Лъик1ав тохтур-гьев ккола г1иц1го
унтарасул унти лъалев ва гьесие данде кколеб дару-сабаб гьабулев чи гуревги,
х1еренаб раг1удалъун, недегьаб, адаб бугеб балагьиялдалъун,
т1алаб-агъазалдалъун унтарасул рек1ел х1ал борхизабизе, сахлъиялде, г1умруялде
гьесул божилъи ва рек1елч1ей ц1ик1к1инабизе к1олев тохтур. Гьединаллъун ругилан
тана дица Хунзахъ больницаялъул Шейхов Мух1амадица нухмалъи гьабулеб
коллективалда ругелщинал х1алт1ухъабиги. Чорхол сахлъи гьеч1олъиялдалъун ккана
дун райбольницаялде ва бит1ахъего абуни, асир гьаюна райбольницаялъулазул
унтараздехун бугеб бербалагьиялъ. Медиказул ц1ик1к1унисел руччаби кколелъул,
рак1-рак1алъ бокьун буго гьезда киназдаго баркизе т1аде щвараб руччабазул къо-8
март ва гьаризе дунялалда кинабго лъик1абщинаб. Хасаб баркала буго
больницаялъул хъах1маккал: «Хехаб кумекалда» х1алт1улел тохтурзабазе: Заремае,
сестра Башатие, гьединго, терапиялъул ясал: Мусаева Зулейхае (гьей унго-унголъунги
йиго инсанасул сахлъи ц1унизе йижарай г1адан. Къаси-къадлъи бат1алъи гьеч1ого,
дир т1убан мадар лъугьинег1ан цееса ягъарич1о гьей сахай маг1арулай,
медсестраби Марямие, Сидратие, Г1ободаса Бикайнатие, Хунзахъа Раисатие, к1удияй
сестра Х1амзатова Пат1иматие, санитаркаби Ирайсатие, Умакусумие, лъабайго
Пат1иматие… ц1ар-ц1ар ккун рехсеч1ониги, киналго терапиялъул х1алт1ухъабазе.
Заведующаяги гьелъул нухмалъиялда гъоркь ругелщиналги руго калам х1еренал,
унтаразе къвариг1арабщинаб ч1езабулел г1адамал. Лъик1аб бук1ана больницаялда
бук1араб квен-т1ех, дару-сабаб, рац1а-ракъалъи. Щибаб къойил унтарал ц1ехезе
хьвадулаан живго больницаялъул нухмалъулев Мух1амадги (Аллагь разилъаги
гьесдаса!). Бук1аниги, рагьдухъ март моц1ги бугелъул, бихьинал берцин гьаризе
рижарал жал руччабиги кколелъул, бокьун буго газета гьоркьоб ккун,
больницаялъул хъулухъалъе ратаралщинал ясазда байрамги баркизе, гьезул щиялъе
талих1гун рохелги гьаризе. Баркала нужее, дир хъах1ал маккал, таги нуж рек1ее
бокьухъе таманал саназ!
Баркула нужеда, 8 март,
Т1урайги х1асратал рек1ел мурадал,
Нужер х1урматалда х1ур к1ут1угеги,
Нужер къадруялъул къимат хогеги!
Рагьарал гьурмазда гьими рекъарал,
Г1адамалъ х1еренал, х1алт1улъ
мух1канал,
Таги нуж бокьухъе хъизан-лъималгун,
Аллагь разилъаги, рохун хут1аги!
Г1исаева Саг1идат, Г1арани росу.
|