 Х1урматиял редакциялъул
х1алт1ухъаби, рак1-рак1алъ нужее саламги кьолаго, бокьун буго нужер
газеталдасан дир гьудул, нужерги ракьцояв ва гьудул, гьунар т1ок1ав шаг1ир ва
унго-унгояв г1адан Г1абасил Мах1амадие гьаб цебераг1игун куч1дул сайгъат
гьаризе.
Нужеде адабгун Шарапудинов Г1иса,
Гумбет район.
Г1абасил
Мах1амадил
шиг1руялъул къебелъиялъул бицинеги гьеб рагьизеги ккани, гьелъие х1ажалъула г1емерал
сонал ва к1удияб гьунар. Гьесул х1акъалъулъ бицине ва хъвазе, гьев вихьич1ел, гьесул творчество ц1алич1ел
чаг1азда бич1ч1уларо. Г1абасил Мах1амад цох1о шаг1ир гуревги, г1асрабаз
шаг1ирзабазе, г1адамазе мисаллъун хут1изе вуго.
Хъвадарухъабиги, поэталги г1емерал
рахъуна, уна, амма Г1абасиласул г1адин т1ок1лъи- г1емеразе щолеб жо гуро.
Гьесул т1ок1лъи буго киназдасаго, гьев вуго г1адатияв, г1адан хирияв ва
г1адамазе ва хасго шаг1ирзабазе ва г1олохъанал
шаг1ирзабазе кумекалъе вахъун ч1ч1арав чи. Абизе бегьула 30-35 соналда жаниб
г1емерисел Дагъистаналъул шаг1ирзаби Г1абасиласул къебелъухъан арал ва гьенир
куцарал ругилан абун. Цо-цоязе гьедин абизеги бокьуларо, х1атта гьес кверги
ккун шиг1руялъул нухде рачаразеги.
Дагьал ратила гьесул кверзукьан инч1ел т1ахьалги гьесул кумек
щвеч1ел шаг1ирзабиги. Гьев ккола шаг1ирзабазулги шаг1ирги, гьезул к1удияв
муг1алимги ва г1акълучиги. Киналго гьунарчаг1аз шаг1ирзабаз гуро гьединаб
г1олел шаг1 ирзабазе кумекги гьабулеб, гьел нухдеги рачунел.
Гьелъулъ буго Г1абасиласул т1ок1лъиги
гьунарги. Дида дир г1умруялда жаниб дандч1вач1о гьевги, гьесул сахаватай хъизан
Савадатги г1адинал г1аданги хириял, халкъги бокьулел, халкъалъеги рокьулел,
унго-унгоял маг1арул намус-ях1 ц1унарал, рагьарал рак1азул, сахаватал г1адамал.
Нужецагоги хал гьабеха, херал гьез,
цох1о къоялда жидехъе рач1унел гьалбалги, гьудул-гьалмагъзабиги дандч1валеб куц
ва гьезул гьабулеб х1урмат ва гьел
нуха рег1улеб куцалъул. Гьезул бук1унаро т1аде чаг1и камураб къо ва лах1зат.
Гьезухъе рач1уна гьел рихьизе, гьезде ургъел бикьизе, гьезухъа г1акълу босизе
г1адатиял г1адамал гурелги, г1алимзаби, гьунарчаг1и т1олго Дагъистаналдасаго.
Гьеб буго Аллагьас гьезие кьураб т1ок1лъи
ва гьунар. Дунги ккола гьес, цойгидалго г1адин, гьеб поэзиялъул нухде кверги
ккун рег1арав чи. Г1абасиласда дандч1вач1евани, гьеб гьедин бук1унгут1изеги
бегьулаан. Гьел руго дие хириял чаг1и.
Гьесул
буго цойги т1ок1лъи-гьев киданиги ч1ух1уларо жиндир гьунаралдаса ва гьеб
гьурщизе лъугьунаро.
Хунзахъ район буго т1олго Дагъистаналъеги,
Россиялъеги, дунялалъеги ц1ар раг1арал гьунарчаг1и кьураб Ват1ан, гьел ц1вабзазда
гьоркьоб цебесеб кьерда вук1ина г1асрабаз Г1абасилавги. Гьев гьелъие мустах1икъавги
вуго.
Гьединлъидал дие бокьун буго гьесде
дирго пикру загьир гьабизе, цо-цо дирго гьесде гьарурал асараздалъун.
Халатаб г1умруги, сахлъиги дуе ва
дур г1умрудул гьудул сахай ва саламатай Савадатие.
Къабул гьабе дир гьит1инаб сайгъат.
Адабгун ва х1урматгун нуж рокьулев Шарапудинов Г1иса
Гумбет район. Дагъистаналъул мустах1икъав муг1алим ва Россиялъул
хъвадарухъабазул Союзалъул член
Г1ИЩКЪУЛ ЛЕГЕНДА
Г1абасил Мах1амад, Дагъистаналъул
Шаг1ирал къач1алеб къебелъиги дур.
