Площадкаялда командабиги кьералъ чIезарун турнир рагьизе кинабго хIадур бугилан гIуцIиялъул комитеталъул председателасе рапорт кьуна спорткомитеталъул предсе-дателасул заместитель Малачиев Шамилица, капитаназ къецазул байрахъ борхана. ГIахьаллъаразда ВатIан цIунулезул къоги баркун, къуватазе бергьенлъи щвей мурад букIин загьир гьабурал кIалъаял гьаруна райадминистрациялъул бетIер ХI. Дарбишевас, районалъул волейболалъул ветеран ТIанусиса МухIамадов ГIубайдулагьица. Кидаго гIадин турнир рагьи берцин гьабун цере рахъана ГIамирханов Расулица ругьун гьарулел гIисинал акробатал. Кинабниги 8 команда гIахьаллъана турниралда. Щибаб турнир, кинал рукIаниги къецал байбихьилалде гьелъул гIуцIиялъул комитеталъги судьябазул коллегиялъги можороги бахъун, цоцазде данде кколел командабазул тартиб гьабула. Гьедин командаби рикьана кIиго подгруппаялде. КIиябго подгруппаялдасан тIоцебесеб дандчIвай букIана Гъонохъ ва БакьагьечIи командабазда гьоркьоб. Гьениб бергьенлъи гъанхъадерица босана. ХIана ГьоцIалъ-Гьамущи, ГIорутIа-ТIануси ва ЛъагIилухъ-ГIочIло командаби. Гьедин кIиябго подгруппаялъул цоцазда дандчIвачIеб цониги команда хутIичIо. Гьанибго загьирлъизе лъугьана финалалде рорчIизе бегьулел командабиги. Берцинабги гьебго заманалда хIалуцарабги хIай букIана лъегIелдерилги гIечIендерилги командабазда гьоркьоб. Ригьалъул рахъалъ гIолохъанаб букIана кIиябго команда ва ГIочIлоса ХIасан гIадал хIалбихьи бугел игроказ жавабчилъи борхизабун, бергьенлъиялде гъира базабулеб букIана цогидазул. Полуфиналалда хIана ТIануси-ГIорутIа, ЛъагIилухъ-ГIочIло командаби. Финалалда ЛъагIилухъ-ГIорутIа командабазул дандчIваялда баянлъана турниралъул лъабабилеб ва ункъабилеб бакIазул призерал. 2:0 хIисабгун лъугIана хIай ва лъегIел лъабабилел, гIарал ункъабилел призераллъун рахъана турниралъул. ТIаде щвана турниралъул бищунго хIалуцараб хIай. ТIоцебесеб ва кIиабилеб бакIалъе гIоло площадкаялде рахъана ТIанусиги ГIочIлоги командаби. АнцIила цо соналъ турниралъул чемпионлъи чияхъе кьечIел тIанусдерил таваккал букIана кубок жидехъго цIунизе, гIечIен къеркьолел рукIана гьаб нухалъгIаги гьезухъа бергьенлъи бахъизе. Байбихьудасанго хIалуцана гьезул къеркьей. Киназего бокьилеб, берцинаб хIай букIана гьеб. Спорталда къуваталги тириялги бергьуна. Гьеб бихьулеб букIана тIанусдерил ракIа-рахариялъулъги, цоцалъ гъункун хIаялъулъги, гьезул хIалбихьиялъулъги. 3:I хIисабгун бергьана финалалда тIанус ва анцIила кIиабилеб нухалъги турниралъул чемпионаллъун рахъана гьел. ЛъугIана хIаял, судьябазул коллегиялъ къецазул хIасилал данде росана. Гьелдаса хадуб байбихьана турниралъул чемпионалги призералги кIодо гьариялде. Баркиялъул кIалъайгун цеве вахъарав райадминистрациялъул бетIер Дарбишев ХIажияс чемпионазул кубокги тIоцебесеб даражаялъул медалал-грамотабигун гIарцулаб сайгъатги кьуна командаялъул капитан МухIамадов МахIачихъе. Турниралъул кIиабилеб призер - гIечIендерил командаги мустахIикълъана кIиабилеб даражаялъул дипломазеги, грамотабазеги, гIарцулаб сайгъаталъеги. Данде кколеб даражаялъул дипломалгун грамотаби гIарац кьуна турниралда 3 – 4 бакIал щварал ЛъагIилухъ ва ГIорутIа командабазеги. ГIадатлъун лъугьун буго турниралъул бищунго лъикIал игрокал, ай нападающий, распасовщик ва цогидалги кIодо гьари. Гьанжесаги течIо гьел гьоркьор. ГIарцулал сайгъатал щвана ТIануси, ГIочIло, ЛъагIилухъ ва ГIорутIа командабазул лъикI хIарал игроказегун нападающиязе, рапасовщиказеги. Турниралъул призалъул фондалъе сахаватчилъи гьабун гIарац кьуна районалъул коммуналияб магIишаталъ, Кизилюрталъул ВТЭКалъул нухмалъулев ГIалибегов ГIамирица, БуцIрасан райсобраниялъул депутат ГIабдулвагьабов ГъазимухIамадица, росдал магIишаталъул министрасул заместитель С. ГIабдуразакъовас, предприниматель МухIумаев Гъазайилас, спорткомитеталъ ва цогидазги. Р. ХIАМЗАТОВ.
|