Хунзахъ район машгьураб буго жидер поэтаздалъун ва хъвадарухъабаздалъун. Хlакъикъаталдаги гьелда абизе бегьула рагlул устарзабазул къебелъиян. Гьеб тасликъ гьабуна араб соналъ Россиялъул хъвадарухъабазул Союзалъ адабияталдагун маданияталда цере рихьизарурал тlокlлъабазе гlоло ва адабият цlуниялъегун бечед гьабиялъе гlоло нилъер районалъе кьураб “Россиялъул литературияб район” абураб хlурматияб цlаралъги.

Исана 90 сон тlубала ДРялъул Халкъияй поэтесса, Андрей Первозванныясул орденалъул кавалер ва жеги рикlкlен гlемерал шапакъатазе мустахlикълъарай Фазу Гlалиева гьаюралдаса. Республикаялъул ва тlолабго улкаялъул адабияталъул борхалъуда хасаб гвангъилъун кенчlолеб буго Фазу Хlамзатовналъул цlар. Гьей гlадатияй магlарул чlужугlаданалъухъа бажарана адабияталъулги жамгlияб хlалтlулги цеехъанлъун лъугьине. Гьелъул асаразулъ дандчlвала кочlохъе хъвараб хабарги, харбихъего хъвараб шигlруги. Гьел гlемерисел руссарал руго Ватlаналде бугеб рокьиялде, халкъазда гьоркьосеб рекъел, гьудуллъи ва гlаданлъи цlунизе ккеялде. Шагlиралъ кидаго хlаракат бахъулаан жамгlият рагъ-кьалалдаса ва тунка-гlусиялдаса цlунизе. Гьединал хlалуцарал бакlазда хlалае ратулаан гьелъул рагlаби. Фазу Гlалиевалъул тlахьазул къадар 100 тlаде ана ва гьел руссинарун руго 68 батlиял мацlазде.

Гьединго нилъеца 90 сонилаб юбилей кlодо гьабуна Дагъистаналъул Халкъияв шагlир Гlабасил Махlамад гьавуралдасаги. Гьесул росуцоязда ва гьудул-гьалмагъзабаздагун цадахъ хlалтlараздаги лъала гьев кигlан ракl гlатlидав, аваданав, гьобол - гьудул хирияв чи вукlаравали. Гlабасиласул творчествоялдаги кlудияб бакl ккола гlагараб магlарул ракьалде, гьудул-гьалмагъзабазде ва чlужугlаданалде бугеб рокьиялъ.

Районалъул нухмалъиялъ хадубккунги бажарараб хlалтlи гьабизе буго адабияталда жидер цlарал меседил хlарпаздалъун хъварал нилъер машгьурал шагlирзаби халкъалъул рекlелъ цlуниялъе ва гьезул рухlияб ирс наслабазухъе кьеялъе.