Исана 77 аб. нухалдаги тlолабго дунялалда кlодо гьабуна гитлерилаб Германиялда тlад бергьенлъи босараб къо - 9 май. Лъиего балъголъи гуро гьеб Кlудияб Бергьенлъиялъулъ аслияб бутlа нилъер улкаялъул букlин ва Россиялда гьеб ккола хlакъикъаталдаги мукъаддисаб байрам. Кидаго гlадин исанаги нилъер районалда гlатlидго кlодо гьабуна 9 май.
Байрам тlаде щвелалде цересел къояздаго субботникал тlоритlун, баннерал ран, рагъул гlахьалчагlазе рарал памятниказда сверун бакlа-бахари гьабун, къачlа-кlатlан, хlадурун букlана тlолабго район ва хасго райцентр. Байрамалъул къоялъ радалго Хунзахъ райадминистрациялда цебе батlи-батlиял школаздаса цlалдохъабигун учительзаби ва росабалъа гlадамалги данделъун байбихьана “Хвел гьечlеб полк” гlуцlизе. Гьедин рагъда гlахьаллъи гьабурал жидерго умумузул сураталгун, байрахъалгун райцентралъул аслияб къотlносан киналго гочана Кlудияб Ватlанияб рагъул гlахьалчагlазе бараб памятникалде аскlоре. Гьениб районцоязда байрамги баркун кlалъаял гьаруна районалъул бетlер Нурмухlамад Задиевас, Хунзахъ бугеб рагъулаб часталъул начальник, полковник Илья Ермолаевас, районалъул рагъулав комиссар Шамил СагIадулаевас ва цогидазги. Митингалдаса хадуб киналго къо къана Бергьенлъиялъул къоялде гlуцlараб районалъул росабазул командабазда гьоркьосеб волейболалъул турниралъул финалияб хlаялъухъ балагьизе Р. Хlамзатовасул цlаралда бугеб спортивияб комплексалде. Кlиго къоялъ халат рахъарал хlалуцарал хlаязул хlасилалда данде ккарал командабиги къезарун финалияб хlаялде рачlун рукlана Хунзахъ ва Гьамущи росабазул командаби. Гlезегlан захlматаб ва хlалуцараб хlаялъул хlасилалда 3-1 хlисабгун дандиязда тlад бергьенлъиги босун, чемпионлъун бахъана райцентралъул команда. Лъабабилеб бакl ккуна Тlануси росдал волейболистаз. Бергьараб ва призалъулал бакlал ккурал командабазе кьуна кубок, медалал, грамотаби ва гlарцулал сайгъатал. Гьединго 8-9 маялда тlобитlана эркенаб гугариялъул рахъалъ 2004 соналъ гьарурал ва жеги гlисинал гlолилазда гьоркьоб районалъул первенствоги. Призалъулал бакlал ккурал гугарухъабазе кьуна грамотабиги гlарцулал сайгъаталги. Гьебго къоялъ районалда тlобитlана “Георгиевская ленточка” акцияги. Гьелда районалъул волонтераз р а й а д м и н и с т р а ц и я л ъ у л хlалтlухъабазе ва халкъалъе рикьана азаргогlан ленточка. Митингалдаса хадуб гlадатлъун лъугьахъе “Гlалагlарт” майданалда тlоритlана чуял риччаялъул тадбир. Исана къецазда гlахьаллъи гьабуна 28 чуялъ. Гlаммаб къагlидаялъ чуял риччана 2, 3, 5 ва 7 сверабазда. 7 сверуда бергьана Гlахьалчlиса Мухlамадов Хlайбулагьил чу, 5 сверуда тlоцеве финишалде вачlана Гумбет районалъул Килалъ росулъа чот1ахъан, 3 сверуда бергьенлъи босана Болъихъ районалъул Муни росдал цlаралда биччалеб букlараб Тlанусиса Мухlамадов Мухlамадил чуялъ. Юргъадул тайпабазул чуязда гьоркьоб кlиго сверуда бергьенлъи босана Унсоколо районалъул Рихьуни росулъа чотIахъанас. Гьединго Хунзахъ росдал гlолилазул чотlахъабазда гъорлъ тlоцебесеб бакl босана Муъминов Шамилил чуялъ. Бергьаразе кьуна гlарцулал сайгъатал ва горбода рана ролъул горал. Районцоязда байрам баркизе рачlаразул кьералъ рукlана рукlана ДРялъул Спорталъулгун физкультураялъул министр Сажид Сажидов, нилъер ракьцоял, федералияб казначействоялъул ДРялда бугеб управлениялъул нухмалъулев Гlабдулпатахl Гlамирханов, Пенсиязул фондалъул республикаялъул отделениялъул нухмалъулев Мухlамад Гlисаев, ТФОМСалъул нухмалъулев Ахlмад Гьудов ва цогидалги.
И. МУХIАМАДОВ
|