Раг1арабищ, вацал, пашманаб хабар,

Муг1рулги г1одулел, г1орал соролел?

Г1инч1арабищ, яцал, рокьукъаб  калам,

Киназулго рак1ал къварид гьарураб.

Къадар щун раг1ула г1алимчиясде,

Г1одич1ого жакъа муъминчи ч1елищ?

Духъ т1ураб маг1ица бакълъадерил вас,

Бацила Дагъистан данде гьабуни.

Бахъа, къалам, къват1иб къо кканин гьанже,

Гьабизин гъазават гъарим ручкаялъ,

Рагье, гьундул, дуца дир гьинал рак1ги,

Гьанже къо бач1анин къваридаб  дуде.

Къулун кагътидегун чвахун маг1угун,

Г1одилаго буго дица гьаб хъвалеб,

Дагъистан ч1ух1арав бакълъадерил вас,

Дуда хадуб т1уна т1олазго маг1у,

Г1абдугъафурил вас, бакълъадерил ц1ум,

Ц1адул бомбаялде кинан мун ккарав?

Рогьалил какиде къват1ив унаго,

Къадар дуй щвелилан щивха вук1арав?

Къаде рузманалде ният бук1инч1ищ

Диналъул вацазе ваг1за гьабизе?

Щиб ваг1за бук1араб, дир диналъул вац,

Диналъул вацазе жакъа бицине.

Къадар Аллагьасул гьукъизе к1велищ?

Щвана къадаралде рузман къоялъ мун,

Къварилъана т1олго муъминал вацал,

Т1уна кинацаго бух1араб маг1у.

Рек1елъ иман бугел угьдана жакъа,

Сапаралъ мун ана нахъ вуссунареб,

Баркатги аниб тун арав ватаги,

Аллагьасул нухда хьвадарав г1алим.

Мун ч1ванилан абун ч1ух1ун ругезда,

Рак1алде щва абе мах1шаралъул къо,

Г1арцухъ  ях1 бичарал чарал гьабзазе

Гьабила Аллагьас жиндирго х1укму.

Мун вижарав росдал жамаг1аталда

Жакъа гьале дица зигара балеб,

Бакълъадерил росу росдал жамаг1ат,

Аллагьасул баркат камуге нужей.

Жакъа нужер росдал къварилъи, вацал,

Нижер рак1аздаги унтун бугеб куц,

Киназего, Аллагь, сабру кье нижей,

Нижер г1алимазул рух1 бохиледухъ.

Х1абибурах1мангун, Ах1мад, Мух1амад,

Аллагьас нужееги  кье, вацал, сабру,

Хъизан Г1ашурае, Г1айшат- ясалъе,

Х1ал к1олев, Бет1ергьан, гьезийги сабру.

Сабру гьеч1ев инсан Аллагьас ц1уне,

Рач1а кинацаго гьабизин сабру,

Рах1имуллагь, жиндир мунагьал  чурад,

Гьев вохулеб х1алалъ ч1елинха, вацал.

Дуй г1адинаб хвелни киса щолеб жо

Киналго урхъараб, Аллагь гурх1араб?

Мун ч1вач1о, мун ч1вач1о, дир диналъул вац,

Дуе бомба гъурав гъов живго ч1вана.

Ч1аго гьаб ракьалда вугонаниги,

Аллагьасде т1амун тела нилъеца,

Дуе г1адаб хвелги, дуй г1адаб хобги,

Бокьа-бокьарасе  кьеч1о Аллагьас.

Устарасда аск1об хобги дуй щвана,

Шагьидасул хвелги маян дуй кьуна,

Аллагь гурх1арасе гуреб щолареб,

Рах1матал Аллагьас дуе рикьана.

Аллагьги гурх1арав, Расул вохарав,

Ахират дуй щвана, дир диналъул вац,

Нижги гьанир ругел гьалбалин кколел,

Нижей кумек гьабе гьенире  щведал.

Шамхалов Гъазичула

Сивухъ росу