 27 июнь лъазабун буго
Россиялъул г1олилазул къолъун.Гьелда
хурхун 28 июналда райцентралда бугеб
спорткомплексалда цебе районалъул г1олилазул комитеталъул х1аракатчилъиялдалъун г1уц1ун бук1ана
байрамалъулаб тадбир. Байрамалде рач1ун
рук1ана районалъул нухмалъулел школазул директорзаби, «Макьаст1а» бугеб г1олилазул лагералда х1ухьбихъи гьабун ругел студентал, нилъерго районалдаса т1адег1анал ва
гьоркьохъел ц1алул заведениязда ц1алулел ругел, исана школа лъуг1ун унел ва Хунзахъ росулъа г1адамал.
Г1олилазда гьезул байрамги баркун, гьезие талих1-рохелалъул
ц1ураб г1умруги гьарун байрамалъулаб тадбир рагьана райадминистрациялъул бет1ерасул заместитель Г1абдуразакъов Асадг1алица. Парахатаб, берцинаб г1умруги,
сахлъи, ц1алулъгун бук1инесеб х1алт1улъ бергьенлъабиги, кинабго лъик1абщинабги
гьарун, бит1араб нухдасан аян насих1аталги гьарун г1олилазда байрам баркарал к1алъаял гьаруна районалъул нухмалъулев Дарбишев Х1ажияс, районалъул лъай кьеялъул управлениялъул начальник Г1умаров
Залумханица, Бакьагьеч1и гьоркьохъеб школалъул директор Мух1амадов Т1инч1ас ва
ДГИНХалъул (нархозалъул) вакил Мух1амадов
Х1амидица. К1алъаяздаса хадуб Х1ажияв Мух1амадовичас цереги ах1ун
баркалаялъулал раг1абиги абун медалалги аттестаталги кьун к1одо гьаруна исана т1ок1лъигун школа лъуг1арал г1олилал.
Меседил медалал
щвана: Хунзахъ № 1 гьоркьохъеб школалдаса Мух1амадова Кариматие,
Чункъова Бахуе, Пахрудинова Лаюзае,
Хунзахъ № 2 гьоркьохъеб школалдаса
Г1амирова Сидратие, Г1ахьалч1и гьоркьохъеб школалдаса Г1абдулаева Рисалатие, Буц1ра гьоркьохъеб
школалдаса Мух1амадова Чакарие, Т1агьада гьоркьохъеб школалдаса Саг1адуева Урузмагие, Уздалросдал
гьоркьохъеб школалдаса Раджабова Сидратие, Г1арани гьоркьохъеб школалдаса
Х1усейнова Зайнабие, Бакьагьеч1и гьоркьохъеб школалдаса Г1абдурах1манова Пат1иматие ва Насух1ова
Умалх1айбатие.
Г1арцулал медалазе мустах1икълъана: Г1арани
гьоркьохъеб школалдаса Х1айбулаева Мадинае, Т1ануси гьоркьохъеб школалдаса
Мух1умаев Мух1умае, Хунзахъ № 1 гьоркьохъеб школалдаса Локалова Хъандулалъе ва № 2 гьоркьохъеб школалдаса Х1айбулаева Зулх1ижатие.
Официалияб бут1аялдаса хадуб
байбихьана концерталде. Г1олилазда гьезул байрам баркун куч1дул ах1изе
рач1ун рук1ана Мах1ачхъалаялдаса артистал: Руслан Мух1амадов, Насрула ва
Хатима. Гьездаса къеч1ого куч1дул ах1ана
нилъерго районалъул культураялъул
х1аракатчаг1азги – Г1айшат Тажудиновалъ, Пат1имат Султ1ановалъ, Парихан
Мусаевалъ ва цогидазги. Дунял рук1к1ун хадубги къот1ич1о ах1улеб коч1ол
гьаракь, нахъалъаг1анги рук1ана кьурдулел, кеп-ихтилат гьабулел г1олилалги. Байрамалъул ахиралда
данделъаразда къеда бараб проекторалдасан бихьизабуна араб соналъ
Мах1ачхъалаялда т1обит1араб районалъул
форумалъул цо бут1а. Гьедин лъик1аб аваданлъиги х1ухьбахъиги
гьабун, жидеего г1уц1араб байрамалдаса
разиго ана г1адамал рокъо-рокъоре.
П. Гунашева
|
