31 маялда райадминистрациялда тlобитlана росабазул бегавулзабазулгун данделъи. Гьелда гlахьаллъи гьабуна районалъул бетlер Нурмухlамад Задиевас, гьесул заместитель Асадгlали Гlабдуразакъовас, Роскадастралъул республикаялда бугеб филиалалъул плановияб отделалъул начальникасул заместитель Хlажимурад Тlагьировас ва цогидазги.

Данделъиялда гьоркьор лъун рукlана районалда “Национальная система пространственных данных” абураб пачалихъияб программа гlумруялде бахъинабиялъул, росабазул генералиял планал хlадуриялъул, ихдалил призыв тlобитlиялъул, росдал магlишаталъул ракьал жиндирго мурадалда хlалтlизариялъул, диниял учреждениязул “зеленкаби” гьариялъул ва цогидалги бегавулзабазда ва гьезул нухмалъиялда ругел росабазда хурхарал жакъа къоялда бищунго кlвар цlикlкlарал суалал.  

Узухъда, гьезда гьоркьоса бищунго кlвар бугеблъун букlана генералиял планазул суал. Чанго соналъ райадминистрацияги бегавулзабиги цогидалги иш тlаде кколел гlуцlабиги гьелда тlад хlалтlилел ругониги, жакъа къоялде районалъул жеги цониги росдал генплан тlубан хlадурун гьечlо. Гьелъ кlудиял кваклквал гьабулеб буго районалда ралел ва разе ракlалда ругел объектазе, ай хlинцлъизабулеб буго муниципалитеталъул инфраструктураялъул цебетlей. Хlадурараб генплан гьечlого, законалда рекъон кьезе бегьулеб гьечlо цониги участок, цониги объекталъе бихьизабураб участокалъе гьабун бажарулеб гьечlо “зеленка”. Араб соналдаса нахъе “зеленка” гьечlеб минаялде бачун бажарулеб гьечlо тlабигlияб газги. 

Данделъиялда гlатlидго бицана жакъа къоялде гьеб суалалда сверухъ бугеб ахlвал-хlалалъул. Гьедин, генплан хlадуриялда хурхун гьарулел хlалтlаби рагlалде щун ругин абизе бегьула гlицlго цохlо Цlада росдал. Гьезда хадур гъун руго Лъагlилухъ, Гьацlалухъ ва Мочlохъ росабиги. Амма руго жеги гьелъие щибго хlалтlи гьабичlелги.   

 
Цоги жакъа къоялда цебе чlараб суал - ихдал призыв тlобитlи. Данделъиялда бицана гьеб ишги цlакъ хадуб бехъерхъун унеб бугилан. Гьедин, Асадгlали Гlабдуразакъовасул баяназда рекъон Ватlаналда цебе тlадаб борч тlубаялъе данде кколеб ригьалда ругел гlолилазухъе битlун букlун буго 763 повестка. Гьездасан военкоматалде вачlун вуго гlицlго 88 чи, гьезулги гlемерисел ратун руго студентал ва инвалидал. Гlаммаб къагlидаялъ, исана ихдал призывалъе районалъе бихьизабураб планалда рекъон армиялде витlизе кколев вуго гlага-шагарго 60 гlан гlолилав. Гьездасан жакъа къоялде витlун вуго 37 чи. Ай, 15 июлалде щвелалде тlадеги валагьизе кколев вуго жеги 20 чи. Бищун жигаралда гьеб хlалтlи тlубазабулеб буго Бакьагьечlи росулъ, гьениса армиялле унев вуго 10 гlолилав, Хунзахъ советалдаса - 12 чи, Цlадаса - 5. Амма руго цо-цо росаби ихдал призывалде жеги цониги чи витlичlелги. Гьединазда гъорлъ руго Гьамущи, Гlоркlачlи, Мущули, Гlорутlа ва Буцlра росаби. Гьеб суалалде киналго бегавулзабаз хасаб кlвар кьезе кколилан лъазабуна Асадгlали Гlабдуразакъовас.   

И. Мухlамадов.