Къо ккаралъур ратиги цоцазул къварилъи-г1ат1илъи борхиги
маг1арулазул умумулъанго батараб лъик1аб г1адат буго. Гьелъие мисалазда хадурги
г1емер рик1к1аде рахъине кколаро. Бокьараб лъугьа-бахъиналда г1агарлъи,
мадугьаллъи, росу-жамаг1ат ва х1атта цогидал росабалъа г1адамалги цадахъ
лъугьун гьабула х1алккаралъуб кумек. Дагьал церег1ан къояз г1алхуде арал
лъималаз бакараб ц1а свинабич1ого теялъ к1удияб заралалде бачине бахъана
гьец1елдерил жамаг1ат. Заманалда свинабизе к1веч1ебани, гьеб цо нижер росдае
гуребги сверухъ ругел мадугьалзабазеги г1ахьаллъилаан. Бух1улеб бук1ана
харибак1ги, г1и-боц1и кваналеб мег1ер г1алахги, ц1адул цересел карачелал росда
цебе бугеб балада нахъе, рохьобеги щолеб бук1ана. Ц1а свинабизе рахъарал
нижерго г1олохъабазул х1ал г1олеб бук1инч1о. Декабралъул авал бук1аниги хинаб
къоялъ бакъвараб хер-х1еталда рек1араб ц1а цо лах1заталдего т1ибит1улеб бук1ана
сверухълъиялда. Гьеб мехалъ х1укму ккана мадугьалзабазде ах1и базе. Т1анусдерил
бегавул Мух1амадов Будайханица данде гьарун жидерго ва г1ебт1адерил
г1олохъабигун, к1удияб къокъа бач1ана нижее х1алае. Цадахъаб къуваталдалъун
бажарана ц1а свинабизе ва къаси кват1араб г1ужалъ руссана росулъе. К1удияб
заралалдаса рорч1ана к1ия-лъабабго росдал жамаг1атал. Гьаниб баркала кьун
киназулго ц1арал хъвани сиях1 к1удияб лъугьина, гьединлъидал живго Будайхание,
т1анусдерил ва г1ебт1адерил т1олалго г1олохъабазе рак1-рак1алъул баркала. Къо
ккаралъур ратулел лъик1ал мадугьалзаби, сахлъиги рокъоб талих1 рохелги нужее.
М.Х1ажимух1амадов, Гьац1алухъ росдал администрациялъул
бет1ер.
|
