 23 февралалъул байрамалде рач1унаго щибаб соналъ гьелъул
х1урматалда районалъул лъай кьеялъул г1уц1абазда т1орит1ула бат1и-бат1иял
тадбирал. Гьездалъун бечедаблъун бук1ана Хунзахъ № 1 гьоркьохъеб школалда
т1олабго февраль моц1. Бицинин гьезул чангоязул х1акъалъулъ.
Лъабабго 9-лел классазул ц1алдохъабаз г1уц1ун бук1ана
К1удияб Ват1анияб рагъул г1ахьалчи М-р Гьиматовасулгун дандч1вай. Жиндирго
к1алъаялда Мух1амадрасулица т1аде щвараб байрамги баркун, рак1алде щвезабуна
40-лел соназ жинцаго нахъа тараб рагъул нух: «Анкьго класс дица лъуг1изабуна
гьаб школалда. Киналго учительзабиги рагъде ун, дарсал кьезе ккана
нижеде-дицаги учительлъи гьабуна Хьини росдал школалда. Бищун ч1ах1иял камиял
ккараблъун бук1ана к1иабилеб дунялалъул рагъ: гьелъул х1асилалда дунялалдаса
т1аг1ана 50 млн. чи, нилъер улкаялдаса 27 млн. чи, ч1унтана г1емерал шагьарал,
т1убан рух1ун ракьалдасаго т1аг1ана росаби. Хунзахъ росулъа рагъде ана 260 чи, т1ад руссана гьезул бащдал. 1942-43
соназ нилъер районалда байбихьана жидеего бокьун г1олохъаби рагъде ине. Гьедин
унезда гьоркьов вук1ана дунги. Гьаниса бахъараб Шураре щвезег1ан ниж ана
лъелго, к1иго чиясда гьоркьоб цо чу бук1ана т1ад къайиги лъун бачун. Рагъда дун
вук1ана топограф-вычислителлъун.» М-р Гьиматовас рицана рагъда ккарал
лъугьа-бахъинал, рак1алде щвезаруна живго щварал шагьарал, ц1алдохъабазе
насих1ат гьабуна жидер росу, ракь ч1ух1арал ирсилаллъун рук1аян.
Ц1алдохъабаз 23 февралалда хурхун х1адурун бугоан
церерахъинги-гьез рик1к1ана хас гьарун гьелде х1адурарал куч1дул. Балагьаразе
ц1акъ рек1ее г1уна лъималаз бихьизабураб вас армиялде вит1иялъул сценкаги.
Гьедин киналго разияб ах1вал-х1алалда лъуг1ана гьеб дандч1вай.
Школалъул к1удияй вожатая Н. Малачиевалъ т1обит1ана 5-8
классазул ц1алдохъабазе пограничниказулгун дандч1вай-гьелде ах1ун рук1ана
Г1арани рагъулаб часталдаса полковник А. Н. Николаев ва подполковник К. М.
Мах1мудов. Гьез ц1алдохъабазда баркана т1аде щвараб байрамги, гьарана гьезие
лъик1абщинабги. 5а, 6б, 7а, 7б классазул ц1алдохъабаз рик1к1ана ва ах1ана
байрамалда хурхарал куч1дул. 6б классазул ц1алдохъабазул 23 февралалде
х1адурараб церерахъин кьуна авар радиоялдеги. Гьалбадерие ц1алдохъабаз кьуна
рак1алде щвеялъе сайгъаталги.
7-9 классазул ц1алдохъаби гьезул классруказ рачун рук1ана
Г1арани бугеб рагъулаб часталде экскурсиялъ. Гьенив х1алт1улев Мах1мудов
Курах1ажица ц1алдохъаби рачана музеялде, бицана гьениб бугелъул х1акъалъулъ.
Хадуб пограничниказ лъималазе бицана бат1и-бат1ияб ярагъалъул х1акъалъулъ.
Ахиралдаги БТРалда цереги ч1ун ц1алдохъабаз рахъана рак1алде щвеялъе сураталги.
| 
