Гьал къоязда районалъул культураялъул к1алг1аялда к1одо гьабуна Т1олгодунялалъул учителасул къоялъул х1урматалда т1адег1анаб байрам. 
Районалъул педагогазда ва т1олалго школазул х1алт1ухъабазда, ц1алдохъабазда байрам баркизе рач1ун рук1ана районалъул администрациялъул бет1ер Задиев Нурмух1амад Махсут1х1ажиевич, гьесул заместитель Г1абдуразакъов Асадг1али Г1абдуразакъович, районалъул лъай кьеялъул профкомалъул председатель Х1амзатов Г1-П Абакарович, лъай кьеялъул отделалъул начальник Х1амзатова Пат1имат Х1адисовна, районалъулго школазул, лъималазул ахазул нухмалъулелгин педагогал, погранотрядалъул начальникасул заместитель.

Рохалилаб данделъиялда г1ахьалъаразда учительзабазул х1урматияб байрам баркун ва гьезие щулияб сахлъиги, талих1-роххелги, х1алт1улъ ч1ах1иял бергьенлъабиги гьарараб к1алъай гьабуна Н. Задиевас. Гьес реццалъул раг1абаздалъун рехсана г1ун бач1унеб г1елалъе тарбия-лъай кьеялда рак1 бац1ц1адго х1алт1улел педагогазул ц1арал ва гьаруна гьезие сайгъатал. Н. Махсут1х1ажиевичас киналго педагогал ах1ана г1ун бач1унеб г1елалъе тарбиягун лъай кьеялъул х1урматияб х1алт1улъ гьанжесеб цебет1ураб рахъи бугеб лъай ц1алдохъабазе кьеялда цадахъго, Ват1ан бокьиялде, гьелъул рух1ияб хазина ц1униялде ц1ик1к1араб к1вар буссинабизе.

Балагьаразул рак1азе ц1акъго к1удияб асар гьабулеллъун рук1ана Украинаялда унеб бугеб хасаб рагъулаб операциялда г1ахьаллъулел ругел нилъер ракьцоял рагъухъабазул жалго цере ц1аларал учительзабаздехун, улбуздехун руссун видеоялдасан гьарулел баркиял. Гьез г1одорч1аразе раг1и кьуна г1агараб Ват1анги ясберг1адин ц1унун, Бергьенлъиги босун т1ад руссине.

Учительзабазда, ц1алдохъабазда ва т1олалго байрамалда г1ахьаллъаразда байрамги баркун, тарбия-лъай кьеялъулъ, унго-унгояб намус-ях1алъул, маг1арулазулаб т1абиг1ат-г1амалалъул г1ун бач1унеб г1ел куцаялъулъ т1адег1анал х1асилал ккей мурад бук1ин загьар гьарурал к1алъаял гьаруна А. Г1абдуразакъовас, Г1-П. Х1амзатовас, П. Х1амзатовалъ.

Рек1елъе рортулел раг1абаздалъун учителасдехун жидерго бугеб рокьи видеообращениялдалъун загьир гьабуна школа лъуг1ун заман ун бук1аниги, киналго школалда ц1аларал ругелъул, гьанже бат1и-бат1иял ишазда х1алт1улел ругел хъулухъчаг1азги.

Г1одорч1аразе ц1акъго рек1ее г1уна учительзабазе сайгъат гьарурал раг1абигун литературияб сценария бихьизабурал, куч1дул ах1арал, кьурдаби гьарурал Г1арани, Бакьагьеч1и, Хунзахъ №1 гьоркьохъел школазул ц1алдохъаби, Хунзахъ №1, №2, №3, Ц1ада, Г1обода лъималазул ахазул гьит1ичал.
Данделъиялъул ахиралда тарбиягун лъай кьеялда гьабураб г1емерсоназулаб рак1 бац1ц1адаб хъулухъалъе г1оло Х1урматиял ц1араздалъун ва грамотабаздалъун к1одо гьаруна рик1к1ен г1емерал педагогал.

«Дагъистаналъул мустах1икъай учитель» абураб ц1ар щвана Х1ариколо гьоркьохъеб школалъул учительница Хваджаева Пат1имат Мух1амадовнаялъе.

Дагъистаналъул Лъай кьеялъул Министерствалъул Х1урматияб грамотабаздалъун к1одо гьаруна Заг1иб аслияб школалъул директор Муртазаг1алиева Шагьун Мух1амадовна, К1ахъ аслияб школалъул директор Мух1амадова Сапият Мух1амадовна, Мух1амадов Мух1амад Сайгидович.
Баркалаялъул кагътал кьуна Мусаева Пат1имат Мух1амадовнаялъе, К1ахъ аслияб школа, Х1амзатова Загьра Билаловнаялъе, Х1ариколо байбихьул классазул учительница, Мух1амадова Жавгьарат Мух1амадовнаялъе, Заг1иб аслияб школа, Х1ажимух1амадова Пат1имат Муртазаг1алиевнаялъе, Гьац1алухъ аслияб школа ва г1емерал цогидалги педагогазе.

8 октябрь гьединго ккола тlадеги лъай кьеялъул хlалтlухъабазул къоги. Гьаниб бихьизабизе ккола Лъималазул творчествалъул рукъалъул (ДДТ) ясаз учительлъиялъул киналго гlаламаталги хlалтlизарун Культураялъул кlалгlа къачlан букlараб магlнаялда ва берцинлъиялда.

Байрам ана т1адег1анаб даражаялда. 

Н. Г1алиева.