Кватlичlого улкаялда байбихьизе буго ихдал призывалъул компания. Районалда гьелде унеб бугеб хlадурлъиялъулги, ахирисеб хаслихъе призыв районалда араб къагlидаялъулги нижее бицана районалъул бетlерасул заместитель, резервалъулаб комиссиялъул председатель Асадгlали Гlабдуразакъовас.
-Дие бокьилаан жакъа Ватlаналда цебе тlадаб борч тlубазабизе нилъер гlолохъаби ритlиялда хурхун ругел гlузраби загьир гьаризе. Районалъул призывалъулаб комиссиялъул председатель ккола живго муниципалитеталъул нухмалъулев, заместитель ккола военком, комиссиялъул членаллъун ккола РОВДялъул начальник, лъай кьеялъул, сахлъи цlуниялъул ва цогидалги бутlабазул вакилзаби. Жиндирго хъулухъалъулал ишалги тlуразаричlого, кидаго районалъул бетlер гьеб комиссиялда гlодов чlун бажарулареллъул, гlемерисеб хlалтlи бараб букlуна резервалъулаб комиссиялда.
Гьедин араб соналъ хаслихъе призывалъул комиссия байбихьана 1 ноябралда. Гlаммаб къагlидаялъ нижеца районалде битlун букlана 933 повестка. Гьездасан комиссиялде вачlана гlицlго 198 чи. Гьезулги армиялде витlана 50 чи. Гьеб къадар гlезабулагоги ниж дандчlвана цlакъ кlудиял захlмалъабигун. Щайгурелъул, цоял эбел-инсуца ва гlага-божараца риччаларого, цогиял жалго рахчарун, гlемерал квекlенал ккана хаслихъе призыв тlобитlулаго. Цо-цо ккана нижеда кlалалги гьикъун, квешезегогlадин рахчарун, инжитал ишал гьарурал гlолохъабиги. Гьединазул сияхl нижеца ихтиярал цlунулел органазде кьуна.
Руго мисалияб къагlидаялъ жидеца план тlубазабурал росабиги. Гьединазда гъорлъ рехсезе бегьула Хунзахъ, Тlануси, Лъагlилухъ, Гьоцlалъ ва Харахьи росаби. Кlудияб баркала буго гьел росабазул бегавулзабазеги жамагlатазеги ракlбацlцlадго Ватlаналда цебе тlадаб налъи тlубазе хlадурал гlолохъаби куцаралъухъ. Амма гьаниб рехсечlого гlоларо гьеб ишалда сверухъ букlине кколеб хlалтlи гьабичlел Гlочlло, Мущули, Гlоркlачlи, Шотода ва Мочlохъ росабиги. Гьел росабалъа цониги гlолохъанчи инчlо армиялде.
Исана ихдал призыв байбихьизе буго 1 апрелалда. Гьабсагlаталда военкоматалда унеб буго армиялде ахlизе рес бугел гlолохъаби рагъулаб учеталда лъеялъул хlалтlи, хlадурулел руго сияхlал.
-Дур хlисабалда, армиялде ине гlолохъабаз инкар гьабиялъе гlилла щиб?
-Гьелъие аслияб гlилла буго эбел-эменги жалго гlолохъабиги Украиналда унеб бугеб хасаб рагъулаб операциялда гlахьаллъи гьабизе ритlилин хlинкъи. Амма гьеб мекъаб пикру буго, щайгурелъул, лъагlалил болжалги лъугlун, контрактги хъван гурони, гьел рагъулал тунка-гlусиял унел зонаялде ритlизе рес букlуларо. Узухъда, тlоцебе спецоперация байбихьидал, цо-цо гьединал хlужабиги ккун рукlиндал, гlадамал божилъи хун батила. Амма пачалихъалъул тlадегlанаб рагъулаб нухмалъиялъ чанцlулго бицана гьениб гъалатl ккун букlанилан ва хадубккун гьединал хlужжаби такрарлъизе гьечlилан. Цо рахъалъ дида бичlчlула эбел-инсул бугеб рахlат хвейги. Амма нилъеда лъазе ккола Ватlан цlуни щибав бихьинчиясда тlадаб борч кколеблъи. Гьезул бакlалда руччаби ритlун бажаруларелъул Ватlан цlунизе.
И. Мухlамадов.
|