Батирова Залму-поэтесса ва драматург. Гьаюна 1941 соналъ Хунзахъ районалъул Хунзахъ росулъ. 1960 соналъ лъугIана гьоркьохъеб школа Хунзахъ, хадуб-Дагъистаналъул педагогикияб институт. Къого соналъ хIалтIана учительницалъун, 1985 соналъ яхъана МахIачхъалаялде ва хIалтIизе лъугьана «Дагъистаналъул чIужугIадан» журналалъул авар мацIалда бахъулеб выпускалъул редакторлъун. 1986 соналда хIалтIизе лъугьана МахIачхъалаялъул Кировский райисполкомалъул гIаммаб отделалъул заведующийлъун, 1991 соналдасан-ДРялъул тIабигIиял ресурсазул ва тIабигIат цIуниялъул Министерствалъул гIаммаб отделалъул начальниклъун, Дагъистаналъул ралъдал инспекциялъул пачалихъияй инспекторлъун. 1995 соналдаса нахъе Залму ккола Россиялъул хъвадарухъабазул Союзалъул членлъун.Республикаялъул газетазда ва журналазда гьелъул асарал рахъана ХХ гIасруялъул 60-абилел соназда. З. Батировалъул тIаса рищарал асарал ва поэмаби рахъулаан «ГIолохъанал гьаркьал», «РитIухълъи» сборниказда, магIарул ва гIурус мацIазда. Поэтессаялъул тIоцебесеб тIехь къватIибе бачIана 1964 соналда магIарул мацIалда. 1995 соналда къватIибе бачIана «Намус», хадуб-сборникал «КIиго тIегь», «Сабаб», «Бекараб гIаркьел», «Къадруяв магIаруласул гIадатияб ракI», драма «ХIажимурад».Ахирал соназда З. Батировалъ къватIире риччана поэма «ЧIанкIа», «КъвекIчармил хвалчаца борце дир гIумру», «ТалихIал нухал» кучIдузул сборник, «ЦIахIилал цIадал», «Солдатасул къисмат», документалияб повесть «Ссунареб цIва», «Хундерил ханша», «Пикрабазул цIумур», «Ахирисеб как», «Щубил къатIраби» «БацIил дарс», «Избранные», «Переливание крови», «Рокьиги магIуги», «Щубил къатIраби», «КIиго гIишкъул тIегь», «Даимаб аманат», «Цена победы» асарал.2007 соналда гьей яхъана «ЛъагIалил кечI» республикаялъулаб конкурсалъул лауреатлъун. З. Батировалъе щвана ДРялъул ХIурматияб грамота ва Шамилил цIаралда бугеб фондалъул меседил медаль, халкъазул гьудуллъиялъул орден, Москваялъул мэрасул медаль, 2 нухалъ гьей мустахIикълъана Дагъистаналъул президентасул гранталъе.Залму Батирова ккола Дагъистан Республикаялъул культураялъул мустахIикъай хIалтIухъан, ХъахIабросолъа МахIмудил цIаралда бугеб жамгIияб литератураялъул, Расул ХIамзатовасул «ХъахIал къункъраби» Россиялъул тIоцебесеб премиязул лауреат ва 2014 соналдаса-Дагъистаналъул Халкъияй поэтессаги.
|
