Нилъер ракьцояв БакьагьечIи росулъа гIолохъанав гугарухъан КъурамухIамадов Арсенил бергьенлъабазул хIакъалъулъ рагIичIев чи къанагIатги ватиларо районалда. Гьал гIагарал къоязда (I5-I7 февраль) Украиналъул тахшагьар Киевалда чIахIиял гугарухъабазда гьоркьоб тIобитIараб халкъазда гьоркьосеб турнир Гран-приялдаса Арсен вуссана кIиабилеб бакIгун. Турниралда гIахьаллъана 60 батIи-батIиял улкабаздаса къуватал гугарухъаби-Европаялъул ва дунялалъул чемпионазул цIарал щварал, масала: Америкаялдаса, Ираналдаса, Турциялдаса, Германиялдаса, Азербайджаналдаса, Франциялдаса, Грузиялдаса ва цогидалги улкабаздаса. Россиялъул тIаса бищараб командаялда вукIана микьго гугарухъан. Къецазда гIахьаллъизе щвеялъги тIаса бищараб командаялде вачиналъги бичIчIула цереккун Арсеница чIахIиял цIайи бугел бергьенлъаби росун рукIин. Финалалде вачIунаго А. КъурамухIамадовас бергьенлъи босана Олимпиялъул хIаязул лъабабилев призер Азербайджаналдаса гугарухъанасда тIад, Россиялдаса дунялалъул чемпион Поповасда тIад, СШАялдаса гугарухъанасда тIад, 6 нухалъ Украинаялъул чемпионлъун вахъарав спортсменасда тIад. Сакъат ккун букIиналъ финалалда Арсение рес щвечIо жиндирго махщел букIине кколедухъ загьир гьабизе-гьедин гьев къуна Европаялъул, лъабго нухалъ дунялалъул чемпионлъун вахъарав Грузиялъул гугарухъанасдаса. Россиялъул командаялдаса, Арсенги малъун, гIицIго кIиго гугарухъанасе щвана кIиабилел бакIал. Арсенил бергьенлъи буго гIезегIан кIудияб-55 кг. цIайиялъул гьев речIчIизе ккана гIезегIан къуватал, чIахIиял гугарухъабазде данде. Арсен тIоцебесеб нухалъ гIахьаллъана чIахIиязда гьоркьоб тIобитIулеб турниралда. А. КъурамухIамадовасда гьесул иргадулаб бергьенлъиги 23 февралалъул байрамги ракI-ракIалъ баркулаго, гьарула гьесие сахлъи, талихI, ракIалда ругел мурадал тIурай. Нижерги мурад буго гIолилас хадубккунги чIахIиял бергьенлъаби роси. П.ГУНАШЕВА.
|