Рахьдал мац1 – дир рух1, дир дунял
Мун къункърабалъ гьеч1о, ц1умазулъ вуго
Ц1вабзахъе валагьун воржунев вуго.
Х1. Гъазимирзоев
26 апрелалда нилъер районалда т1обит1ана Дагъистаналъул халкъияв шаг1ир, инсанияталдаго бергьарав г1акъил, нилъер ракьцояв Расул Х1амзатовас 100 сон т1убалеб бук1иналда бан «Рахьдал мац1 – дир дунял, дир рух1» абураб Республикаялъулаб фестиваль.
Фестиваль байбихьана культураялъул к1алг1аялда цебе нилъер маданияталъулгун, г1адатазулгун, миллияб богогьанлъигун лъай-хъвай гьабизе гьалбадерие рес кьолеб миллияб майданалда чедгун ц1амгун гьалбадерида дандч1вай гьабиялдасан.
Культураялъул к1алг1аялъул фойеялда г1уц1ун бук1ана Расул Х1амзатовасул фотовыставка ва бихьизабуна гьесулго х1акъалъулъ документалияб фильмги.
Рохалил тадбир бачине рес щвана республикаялъулго рахьдал мац1алъул конкурсазда чанго соналъ т1ат1алаго цересел бак1ал росарал рахьдал мац1алъул церет1урал муг1алимзаби Саида Х1усеновалъе ва Аминат Сатаровалъе.
Расул Х1амзатовасул «Авар мац1» коч1одалъун данделъиги рагьун, гьесул творчествоялде жидерго бугеб рокьиги загьир гьабун, гьез к1алъазе раг1и кьуна райадминистрациялъул бет1ер Нурмух1амад Задиевасе. Нурмух1амадица Россиялдаго цо бугеб 6 халкъияв поэт жанив вахъараб литературияб Хунзахъ районалда авар мац1алъул фестиваль т1обит1улеб бук1иналдаса жив вохарав вук1ин загьир гьабуна.
К1алъазе рахъарал А. А. Тахо-Годил ц1аралда бугеб г1елмиябгин х1албихьиялъулаб педагогикияб институталъул х1алт1ухъаби Барият Х1ажиевалъ, Альбина Аруховалъ, «Маг1арулай» журналалъул редактор, Авар мац1алъул муг1алимзабазул ассоциациялъул нухмалъулей Баху Мух1идиновалъ ва г1емерал цогидазги, Кизилюрталъул рагъулаб искусствалъул муг1алим Зумрут Х1амзатовнаялъ гьарурал к1алъаязда загьир гьабуна нилъер ракьцояв шаг1ирасде жидерго бугеб хиси гьеч1еб рокьи, Расулил Ват1аналде, Дагъистаналде, эбелалде, ч1ужуг1аданалде гьарурал куч1дуз, ай Х1амзатовасул т1убараб творчествоялъго дунял х1айран гьабун бук1иналъулги бицун, гьез хадубги баян гьабуна нилъер маг1арул мац1, нилъер г1адатал, нилъер чилъи, намус-ях1, нилъер бах1арчилъи, г1аданлъи – нух бихьизабун, гьес Дагъистанго дунялалда раг1изабун бук1иналъул.
Байрам берцин гьабун бук1ана нилъер умумузул рет1а-къаялда Кочубеялдаса бахъараб Кизилюрталде щвезег1ан 78 мактабалъул авар мац1алъул муг1алимзаби данделъиялда г1ахьаллъулел рук1иналъ ва гьезул щиялъ Расулил куч1дуздаса мухъал рик1к1иналъги.
Балагьаразул рак1ал асир гьаруна «Хундерил накъишал» кьурдабаздалъун, «Г1акаро - Хунзахъ» кьурдул ансамблялъул церерахъиназ, Т1анусиса муг1алимзабазул хоралъ, районалъул школлъималазул художественниябгун поэтикияб композициялъ, Уздалросдал «Орленок» лъималазул ахалъул тарбичаг1азул ва «гьит1ичазул» хоралъ, Моч1охъ гьоркьохъеб школалъул 5 классалъул ц1алдохъаналъ рик1к1араб «Дир бет1ер» абураб асаралъ, районалъул культураялъул отделалъул бихьиназул хоралъ, Буц1ра культураялъул рукъалъул директор Мух1амад Нух1овасул, Ах1сарат Х1айбулаевалъул, Г1айшат Тажудиновалъул ва цогидазулги церерахъиназ.
Байрамалда авар мац1алъул муг1алимзабазул цолъиялъ к1одо гьаруна рахьдал мац1алъул цере т1урал муг1алимзаби, гьаб соналда авар мац1алъул кабинет г1уц1ун т1оцебесеб бак1 босарай Т1ануси гьоркьохъеб школалъул авар мац1алъул учительница Абулпазлуева Гьадигат.
А. А. Тахо-Годил ц1аралда бугеб педагогикияб институталъул ц1аралдасан к1одо гьаруна республикаялда кинаб тадбир т1обит1улеб бук1аниги гьелда жигараб г1ахьаллъи гьабизе вакилзаби х1адур гьарулеб районалъул лъай кьеялъул отдел ва гьелъул нухмалъулей Пат1имат Х1амзатова, культураялъул отделалъул нухмалъулей Жавгьарат Хъайитмазова ва живго районалъул бет1ер Нурмух1амад Задиев
Гьалбал т1ад руссун ана Хунзахъ жидее г1уц1араб гьоболлъиялдаса ва т1абиг1ат берцинаб районалдаса рак1 разилъун баркалагун.
Н. Г1алиева
| 
