Автор И. Мухlамадов. Август 2024 сон.
24 августалда Хунзахъ тlобитlана КПРФалъул районалъул отделениялъул хlисаб кьеялъулгун рищиязул конференция. Гьелда гьоркьор лъун рукlана бакlалъулаб отделениялъ ахирисеб кlиго соналъ гьабураб хlалтlул хlисабкьей, бакlалъулаб отделениялде рищиял тlоритlи ва партиялъул республикаялъул отделениялъул 18 аб. хlисабкьеялъулгун рищиязул конференциялде делегатал рищиязда хурхарал суалал. Конференциялъул хlалтlулъ гlахьаллъи гьабуна партиялъул рескомалъул мугlрузул районазул куратор Нажмудин Хlажиевас, бакlалъулаб отделениялъул тlоцевесев секретарь Къурамухlамад Абухlовас ва цогидалги районалъул коммунистаз.
Данделъаразе саламги кьун, конференция рагьана Къурамухlамад Абухlовас. Жиндирго докдалда гьес гlатlидго бицана бакlалъулаб отделениялъ ахираб кlиго соналда жаниб гьабураб хlалтlул хlакъалъулъ. Гьедин, жакъа къоялде районалда вуго КПРФалъул 89 член. Гьездасан 14 член тlаде вачlун вуго ахираб кlиго соналда жаниб. Амма партиялда гьечlониги, рекlелъ коммунистал районалда гlемер ругилан тlадеги жубана гьес. Партиялъул членазул гьоркьохъеб ригь бахунеб буго 56,3 соналде. Отделениялъул хlалтlи гlуцlун букlуна санайил бюроялъ гlуцараб ва тасдикъ гьабураб хlалтlул планалда рекъон. Хlисаб кьолеб заманалда жаниб ахlун буго бакlалъулал ва батlи-батlиял даражабазул рищиязде хlадурлъиялъиялда хурхун 8 пленум. Гьебго заманалда тlоритlана батlи-батlиял даражабазул рищиялги. Гьедин, бакlалъулал муниципалиял рищиязда коммунистазе щвана 28 мандат. Исана тlоритlарал улкаялъул Президентасул рищиязда КПРФалъул кандидатасе территориалияб рищиязул комитеталъул (ТИК) официалиял баяназда рекъон, районалда щвана гlицlго 5,8 % гьаркьазул, хlатта муниципалитеталда гьесул рахъ кколел гlемерго цlикlкlун рукlаниги. Хlисаб кьолеб болжалалда жаниб партиялъул бакlалъулаб отделениялъ бакlарун буго 38400 гъурущ взносазул. Амма, кин букlаниги, гьеб суал хадуб бехъерхъун хутlун бугилан абуна секретарас. Партиялъул гlемерисел членаз кьолел гьечlила взносал. Муниципалитеталъул коммунистаз жигараб гlахьаллъи гьабула районалъул жамгlиябгун политикияб гlумруялда. Исанаги гъоркьисалаги бакlалъулаб отделениялъул ва партиялъул рескомалъул цадахъаб хlаракаталдалъун районалда тlоритlана руччабазда гьоркьосел волейболалъул турнирал ва призалъулал бакlал ккуразе кьуна шапакъаталги гlарцулал сайгъаталги. Гьединго исана къачlан буго райадминистрациялъуь минаялда цебе бугеб В. И. Ленинил памятникги. Докладалда бицана гьаб заманалъул технологияздасагун бакlалъулал информациялъул алатаздаса пайдаги босун, халкъалда гьоркьоб тlобитlулеб агитациялъулаб хlалтlи цlикlкlинабизе ккеялъулги. Цоги секретарас борхана бакlалъулаб отделениялъе хlажатал шартlалги жанир ругеб, къачlараб кабинет кьезе ккеялъул суалги.
