11 октябралда Украинаялда тlобитlулеб хасаб рагъулаб операциялда гlахьаллъи гьабизе унезул иргадулаб къокъа нуха регlана районалъ. Гьеб къоялъ армиялде тlовитlана цоги лъабго гlолилав. Мобилизациялда рекъон, гlаммаб къагlидаялъ, жакъа къоялде хасаб рагъулаб операцияла гlахьаллъи гьабизе витlун вуго районалдаса 47 гlолохъанчи.

Армиялде унел гlохъабаздехун ва гьел нуха регlизе рачlарал эбел-инсудехун ва гlага-божараздехун кlалъай гьабуна районалъул бетlерасул заместитель Асадгlали Гlабдуразакъовас.
“Февралалда Украинаялда хасаб рагъулаб операция байбихьаралдаса нахъе, нилъер районалдаса контракталда рекъон рагъулаб хъулухъ тlубазабулел ругел 400 ялдасаги цlикlкlун чияс гlахьаллъи гьабулеб буго гьениб. Жакъаги нилъер Ватlаналъул хlинкъи гьечlолъи цlунизе витlулев вуго 3 гlолилав. Гlемер рагlулел руго районалъул нухмалъиялде ва военкоматалде гlайиб гlунтlизабун, гаргадулел гlадамал. Амма киназдаго бичlчlизе ккола, гьеб районалъул нухмалъиялъ ургъараб ва нижее бокьун гьабулеб жо гуреблъи. Тlолабго Дагъистаналдагогlадин, нилъер районалъеги кьун буго хасаб наряд ва нилъеца гьеб тlубазабизеги ккола. Узухъда, ратила ричlчlуларел суалал ва цо-цо гъалатlал. Кlудияб гьари буго армиялде унел нилъер гlолохъабаздехун нужерго командиразухъ гlенеккеян. Щайгурелъул, нужер жаваб кьолев чи ккола гьев. Гьедин, Дагъистаналъул гlолохъаби командирзабазухъ гlенеккулел гьечlилан гlарзал руго. Нижеца нужергун бухьен тlезе тезе гьечlо. Районалдаса хасаб рагъулаб операциялде арал киналго гlолохъабиги гъорлъе рачун гlуцlун буго хасаб группа. Ретlел-хьит батичlониги, квен-тlех, ярагъ-матахl ва цогидабги хlажатаб жо щолеб гьечlониги, гьениб нилъер ракьцоязул рес буго жидерго гlузрабазул хlакъалъулъ нижеда лъазабизе. Нижеца хlаракат бахъизе буго гьезул суалал тlуразе. Цоги гьари буго, ресалда рекъон, нужерго рукъалъул агьлугун ва гlага-божаралгун бухьен къотlизе тогеян. Нужер ургъалида рукlунелъул гьел кидаго. Нужеда ракlалде ккоге нужги ритlун, цогидал анир тезе ругилан. Гьечlо. Законалда рекъон цо бутlаялъулаб мобилизациялде гъоркье кколел киналго ахlизе руго военкоматалде ва гьезда гъорлъа хасаб комиссиялъ тlаса рищизе руго армиялде ритlизе ругел. Нужее нухал ритlаги, кlванагlан хехго чlаго-гlатlго ва сах-саламатго тlадги руссаги”, - ян абуна гьес.  

И. Мухlамадовас.