кквеялъул хlужаби. Гьеб рахъалда хурхун цlакъ цlодорлъи гьабизе ахlана гьес киналго. Гьабсагlаталда ругел баяназда рекъон районалдаса 9 чияс гlахьаллъи гьабулеб бугила Сириялда унеб рагъулъ, гьездасан 8 кьун вуго халкъазда гьоркьосеб розыскалде. 2021 соналъ районалъул нухазда ккун буго 23 ДТП, гьезул хlасилалдда хун вуго 4 чи, лъукъа-къотlун вуго 16 чи. Гьел авариял ккеялъе аслияб гlилла ккун буго нухазда транспорталъул хехлъи цlикlкlинаби. Гьабун буго 4222 административияб протокол. Батlи-батlиял административиял ихтиярал хвезаруралъухъ райотделалде рачун руго 30 чи. ОГИБДДялъул хlалтlухъабаз гlуцlун буго 2099 административияб протокол. Райотделалъ цогидал жавабиял хъулухъалгун цадахъ хасаб къадаралъул хlалтlи гьабулеб буго районалда хадуб бугеб налъи дагьлъизабиялъул мурадалда. 2021 соналъул 1 декабралде районалда хадуб букlун буго 66,4 млн гъурущ транспорталъулаб налогалъул, 24,9 млн гъурущ бухlараб токалъухъ кьезе кколеб налъиялъул, 23,4 млн тlабигlияб газалъухъги. Араб соналъ жидецаго гьабураб хlалтlул бицана районалъул халгьабиялъулгун хlисабалъулаб комиссиялъул (КСК) председатель Мухlамадрасул Хlасанбеговас. Гьес абуна 2021 соналда жидеца халгьабунин 22 учреждениялъул ва гlунгутlаби ратарал гlуцlабазда хурхун материалал ихтиярал цlунулел идарабазде кьунилан. Жеги гьоркьор лъун рукlана районалъул цо-цо маданияталъул ва спортивиял учреждениязе нилъер машгьурал ракьцоязул цlарал кьеязда хурхарал суалалги. Гьедин депутатаз рахъги ккун, Хъахlикlкlалахъ росдал культураялъул рукъалъе, Тlагьада библиотекаялъе кьуна Фазу Гlалиевалъул ва Расул Хlамзатовасул цlарал. Гьединго Тlагьада спортзалалъеги кьуна Гlисаев Ахlмадил цlар. Ахиралда бицен ккана жакъа Украинаялда унеб бугеб хасаб операциялъул ва гьениб нилъер улкаялъул хlинкъи гьечlолъиги цlунун бахlарчиго рагъилел ругел нилъер ракьцоязе районалдасан битlулеб бугеб гуманитарияб кумекалъулги. Мухlамад Мухlамадовас цlар-цlарккун рехсана гьанадалъун, гlарцудалъун, ретlел-куналдалъун кумек гьабурал росабигун СПКял ва ракl-ракlалъулаб баркала кьуна киназего.
И. МУХIАМАДОВ.
|