19 июналда райадминистрациялда т1обит1ана администрациялъул коллегиялъул иргадулаб данделъи. Гьелда г1ахьаллъи гьабуна районалъул бет1ерас, гьесул заместителаз, администрациялъул отделазул нухмалъулез, росабазул бегавулзабаз ва цогидазги. Данделъиялда гьоркьор лъеялъе росун рук1ана сентябралда т1орит1изе ругел рищиязде х1адурлъи, приоритетниял проектал г1умруялде рахъинари ва росабазул налогазул базабазул актуализация гьаби, физическиял лицабазухъа ракьул ва мал-мулкалъул налогал рак1ари.
Т1оцебесеб суалалда хурхун к1алъазе вахъана райадминистрациялъул юрист Г1абдулаев Х1асан. Гьес бицана рищиязул комиссиязе кумек гьабизелъун районалда 11 чиясдасан штаб ва 57 участкаязулаб комиссиял г1уц1ун ругилан, гьезда гьоркьоса 14 участок бугила гъутабазда. Киналго районалда ругел избирателазул къадар бащалъулеб буго 20361 чиясда.
К1иабилеб суалалда хурхун баян кьуна районалъул проекталъулаб офисалъул нухмалъулев Зайнудин Гьит1иновас. Жиндирго к1алъаялда гьес г1ат1идго бицана щибаб проекталда хурхун районалда гьабулеб бугеб х1алт1ул. Гьеб х1алт1ул х1асилалда, приоритетниял проектал т1уразариялъул рахъалъ гьаб соналъул т1оцебесеб бащалъиялда нилъер район бач1ун буго бищун лъик1ал х1асилал рихьизарурал анц1го районалъул сиях1алде гъорлъе.
Росабалъ налогазул базабазул актуализация гьабиялъул ва физическиял лицабазухъа ракьазул ва мал-мулкалъул налогал рак1ариялъул бицана районалъул нухмалъулесул заместитель Саг1адула Батировас. Гьесул баяназда рекъон, исана т1оцебесеб июналдаса байбихьун 180 материалалда рекъон межевание гьабун буго. Гьебго заманалда жаниб 42 ОКСалъе ва 38 ракьул участкабазе гьарун руго зеленкаби. Исана т1оцебесеб кварталалда физическиял лицабазухъа ракьул ва мал-мулкалъул налогазул бак1арун буго 93140 гъурущ г1арцул, ай гьеб рахъалъ план т1убазабун буго 122 %.
Данделъиялъул ахиралда г1одобе бичараб ах1вал-х1алада араб рак1 рагьараб гара-ч1вариялда Саг1ид Камиловичас гьаруна т1адкъаялги бадибч1вай гьабуна х1алт1улъ тасамах1лъи биччарал жавабиял г1адамазеги ва ч1ван-къот1арал жавабал кьуна х1алт1уда хурхун данделъараз загьир гьарурал суалазеги.
И. Мух1амадов.
| 