Къват1ире риччалел гьезул т1ахьазе
Рекъон къимат кьолев редакторги
мун.
Г1адан хиралъидул ханлъи бихьана
Хунзахъ районалъул Лъаг1илухъ дида.
Лъана, росубакьулъ, Алжанги рагьун,
Малаикгун цадахъ х1урулг1ин йик1ин.
Маг1арул халкъалъе харбие кьурав
Хвелгьеч1ев Легенда, Г1ищкъул дирижер,
Бицун божулареб г1аданлъиялъул,
Г1абасиласулаб хъала барав мун.
Огь, Г1абасиласул х1еренаб калам,
Х1охьлада гьоркьобцин рокьи
чваххулеб.
Огь, Г1абасиласул г1акъилаб малъи
Г1аламалъе даим кицилъун ккараб.
Г1агараб
халкъалъе къойил бицине
-Къайислъун
хут1арав халкъияв шаг1ир.
Хвел
гьеч1ел, ч1агоял дур асаразул
Аза-азар
соназ гьабила къимат.
*** ***
***
Инсул квералъ ч1варав Камалил Башир
Кинабго халкъазе харбий хут1ана.
Хабалъ лъунаниги ч1ахъадерица
Ч1агоял ясакьа ц1унизе ккана.
Мунги г1олохъанго ч1вазе вук1ана,
Ч1аго нахъе эмен вук1арав ани.
Амма рагъде ах1ун арав дур эмен,
Абадиялъего нахъе вуссинч1о.
Йокьулей щвеч1ого ч1ужу ячинч1ев
Мах1муд г1аламалъе мисаллъун ккана.
Муи гуронани къабуллъич1ев дов
Къайислъун халкъалъе харбий
хут1ана.
Мунги
хут1илаан, Мах1муд кинигин,
Нагагьлъун
Савдатгун вухьинч1евани,
Щибилеб,
Мах1амад, Г1абасиласги
Г1ураб
къиса тараб халкъалъе нахъе.
САВДАТ-ЭБЕЛАЛЪЕ
Шаг1ирасул лъади, лъег1елдерил яс,
Сахаб г1амалалъул маг1арул г1адан.
Мун йик1инч1ейани, к1удияв шаг1ир
К1одолъилаандай гьадин халкъалъе.
Мун Г1абасиласул г1акъилай гьудул,
Г1аламалъе даим каву рагьарай.
Кинабго г1умруги г1олохъанлъиги
Г1адамазе хъулухъ гьабулей арай.
Шаг1ирасул лъади, лъег1елдерил яс,
Нус-нус лъималазе Савадат-эбел,
Аман, анищ дуе азарил сонал
Аза-азар лъимал нухарег1изе.
Мун сонал аниги, солдат кинигин,
Солдатлъун росасе яхъунч1ун йигей,
Мун йик1инч1ейани бук1инароан
Г1аданхиралъидул хъала Лъаг1илухъ.
Шаг1ирасул
гъасда ц1а свине теч1ей,
Ц1адулал
сонаца шаг1ир ц1унарай,
Шаг1ирасул
лъади, лъег1елдерил яс,
Лъаг1илухъ
памятник базе ккола дуй.
Г1абасиласул мина
Г1абасиласул мина-
Миллаталъул бечелъи,
Maг1арул шаг1ирасул
Гьобол хирияб хъала.
Маг1аруллъи хирияв,
Халкъияв шаг1ирасул,
Халкъалъе нахъе тараб,
Хазинаялъул бок1он.
Бечедаб адабият,
Гьарзаяб маданият-
Гьаб буго Г1абасилас
Г1асрабазе тараб ирс.
Г1адан хирияв гьудул,
Гьобол камич1еб музей,
Кидаго рагьун буго
Рагьун рак1гун щварасе.
Шаг1ирасул къебелъи,
Шаг1ирзабазул свери,
Свере нуж Лъаг1илухъе,
Лъалеб
цинги гьеб мина.
Г1абасил Мах1амадихъе
Г1абасил Мах1амад, гьанже рац1ц1алъи,
Нац1 барав чи г1анги, рик1к1унеб
гьеч1о.
Гьобо к1удиясул ханжуги буго,
Хъулби ч1ах1иязухъ- хъулухъги буго.
Г1абасил Мах1амад, гьанже
рит1ухълъи,
Гьет1араб т1илг1анги г1ад-хоч1
гьабула.
Т1адчаг1аз чурхъараб-чиназул улка,
Чуял т1ад риччараб хур г1адин буго.
Хирияв дир гьудул, халкъияв шаг1ир,
Халкъилан
ах1улев чиго лъуг1ана.
Нилъер
шиг1рабазулъ бок1он гурони,
Рит1ухълъи
хут1араб бак1 гьеч1о гьанже.
| 
