Гуманитарияб ва тарихазулаб лъай кьеялъул «Точка роста» ян ц1ар тарал централ рагьун руго, В. Васильевасул т1адкъаялда рекъон, Дагъистаналъул 168 росдал школалда. Гьел ккола техникияб прогрессалъул киналго т1алабазе жаваб кьолел ва лъай кьеялъул даража борхизабулел кабинетал. Щибаб кабинет хьезабун бук1ине буго интерактивияб къайи-ц1аялдалъун, хасал компьютераздалъун, 3d принтераздалъун, квадрокоптералдалъун, видсова суратал рахъулеб техникаялдалъун ва г1емераб цойгидаб, советияб заманалъул школлъималазда бихьич1ебщинаб, къайи-ц1аялдалъун. Гьениб ц1алдохъабазда малъизе буго жидецаго программаби, проектал ва приложениял г1уц1изе, суратал ва репортажал рахъизе.

Гьаб лъаг1алида жаниб лъай кьеялда цебет1еялъул карачеллъун кколеб «Точка роста» программаялъ гъорлъе рачине раг1ула 60 азарго республикаялъул школлъимал.

Хадубккунги щибаб росдал школалда гьединал кабинетал ч1езаризе рак1алда раг1ула республикаялъул т1алъиялда.

Гьаб анкьил байбихьуда т1адехун бицен гьабулеб лъай кьеялъул центраз к1и-к1и кабинет рагьана районалъул Г1обода гьоркьохъеб школалда ва Г1арани рагъулабгун спортивияб лицеялда. Цебеккун Гьамущи школалдаги рагьун бук1ана гьеб. Жакъа къоялде гьел школазе босун буго 1,6 млн. гъурущалде къайи-ц1а. Нилъер лъималазеги рес щвана школалъул партаялдасанго жалго церет1ураллъун, гьаб заманалъул т1алабазде данде кколеб пикру-лъай бугеллъун куцазе. Аллагьас борхизабеги лъай кьеялъул ва гьеб босиялъул къадру-къимат.