Ват1ан ц1унулезул къоялде Г1арани гьоркьохъеб школалда
т1обит1ана байрамалъулаб тадбир. Школалде лъималгун дандч1вазе ах1ун вук1ана
Х1айбулаев Мух1амадрасул. Гьес бицана рагъул заман жиндир лъимерлъиялде
кканилан: «Дун вуго рагъул лъимер».
Лъимерлъи бук1ана ц1акъго къваридаб, кисадай щиб бугониги
кваназе жоян рук1унеб.
Ихх кидадай щвелаян рук1унаан ниж 7-8 сон барал чаг1и, гьеб
мехалъ бегьулаан ракь бик1а-бишизе хут1араб картошка гьеч1ищали, г1абк1ил
т1амахалъул кьалбал рахъулаан.
Т1ад рет1ине хьитал къанаг1ат гурони рук1инч1олъиялъ
хьвадулаан дуниял хинлъаралдаса нахъе х1ат1ал г1иц1го. Х1ат1ал рук1унаан
хъарс-хъарсун, кьват1-кьват1ун, къаси чурулеб мехалъ ссудулаан. Гьединан
ракъиялъги, зах1малъиялъги льадарун рук1ана лъималги, г1олохъабиги.
Квине жо бокьараб мехалъ гьеч1олъиялъ, дагьа-макъаб жоги
босун гьабихъе гьеб ххине унаан, гьенир рук1унаан г1емерал руччаби-г1ат1 ххине
рач1ун.
Хасалихълъиялдехун бач1унаан дагьаб бигьалъи, барщулаан
гьоло, горох, къвали, картошка кваналаан цо-цо гъуниялда хьибилалдасан бик1ун
ракьгун, кинабго бахъич1ого.
Гьединаб зах1матаб заман бук1аниги г1адамал цоцаздехун лъик1
рук1унаан, гьанжейин абуни бокьараб квине, рет1ине буго, амма г1адамал
хъач1лъун руго.
-Лъимал, нужеда бихьизе хъван батугеги рагъги
«ракъи-къечги». Мух1амадрасулил к1алъаялдаса хадуб 7-абилеб классалъул васаз
ах1ана кеч1. Хадуб рук1ана 10-11-абилел классазда гьоркьор Сайгидов Мух1амадица
х1адурарал къецал. Автомат биххулеб-бак1арулеб къецалда бищунго лъик1аб заман
бихьизабуна 11 б классалъул ц1алдохъан Мух1амадов Сайгидх1осеница, гьевго
ц1алдохъанасе ккана бищун ц1ик1к1арал баллал г1ужт1е кьвагьиялъеги. Бищун
ц1ик1к1ун турникалда ц1ана 11 б классалъул ц1алдохъан Т1алх1атов Мах1муд,
отжиманиялъе бищун лъик1ал х1асилал рихьизаруна 11а классалдаса Мух1амадов
Х1амзатица.
Ч1ах1иял классазул ц1алдохъабаз бихьизабуна жидерго махщел,
къуват, г1ужиллъи. Гьезул къецазда гьоркьоб 8-9 классазул лъималаз ах1ана
рагъухъабазул бах1арчилъиялъул х1акъалъулъ куч1дул.
Къецазул ахиралда х1асилал гьаридал бергьана 11 б классалъул
команда, к1иабилеб бак1 щвана 10а классалъе, лъабабилеб бак1 11 а классалъул
командаялъе. ОБЖ-ялъул учитель мух1амад Мух1амадсайгидовичас къецазда
г1ахьаллъарал командабазе г1арцул сайгъатал кьуна. Гьел кьуна директор С. Мусаевас
ц1алдохъабазда бергьенлъиги баркулаго абуна: «Цере рук1арал ц1алдохъаби
къуватал рук1ана, дагьабги лъик1 кинабниги бажаризе, лъазе х1аракат бахъизе
ккела»- ян. Гьеб байрамалдаса разиго хут1ана ц1алдохъабиги, учительзабиги,
т1аде рач1арал гьалбалги.
Школалъул рахъалдасан киназдаго баркула араб 23-абилеб
февралалъул ва гьединго 8-абилеб марталъул байрамал. Гьарула киназего сахлъигун
рохел.
П. Х1ажиева, школалъул учительница.
| 
